ದಟ್ಸನ್ ಗೊ ಪ್ಲಸ್ ಎಂಪಿವಿ ಬಿಡುಗಡೆ ಮುಂದಕ್ಕೆ

By Nagaraja

Published: Monday, October 6, 2014, 15:35 [IST]

ಈ ಮೊದಲು ಪ್ರಸಕ್ತ ಸಾಲಿನ ದೀಪಾವಳಿ ಹಬ್ಬದ ಆವೃತ್ತಿಯ ವೇಳೆಯಲ್ಲಿ ದಟ್ಸನ್ ಗೊ ಪ್ಲಸ್ ಬಹು ಬಳಕೆಯ ವಾಹನ (ಎಂಪಿವಿ) ಭಾರತ ಮಾರುಕಟ್ಟೆ ಪ್ರವೇಶಿಸುವ ಕುರಿತಂತೆ ವರದಿಗಳು ಹಬ್ಬಿದ್ದವು. ಆದರೆ ಸದ್ಯ ಬಂದಿರುವ ಮಾಹಿತಿಗಳ ಪ್ರಕಾರ ನಿಸ್ಸಾನ್ ಅಧೀನತೆಯಲ್ಲಿರುವ ದಟ್ಸನ್ ಗೊ ಪ್ಲಸ್ ಎಂಪಿವಿ 2015ನೇ ಸಾಲಿನ ಮೊದಲಾರ್ಧದಲ್ಲಿ ದೇಶದ ಮಾರುಕಟ್ಟೆಗೆ ಪ್ರವೇಶಿಸಲಿದೆ.

ಹೋಂಡಾ ಮೊಬಿಲಿಯೊ, ಮಾರುತಿ ಸುಜುಕಿ ಎರ್ಟಿಗಾ ಮತ್ತು ಇನ್ನಷ್ಟೇ ಬಿಡುಗಡೆಯಾಗಬೇಕಾಗಿರುವ ರೆನೊ ಲೊಡ್ಜಿ ಮಾದರಿಗಳಿಗೆ ಹೊಸತಾದ ದಟ್ಸನ್ ಗೊ ಎಂಪಿವಿ ಕಾರು ಪ್ರತಿಸ್ಪರ್ಧಿಯಾಗಲಿದೆ.

ನಿಮ್ಮ ಮಾಹಿತಿಗಾಗಿ ವರ್ಷಾರಂಭದಲ್ಲಷ್ಟೇ ದಟ್ಸನ್ ಗೊ ಹ್ಯಾಚ್‌ಬ್ಯಾಕ್ ಕಾರು ಭಾರತ ಮಾರುಕಟ್ಟೆಗೆ ಪರಿಚಯವಾಗಿತ್ತು. ಇದರ ದೆಹಲಿ ಎಕ್ಸ್ ಶೋ ರೂಂ ಬೆಲೆ 3.12 ಲಕ್ಷ ರು.ಗಳಿಂಗ 3.70 ಲಕ್ಷ ರು.ಗಳ ವರೆಗಿದೆ.

ಆದರೆ ವಿತರಕ ಜಾಲದ ಕೊರತೆಯಿಂದಾಗಿ ಮಾರಾಟದಲ್ಲಿ ದಟ್ಸನ್ ಗೊ ಹಿನ್ನಡೆ ಅನುಭವಿಸಿತ್ತು. ಇದೇ ಸಮಸ್ಯೆ ದಟ್ಸನ್ ಗೊ ಪ್ಲಸ್ ಎಂಪಿವಿ ಮಾದರಿಗೂ ಎದುರಾಗುವ ಸಂಭವವಿದ್ದು, ಈ ಹಿನ್ನಲೆಯಲ್ಲಿ ಬಿಡುಗಡೆ ಮುಂದೂಡಲಾಗುತ್ತಿದೆ ಎಂಬ ಬಗ್ಗೆಯೂ ವದಂತಿಗಳು ಕೇಳಿ ಬರುತ್ತಿದೆ.