ರಸ್ತೆಗಿಳಿಯಲಿದೆ ಯಮಹಾ ಅಗ್ಗದ ಪ್ರಯಾಣಿಕ ಬೈಕ್

By Nagaraja

Published: Monday, April 6, 2015, 12:29 [IST]

150 ಸಿಸಿ ಹಾಗೂ ಮೇಲ್ಪಟ್ಟ ವಿಭಾಗದಲ್ಲಿ ಹೆಚ್ಚು ಜನಪ್ರಿಯತೆ ಪಡೆದಿರುವ ಜಪಾನ್ ಮೂಲದ ದ್ವಿಚಕ್ರ ವಾಹನ ತಯಾರಿಕ ಸಂಸ್ಥೆಯಾಗಿರುವ ಯಮಹಾ, ಭಾರತಕ್ಕೆ ಅಗ್ಗದ ಪ್ರಯಾಣಿಕ ಬೈಕ್ ಬಿಡುಗಡೆ ಮಾಡುವ ಯೋಜನೆ ಹೊಂದಿದೆ.

ಯಮಹಾ ಅಗ್ಗದ ಪ್ರಯಾಣಿಕ ಬೈಕ್ ನ ಹೆಸರು ಏನೆಂಬುದು ಇನ್ನಷ್ಟೇ ನಿಗದಿಯಾಗಬೇಕಾಗಿದೆ. ಹಾಗಿದ್ದರೂ ಇದು ಸಂಪೂರ್ಣವಾಗಿಯೂ ದೇಶದ ಮಧ್ಯಮ ವರ್ಗದವರನ್ನು ಗುರಿಯಾಗಿರಿಸಲಿದೆ. ಅಂತೆಯೇ ದೇಶದ ಅಗ್ರ ದ್ವಿಚಕ್ರ ಸಂಸ್ಥೆಯಾಗಿರುವ ಹೀರೊ ಮೊಟೊಕಾರ್ಪ್ ಹಾಗೂ ಹೋಂಡಾ ಮೋಟಾರ್ ಸೈಕಲ್ಸ್ ಗೆ ನಿಕಟ ಸ್ಪರ್ಧೆ ಓಡ್ಡಲಿದೆ.

ನೂತನ ಬೈಕ್ 110ಸಿಸಿ, 4 ಸ್ಟ್ರೋಕ್ ಡಿಒಎಚ್ ಸಿ ಏರ್ ಕೂಲ್ಡ್ ಎಂಜಿನ್ ನಿಂದ ನಿಯಂತ್ರಿಸಲ್ಪಡಲಿದ್ದು, 7 ಅಶ್ವಶಕ್ತಿ (8 ತಿರುಗುಬಲ) ಉತ್ಪಾದಿಸಲಿದೆ. ಹಾಗೆಯೇ 4 ಸ್ಪೀಡ್ ಗೇರ್ ಬಾಕ್ಸ್ ಇದರಲ್ಲಿರಲಿದೆ.

ಪ್ರಸ್ತುತ ಮಾರುಕಟ್ಟೆಯಲ್ಲಿ ಕ್ರೂಕ್ಸ್, ವೈಬಿಆರ್ 110 ಮತ್ತು ವೈಬಿಆರ್ 125ಗಳೆಂಬ ಬಜೆಟ್ ಬೈಕ್ ಗಳನ್ನು ಯಮಹಾ ಹೊಂದಿದೆ. ಕೈಗೆಟುಕುವ ದರಗಳಲ್ಲಿ ನೂತನ ಬೈಕ್ ನ ಆಗಮನದೊಂದಿಗೆ ಎಂಟ್ರಿ ಲೆವೆಲ್ ವಿಭಾಗದಲ್ಲಿ ಯಮಹಾ ತನ್ನ ಸಾನಿಧ್ಯವನ್ನು ಇನ್ನಷ್ಟು ಬಲಪಡಿಸುವ ಯೋಜನೆ ಹೊಂದಿದೆ.