ಇನ್ಮುಂದೆ ದುಬೈನಲ್ಲಿ 'ಕ್ವಾಡ್-ಕಾಪ್ಟರ್'‌ಗಳದ್ದೇ ಸದ್ದು..!!

Written By:

ಶ್ರೀಮಂತಿಕೆಯ ತವರು ದುಬೈನಲ್ಲಿ ದಿನದಿಂದ ದಿನಕ್ಕೆ ಹೊಸ ಹೊಸ ತಂತ್ರಜ್ಞಾನಗಳ ಅಭಿವೃದ್ಧಿ ಹೆಚ್ಚುತ್ತಿದ್ದು, ಇದೀಗ ವಿಶ್ವದಲ್ಲೇ ಮೊದಲ ಬಾರಿಗೆ ಸ್ವಯಂ ಚಾಲಿತ 'ಕ್ವಾಡ್-ಕಾಪ್ಟರ್'‌ಗಳು ಅಧಿಕೃತ ಸೇವೆ ನೀಡಲು ಸಿದ್ಧಗೊಳ್ಳುತ್ತಿವೆ.

ಚೈನಾ ನಿರ್ಮಾಣದ ಸ್ವಯಂ ಚಾಲಿತ "ಹ್ಯಾಂಗ್ 184" ಹೆಸರಿನ ಈ ವಾಹನವು ಪ್ರತಿ ಗಂಟೆಗೆ 100 ಕಿಲೋಮೀಟರ್ ವೇಗದಲ್ಲಿ ಚಲಿಸಬಲ್ಲದು. ಜೊತೆಗೆ ಭೂಮಿಯಿಂದ ಸುಮಾರು 300 ಮೀಟರ್ ಎತ್ತರಕ್ಕೆ ಹಾರಬಲ್ಲ ಸಾಮರ್ಥ್ಯ ಹೊಂದಿದೆ.

ಎಲೆಕ್ಟ್ರಿಕ್ ಎಂಜಿನ್ ಹೊಂದಿರುವ ಕ್ವಾಡ್ ಕಾಪ್ಟರ್ ವಾಹನಗಳಿಗೆ 2 ಗಂಟೆಗಳ ಕಾಲ ವಿದ್ಯುತ್ ಪೂರೈಸಿದರೆ 30 ನಿಮಿಷಗಳಷ್ಟು ಕಾಲ ಹಾರಬಲ್ಲದು ಎಂದು ಕಂಪನಿ ತನ್ನ ಪ್ರಕಟಣೆಯಲ್ಲಿ ತಿಳಿಸಿದೆ.

ಟ್ಯಾಕ್ಸಿಯಲ್ಲಿ ಕುಳಿತುಕೊಳ್ಳುವ ಪ್ರಯಾಣಿಕ ತಾನು ತಲುಪಬೇಕಾಗಿರುವ ನಿರ್ದಿಷ್ಟ ಸ್ಥಳವನ್ನು ಭೂಪಟದಲ್ಲಿ ಗುರುತಿಸಬೇಕು ಅಷ್ಟೇ, ಉಳಿದ ಎಲ್ಲಾ ಕೆಲಸಗಳನ್ನೂ ತಾನೇ ನೋಡಿಕೊಳ್ಳಲಿದೆ ಈ ಚಮತ್ಕಾರಿ ಟ್ಯಾಕ್ಸಿ.

"ವರ್ಲ್ಡ್ ಗವರ್ನಮೆಂಟ್ ಸಮಿತ್‌ನಲ್ಲಿ ಪ್ರದರ್ಶಿಸಲಾಗಿದ್ದ ಈ ವಾಹನವು ಕೇವಲ ಪ್ರದರ್ಶನಕ್ಕೆ ಮಾತ್ರ ಸೀಮಿತವಾಗಿರದೆ, ಕಾರ್ಯರೂಪಕ್ಕೂ ತರುತ್ತಿರುವುದು ದುಬೈ ಸರ್ಕಾರದ ಹೆಗ್ಗಳಿಕೆ.

ಇದೇ ಜೂನ್ ಅಂತ್ಯದಲ್ಲಿ ಈ ಚಾಲಕ ರಹಿತ ಟ್ಯಾಕ್ಸಿಗಳು ಅಧಿಕೃತ ಸೇವೆ ಆರಂಭಿಸಲಿದ್ದು, ದುಬೈನ ಸಾರಿಗೆ ಇಲಾಖೆಯ ಮುಖ್ಯಸ್ಥ ಮಟ್ಟರ್ ಅಲ್-ಟಯೆರ್ ಮಾಹಿತಿ ಬಿಡುಗಡೆ ಮಾಡಿದ್ದಾರೆ.

ಎಂಟು ಬಲಿಷ್ಠ ರೆಕ್ಕೆಗಳು ಹೊಂದಿರುವ ಈ ಕ್ವಾಡ್-ಕಾಪ್ಟರ್ ಟ್ಯಾಕ್ಸಿಯು ಎಂತಹ ವಾತಾವರಣದಲ್ಲಿಯೂ ಸಹ ಸಮತೋಲನ ಕಾಯ್ದುಕೊಳ್ಳುವ ವ್ಯವಸ್ಥೆ ಹೊಂದಿದೆ.

ಕ್ವಾಡ್-ಕಾಪ್ಟರ್‌ಗಳಲ್ಲಿ ಪ್ರಯಾಣಿಕರ ಸುರಕ್ಷತೆಗೆ ಹೆಚ್ಚಿನ ಒತ್ತು ನೀಡಲಾಗಿದ್ದು, ಹತ್ತಾರು ಸುರಕ್ಷಾ ಕ್ರಮಗಳನ್ನು ಇರಿಸಲಾಗಿದೆ.

ಟ್ರಾಫಿಕ್ ಸಮಸ್ಯೆಯಿಂದ ಬಳಲುವ ಬೃಹತ್ ನಗರಗಳಲ್ಲಿ ಕ್ವಾಡ್-ಕಾಪ್ಟರ್‌ಗಳು ವರದಾನವಾಗಲಿದೆ. ಜೊತೆಗೆ ದುಬೈನಲ್ಲಿ ಇವುಗಳ ಸೇವೆ ಜನಪ್ರಿಯಗೊಂಡಿದ್ದೇ ಆದಲ್ಲಿ, ಮುಂಬರುವ ದಿನಗಳಲ್ಲಿ ವಿಶ್ವದ ಬೃಹತ್ ನಗರಗಳಿಗೆ ಇವುಗಳು ಲಗ್ಗೆಯಿಡುವುದರಲ್ಲಿ ಯಾವುದೇ ಅನುಮಾನವಿಲ್ಲ. 

Read more on ದುಬೈ dubai
English summary
Dubai is set to launch the autonomous flying taxis, the EHang 184 by July 2017.
Please Wait while comments are loading...

Latest Photos