ಎಲೈಟ್ ಐ20, ಹರ್ಲೆ ಸ್ಟ್ರೀಟ್ 750ಗೆ ವರ್ಷದ ಕಾರು, ಬೈಕ್ ಪ್ರಶಸ್ತಿ

By Nagaraja

Updated: Thursday, December 18, 2014, 12:52 [IST]

'ಭಾರತದ ವರ್ಷದ ಕಾರು 2015' ಹಾಗೂ 'ಭಾರತ ವರ್ಷದ ಬೈಕ್ 2015' ಪ್ರಶಸ್ತಿಗೆ ಅನುಕ್ರಮವಾಗಿ ಹ್ಯುಂಡೈ ಎಲೈಟ್ ಐ20 ಹಾಗೂ ಹರ್ಲೆ ಡೇವಿಡ್ಸನ್ ಸ್ಟ್ರೀಟ್ 750 ಪಾತ್ರವಾಗಿದೆ.

ವಾಣಿಜ್ಯ ನಗರ ಮುಂಬೈನಲ್ಲಿ ನಡೆದ ಸಮಾರಂಭದಲ್ಲಿ 10ನೇ '2015 ಇಂಡಿಯಾ ಕಾರ್ ಆಫ್ ದಿ ಇಯರ್' (ಐಸಿಒಟಿವೈ) ಹಾಗೂ 8ನೇ ಸಾಲಿನ '2015 ಇಂಡಿಯನ್ ಬೈಕ್ ಆಫ್ ದಿ ಇಯರ್' (ಐಎಂಒಟಿವೈ) ಪ್ರಶಸ್ತಿಯನ್ನು ಘೋಷಣೆ ಮಾಡಲಾಗಿದೆ.

ಜೆಕೆ ಟೈರ್ ಆಂಡ್ ಇಂಡಸ್ಟ್ರೀಸ್ ಲಿಮಿಟೆಡ್ ಮುಖ್ಯಸ್ಥ ಹಾಗೂ ವ್ಯಪಸ್ಥಾಪಕ ನಿರ್ದೇಶಕ ಡಾ. ರಘುಪತಿ ಸಿಂಘಾನಿಯಾ ಮತ್ತು ಐಸಿಒಟಿವೈ ಹಾಗೂ ಐಎಂಒಟಿವೈ ಮುಖ್ಯಸ್ಥ ಆಸ್ಪಿ ಬಥೆನಾ ವಿಜೇತ ಹ್ಯುಂಡೈ ಹಾಗೂ ಹರ್ಲೆ ಸಂಸ್ಥೆಯ ಪ್ರತಿನಿಧಿಗಳಿಗೆ ಪ್ರಶಸ್ತಿಗಳನ್ನು ಹಸ್ತಾಂತರಿಸಿದರು.

ಎಂದಿನಂತೆ ಈ ಬಾರಿಯೂ ವರ್ಷದ ಕಾರು ಹಾಗೂ ಬೈಕ್ ಪ್ರಶಸ್ತಿಗೆ ಕಠಿಣ ಪೈಪೋಟಿ ಏರ್ಪಟ್ಟಿತ್ತು. ಆದರೆ ಎಲ್ಲ ಅಂಶಗಳನ್ನು ಕೂಲಂಕುಷವಾಗಿ ಪರಿಶೀಲನೆ ಮಾಡಿರುವ ವಿಶೇಷ ತೀರ್ಪುಗಾರರ ಸಮಿತಿಯು ಪ್ರಶಸ್ತಿಯನ್ನು ಘೋಷಿಸಿದೆ.

ವರ್ಷದ ಕಾರು ವಿಭಾಗದಲ್ಲಿ ಅಂತಿಮ ಹಂತದಲ್ಲಿ ಹ್ಯುಂಡೈ ಎಲೈಟ್ ಐ20, ಮಾರುತಿ ಸುಜುಕಿ ಸಿಯಾಝ್ ಮತ್ತು ಹೋಂಡಾ ಸಿಟಿ ನಡುವೆ ಕಠಿಣ ಪೈಪೋಟಿ ಏರ್ಪಟ್ಟಿತ್ತು. ಅದೇ ರೀತಿ ವರ್ಷದ ಬೈಕ್ ವಿಭಾಗದಲ್ಲಿ ಹರ್ಲಿ ಸ್ಟ್ರೀಟ್ 750 ಮಾದರಿಗೆ ಕೆಟಿಎಂ ಆರ್‌ಸಿ 390 ಹಾಗೂ ಸುಜುಕಿ ಜಿಕ್ಸರ್ ಸ್ಪರ್ಧೆ ಒಡ್ಡಿತ್ತು.

ಆದರೆ ಬೆಲೆ, ಇಂಧನ ಕ್ಷಮತೆ, ಶೈಲಿ, ಆರಾಮದಾಯಕ, ಅನುಕೂಲತೆ, ಸುರಕ್ಷತೆ, ನಿರ್ವಹಣೆ, ತಾಂತ್ರಿಕತೆ, ಹಣಕ್ಕೆ ತಕ್ಕ ಮೌಲ್ಯ, ಹೊಂದಾಣಿಕೆ ಹಾಗೂ ಪ್ರಾಯೋಗಿಕವಾಗಿಯೂ ಭಾರತೀಯ ರಸ್ತೆ ಪರಿಸ್ಥಿತಿಗೆ ಎಷ್ಟು ಯೋಗ್ಯ ಎಂಬಿತ್ಯಾದಿ ವಿಚಾರಗಳನ್ನು ಗಮನದಲ್ಲಿಟ್ಟುಕೊಂಡು ತೀರ್ಪುಗಾರರ ಸಮಿತಿಯು ವಿಜೇತ ಕಾರನ್ನು ಆರಿಸಿದೆ. ಜೆಕೆ ಟೈರ್ ಸಹಯೋಗದಲ್ಲಿ ಐಸಿಒಟಿವೈ ಹಾಗೂ ಐಎಂಒಟಿವೈ ಆಯೋಜನೆಯಾಗುತ್ತಿದೆ.