2018ರಲ್ಲಿ ಬರಲಿದೆ ಬ್ಯಾಟರಿಯಿಂದ ಓಡಾಡುವ ರೈಲು

By Nagaraja

Updated: Wednesday, October 29, 2014, 10:35 [IST]

ಜಗತ್ತಿನ ಸಂಚಾರ ವಾಹಕಗಳಲ್ಲಿ ರೈಲು ಪಯಣ ಅತ್ಯಂತ ಅಗ್ಗವಾಗಿದೆ ಎಂಬ ಮಾತಿದೆ. ಒಂದೇ ಸಮಯದಲ್ಲಿ ಸಾವಿರಾರು ಮಂದಿ ಯಾತ್ರಿಕರನ್ನು ಹೊತ್ತೊಯ್ಯುವ ಸಾಮರ್ಥ್ಯವನ್ನು ಇದು ಹೊಂದಿರುತ್ತದೆ.

ಉಗಿ ಬಂಡಿಯಿಂದ ಆರಂಭವಾಗಿರುವ ನಮ್ಮ ರೈಲು ಪಯಣ ಎಲೆಕ್ಟ್ರಿಕ್ ಟ್ರೈನ್ ವರೆಗೂ ಬೆಳೆದು ನಿಂತಿದೆ. ಇದೀಗ ಫ್ರಾನ್ಸ್ ಮೂಲದ ಸಂಸ್ಥೆಯೊಂದು ಸಂಪೂರ್ಣ ಹೊಗೆ ರಹಿತ (emission free) ಬ್ಯಾಟರಿ ರೈಲುವೊಂದನ್ನು ತಯಾರಿಸಲು ಮುಂದಾಗಿದೆ.

ಫ್ರಾನ್ಸ್‌ನ ಅಲ್ಸ್ಟಮ್ (Alstom) ಸಂಸ್ಥೆಯು ಬ್ಯಾಟರಿಯಿಂದ ಓಡಾಡುವ ರೈಲನ್ನು ಅಭಿವೃದ್ಧಿಪಡಿಸುತ್ತಿದೆ.

ವರದಿಗಳ ಪ್ರಕಾರ ಈ ಫ್ಯೂಯಲ್ ಸೆಲ್ ರೈಲಿನ ಮೊದಲ ಮಾದರಿಯು 2018ನೇ ಇಸವಿಯಲ್ಲಿ ಆಗಮನವಾಗಲಿದೆ.

ಈ ಸಂಬಂಧ ಫ್ರಾನ್ಸ್ ಮೂಲದ ಸಂಸ್ಥೆಯು ಜರ್ಮನಿಯ ಹಲವಾರು ಡಿಸೈನ್ ಸಂಸ್ಥೆಗಳ ಜೊತೆ ಆಶಯ ಪತ್ರಕ್ಕೆ ಸಹಿ ಹಾಕಿದೆ.

ಎಲೆಕ್ಟ್ರಿಕ್ ಕಾರುಗಳಲ್ಲಿರುವ ಅದೇ ಫ್ಯೂಯಲ್ ಸೆಲ್ ತಂತ್ರಜ್ಞಾನವನ್ನು ರೈಲಿನಲ್ಲಿ ಆಳವಡಿಸಲಾಗುವುದು. ಆರಂಭದಲ್ಲಿ ಇಂತಹ ಎರಡು ಮಾದರಿಗಳನ್ನು ನಿರ್ಮಿಸುವ ಯೋಜನೆಯನ್ನು ಸಂಸ್ಥೆ ಹೊಂದಿದೆ.

ಕೊರಡಿಯಾ ಪ್ರಾದೇಶಿಕ ರೈಲು ತಳಹದಿಯಲ್ಲಿ ನಿರ್ಮಾಣವಾಗಲಿರುವ ಈ ಹೊಗೆ ರಹಿತ ರೈಲು, ಡೀಸೆಲ್ ಮಲ್ಟಿಪಲ್ ಯುನಿಟ್‌ಗೆ ಹೋಲಿಸಿದಾಗ ಕಡಿಮೆ ಶಕ್ತಿ ಬಳಕೆ ಮಾಡಲಿದೆ.

ಈ ನಿಟ್ಟಿನಲ್ಲಿ 'ಇಂಟಲಿಜೆಟ್ ಎನರ್ಜಿ ಮ್ಯಾನೇಜ್‌ಮೆಂಟ್ ಸಿಸ್ಟಂ' ಆಳವಡಿಸಲಾಗಿದೆ. ಬ್ಯಾಟರಿಯಿಂದ ಓಡುವ ರೈಲು ಜರ್ಮನಿಯಲ್ಲೇ ಉತ್ಪಾದಿಸುವ ಯೋಜನೆಯನ್ನು ಸಂಸ್ಥೆ ಹೊಂದಿದೆ.

ಈ ಬಗ್ಗೆ ಪ್ರತಿಕ್ರಿಯಿಸಿರುವ ಆಲ್ಸ್ಟಮ್ ಟ್ರಾನ್ಸ್‌ಪೋರ್ಟ್ ಅಧ್ಯಕ್ಷರಾಗಿರುವ ಹೆನ್ರಿ ಪೌಪಾರ್ಟ್ ಲಾಫರ್ಜ್, "ವಿಶ್ವ ಪ್ರಯಾಣಿಕ ಸಾರಿಗೆ ವ್ಯವಸ್ಥೆಯಲ್ಲಿ ಫ್ಯೂಯಲ್ ಸೆಲ್ ತಂತ್ರಜ್ಞಾನದ ರೈಲುಗಳು ಮೊದಲ ಬಾರಿ ಅವಿಷ್ಕಾರವಾಗಲಿದೆ" ಎಂದಿದ್ದಾರೆ.

"ಹೆಚ್ಚುತ್ತಿರುವ ಪರಿಸರ ಮಾಲಿನ್ಯ ಹಾಗೂ ಇಂಧನಗಳ ಬೆಲೆ ಏರಿಕೆಯಾಗುತ್ತಿರುತ್ತಿರುವ ಹಿನ್ನಲೆಯಲ್ಲಿ ಇಂತಹ ಹೊಗೆ ರಹಿತ ರೈಲುಗಳ ಅಭಿವೃದ್ಧಿ ಅತ್ಯಗತ್ಯವಾಗಿದೆ" ಎಂಬುದನ್ನು ಅವರನ್ನು ವಿವರಿಸಿದ್ದಾರೆ.