ಬಿಎಸ್‌ಆರ್ ಪಕ್ಷ; ರಾಮುಲು 'ಹಮ್ಮರ್' ಹಮ್ಮು ಬಿಮ್ಮು

Updated: Saturday, December 15, 2012, 12:10 [IST]

ಕರ್ನಾಟಕದಲ್ಲಿ ಚುನಾವಣೆ ಕಾವು ದಿನದಿಂದ ದಿನಕ್ಕೆ ಏರುತ್ತಲೇ ಇವೆ. ಇದೀಗಷ್ಟೇ ನೂತನ ಪಕ್ಷ ಕಟ್ಟಿಕೊಂಡಿರುವ ಮಾಜಿ ಮುಖ್ಯಮಂತ್ರಿ ಬಿ. ಎಸ್. ಯಡಿಯೂರಪ್ಪ ರಾಜ್ಯ ರಾಜಕೀಯದಲ್ಲಿ ಬಿರುಗಾಳಿಯೆಬ್ಬಿಸಿದ್ದರು.

ಇದಾದ ಬೆನ್ನಲ್ಲೇ ಬಳ್ಳಾರಿ ರೆಡ್ಡಿ ಗಣಿ ಧನಿಗಳ ಚುನಾವಣೆ ಪ್ರಚಾರಕ್ಕೆ ಬಿಸಿ ಮುಟ್ಟಿದೆ. ಅಕ್ರಮ ಗಣಿಗಾರಿಕೆ ಪ್ರಕರಣದಲ್ಲಿ ಸಿಬಿಐ ಜಾರಿ ನಿರ್ದೇಶನಾಲಯಗಳಿಂದ ತೀವ್ರ ಸಂಕಷ್ಟಕ್ಕೆ ಸಿಲುಕಿದ್ದ ಬಳ್ಳಾರಿ ಗಣಿಧನಿಗಳು ಅಷ್ಟು ಬೇಗ ಸೋಲೊಪ್ಪಿಕೊಳ್ಳಲು ಸಿದ್ಧರಿಲ್ಲ.

ಇದರಿಂದಾಗಿ ಚುನಾವಣೆಗೆ ಸಕಲ ರೀತಿಯ ಸಿದ್ಧತೆಗಳನ್ನು ಮಾಡಿಕೊಳ್ಳಲಾಗುತ್ತಿದೆ. ಈಗಾಗಲೇ ಬಿಸ್ಸಾರ್ ಕಾಂಗ್ರೆಸ್ ಎಂಬ ಪ್ರತ್ಯೇಕ ಪ್ರಾದೇಶಿಕ ಪಕ್ಷ ಕಟ್ಟಿರುವ ಶ್ರೀರಾಮುಲು ನೂತನ ರಾಜಕೀಯ ಸವಾಲುಗಳನ್ನು ಎದುರಿಸಲು ಸಿದ್ಧರಾಗಿದ್ದಾರೆ.

ಮೂಲಗಳ ಪ್ರಕಾರ ಶ್ರೀರಾಮುಲು ಅದ್ಧೂರಿ ಪ್ರಚಾರಕ್ಕೆ ಕಾರೊಂದರ ಎಂಟ್ರಿಯಾಗುತ್ತಿದೆ. ಅದು ಅಂತಿಥ ಕಾರಲ್ಲ. ದೇಶದ ಕೆಲವೇ ಕೆಲವು ಗಣ್ಯ ವ್ಯಕ್ತಿಗಳ ಬಳಿಯಿರುವ ದುಬಾರಿ 'ಹಮ್ಮರ್' ಕಾರು. ಭಾರತ ಕ್ರಿಕೆಟ್ ತಂಡದ ನಾಯಕ ಮಹೇಂದ್ರ ಸಿಂಗ್ ಧೋನಿ, ಸ್ಪಿನ್ ಮಾಂತ್ರಿಕ ಹರಭಜನ್ ಸಿಂಗ್ ಹಾಗೂ ಬಾಲಿವುಡ್ ಸ್ಟಾರ್ ಸುನಿಲ್ ಶೆಟ್ಟಿ ಅವರಂತಹ ಸೆಲೆಬ್ರಿಟಿಗಳ ಬಳಿ ಮಾತ್ರ ಹಮ್ಮರ್ ಕಾರಿದೆ.

ಇನ್ನು ಹೆಚ್ಚು ಹೇಳಬೆಂಕೆಂದರೆ ಹಮ್ಮರ್ ಕಾರು ಭಾರತದಲ್ಲಿ ಉತ್ಪಾದನೆಯಾಗುತ್ತಿಲ್ಲ. ಇದನ್ನು ಅಲ್ಲಿ ದೂರದ ಅಮೆರಿಕದಿಂದ ಆಮದು ಮಾಡಿಕೊಳ್ಳಬೇಕಾಗಿದೆ. ಹಾಗಾಗಿ ಅತ್ಯಾಧುನಿಕ ಸೌಲಭ್ಯಗಳುಳ್ಳ ಈ ಹಮ್ಮರ್ ಕಾರನ್ನು ಪ್ರಚಾರಕ್ಕಾಗಿ ಬಳಸಲು ಶ್ರೀರಾಮುಲುಗೆ ದುಡ್ಡು ಎಲ್ಲಿಂದ ಬಂತು ಎಂಬುದಕ್ಕೆ ಜನಸಾಮಾನ್ಯರು ಉತ್ತರ ನೀಡಬೇಕಾಗಿದೆ.

ಏನೇ ಆದರೂ ಯಡಿಯೂರಪ್ಪ ತಮ್ಮ ಪ್ರಚಾರಕ್ಕೆ ದುಬಾರಿ ಪ್ರಾಡೋ ಕಾರನ್ನು ಬಳಸಬಹುದಾದರೆ ಶ್ರೀರಾಮುಲುಗೆ ಯಾಕೆ ದುಬಾರಿ ಹಮ್ಮರ್ ಬಳಸಬಾರದು? ಈ ಪರಿ ಇದೇ ರೀತಿ ಮುಂದುವರಿದರೆ ಇನ್ನಿತರ ರಾಜಕೀಯ ಪಕ್ಷಗಳ ನಾಯಕರು ಇನ್ಯಾವ ಕಾರು ಬಳಸಲಿದ್ದಾರೆ ಎಂಬುದಕ್ಕೆ ಮುಂದಿನ ದಿನಗಳಲ್ಲಿ ಉತ್ತರ ದೊರಕಲಿದೆ.

ಸದ್ಯ ಹೈದರಾಬಾದ್‌ನ ಚಂಚಲಗೂಡ ಜೈಲಿನಲ್ಲಿರುವ ಮಾಜಿ ಸಚಿವ ಗಾಲಿ ಜನಾರ್ದನ ರೆಡ್ಡಿ ಅವರಿಂದ ಶ್ರೀರಾಮುಲು ಅರಿಗೆ ಸ್ಪಷ್ಟ ಸಂದೇಶ ಬಂದಿರುವುದು ನಿಜ. ಇದರಂತೆ ಪಕ್ಷದ ಸಂಘಟನಾ ಚಟುವಟಿಕೆಗಳಿಗೆ ಇನ್ನಷ್ಟು ಚುರುಕು ಮುಟ್ಟಿದೆ.

ಇದೇ ಸಂದರ್ಭದಲ್ಲಿ ಶ್ರೀರಾಮುಲು ತಮ್ಮ ಪ್ರಚಾರಕ್ಕಾಗಿ ಹೆಲಿಕಾಪ್ಟರ್‌ವೊಂದರನ್ನು ಗುತ್ತಿಗೆ ಆಧಾರದಲ್ಲಿ ಪಡೆದುಕೊಂಡಿರುವುದರ ಬಗ್ಗೆಯೂ ಮಾಹಿತಿ ಬಂದಿದೆ. ಒಟ್ಟಾರೆಯಾಗಿ ರಾಜ್ಯ ರಾಜಕೀಯದಲ್ಲಿ ಏನೆಲ್ಲ ಬೆಳವಣಿಗೆ ನಡೆಯಲಿದೆ ಎಂಬುದಕ್ಕೆ ಮುಂದಿನ ದಿನಗಳಲ್ಲಿ ಉತ್ತರ ಸಿಗಲಿದೆ.