ರೆನೊ ಕ್ವಿಡ್ ಎಎಂಟಿ ಕಾರು ಟೆಸ್ಟಿಂಗ್; ಬಿಡುಗಡೆ ಯಾವಾಗ?

By Nagaraja

Published: Monday, May 2, 2016, 16:43 [IST]

2016 ಆಟೋ ಎಕ್ಸ್ ಪೋದಲ್ಲಿ ಪ್ರದರ್ಶನ ಕಂಡಿರುವ ರೆನೊ ಕ್ವಿಡ್ ಆಟೋಮ್ಯಾಟಡ್ ಮ್ಯಾನುವಲ್ ಟ್ರಾನ್ಸ್ ಮಿಷನ್ (ಎಎಂಟಿ) ಮಾದರಿಯ ಚಾಲನಾ ಪರೀಕ್ಷೆಯನ್ನು ಫ್ರಾನ್ಸ್ ಮೂಲದ ಸಂಸ್ಥೆಯು ಆರಂಭಿಸಿದೆ. ಇದರಂತೆ ರೆನೊ ಸಂಸ್ಥೆಯ ಘಟಕ ಸ್ಥಿತಗೊಂಡಿರುವ ಚೆನ್ನೈ ನಗರದಲ್ಲಿ ನೂತನ ರೆನೊ ಕ್ವಿಡ್ ಎಎಂಟಿ ಕಾರಿನ ಸಂಚಾರ ಪ್ರಯೋಗದ ವೇಳೆ ಕ್ಯಾಮೆರಾ ರಹಸ್ಯ ಕಣ್ಣುಗಳಿಗೆ ಸೆರೆ ಸಿಕ್ಕಿದೆ.

ನಿಮಗೆಲ್ಲರಿಗೂ ತಿಳಿದಿರುವಂತೆಯೇ ರೆನೊ ಎಎಂಟಿ ಕಾರಿನಲ್ಲಿ 'ಈಸಿ-ಆರ್' ಗೇರ್ ಬಾಕ್ಸ್ ಬಳಕೆ ಮಾಡಲಾಗಿದೆ. ಇದು ಹೆಚ್ಚು ಶಕ್ತಿಶಾಲಿ 1.0 ಲೀಟರ್ ಎಂಜಿನ್ ಪಡೆದುಕೊಳ್ಳುವುದು ಮಗದೊಂದು ವಿಶೇಷ.

ಕಳೆದ ವರ್ಷ ಮಾರುಕಟ್ಟೆಗೆ ಪ್ರವೇಶಿಸಿರುವ ಎಸ್ ಯುವಿ ಶೈಲಿಯ ಕ್ವಿಡ್ ಕಾರಿ ಭಾರಿ ಪ್ರತಿಕ್ರಿಯೆ ವ್ಯಕ್ತವಾಗುತ್ತಿದೆ. ಇದು ಮಾರುತಿ ಆಲ್ಟೊ ಯಶಸ್ಸಿನ ಓಟಕ್ಕೆ ಹೊಡೆತ ನೀಡುವಲ್ಲಿ ಯಶ ಕಂಡಿದೆ.

ಈಗ ತನ್ನ ಶ್ರೇಣಿಯ ಕಾರುಗಳನ್ನು ವಿಸ್ತರಿಸುವ ಯೋಜನೆಯಲ್ಲಿರುವ ರೆನೊ, ಕ್ವಿಡ್ ಎಎಂಟಿ ಕಾರನ್ನು ಬಿಡುಗಡೆ ಮಾಡುವ ಯೋಜನೆಯಲ್ಲಿದೆ. ಇದು ಕಡಿಮೆ ಬೆಲೆಯಲ್ಲಿ ದೊರಕಲಿರುವ ಎಎಂಟಿ ಎಂದೆನಿಸಿಕೊಳ್ಳಲಿದೆ.

ಭಾರತ ಮಾರುಕಟ್ಟೆಯಲ್ಲಿ ರೆನೊ ಎಎಂಟಿ ಮಾದರಿಯು ಮಾರುತಿಯ ಜನಪ್ರಿಯ ಆಲ್ಟೊ ಕೆ10 ಎಎಂಟಿ ಮಾದರಿಗೆ ಪ್ರತಿಸ್ಪರ್ಧಿಯನ್ನು ಒಡ್ಡಲಿದೆ.

ನೂತನ ರೆನೊ ಕ್ವಿಡ್ ಕಾರಿನಲ್ಲಿ 1.0 ಲೀಟರ್ ಸ್ಮಾರ್ಟ್ ಕಂಟ್ರೋಲ್ ಎಫಿಸಿಯನ್ಸಿ (ಎಸ್ ಸಿಇ) ಆಳವಡಿಕೆಯಾಗಲಿದೆ. ಅಲ್ಲದೆ ಶಿಫ್ಟ್ ಕಂಟ್ರೋಲ್ ಡಯಲ್ ಎಂಬ ರೀತಿಯಲ್ಲಿ ರಿವರ್ಸ್, ನ್ಯೂಟ್ರಲ್ ಮತ್ತು ಡ್ರೈವ್ ಗಳೆಂಬ ಮೂರು ಚಾಲನಾ ವಿಧಗಳು ಇರಲಿದೆ.

ಏನಿದು ಈಸಿ-ಆರ್ ಎಎಂಟಿ ಗೇರ್ ಬಾಕ್ಸ್

ಸಾಂಪ್ರದಾಯಿಕ ಗೇರ್ ಲಿವರ್ ಗಳಿಗಿಂತ ವಿಭಿನ್ನವಾಗಿ ಇದು ವೃತ್ತಾಕಾರದಲ್ಲಿದ್ದು, ತಿರುಗಿಸುವ ಮೂಲಕ ಚಾಲನಾ ವಿಧಗಳನ್ನು ಬದಲಾಯಿಸಬಹುದಾಗಿದೆ. ಇದು ನ್ಯೂಟ್ರಲ್, ಡ್ರೈವ್ ಅಥವಾ ರಿವರ್ಸ್ ಚಾಲನಾ ವ್ಯವಸ್ಥೆಗಳನ್ನು ಪಡೆದಿದೆ.