ಕರೋನಾ ವೈರಸ್ ಎಫೆಕ್ಟ್: ವಾರಂಟಿ ಅವಧಿ ವಿಸ್ತರಿಸಿದ ಫೋರ್ಡ್ ಇಂಡಿಯಾ

ಈಗ ಫೋರ್ಡ್ ಕಂಪನಿಯು ಸಹ ತನ್ನ ಗ್ರಾಹಕರಿಗೆ ಹಲವು ಸೌಲಭ್ಯಗಳನ್ನು ನೀಡಲು ಮುಂದಾಗಿದೆ. ಮಾರ್ಚ್ 15ರಿಂದ ಮೇ 30ರವರೆಗೆ ವಾರಂಟಿ ಅವಧಿ ಮುಗಿದ ಫೋರ್ಡ್ ಕಂಪನಿಯ ಗ್ರಾಹಕರಿಗೆ, ಈ ಅವಧಿಯನ್ನು ಜೂನ್ 30ರವರೆಗೆ ವಿಸ್ತರಿಸಲಾಗಿದೆ.

ಇನ್ನೂ ತಮ್ಮ ವಾರಂಟಿ ಅವಧಿಯನ್ನು ಹೆಚ್ಚಿಸಿಕೊಳ್ಳಲು ಬಯಸುತ್ತಿರುವವರಿಗೆ ಜೂನ್ 30ರೊಳಗೆ ತಮ್ಮ ವಾರಂಟಿಯನ್ನು ವಿಸ್ತರಿಸಲು ಅವಕಾಶ ನೀಡಲಾಗುವುದು.

ಈ ಅವಧಿಯಲ್ಲಿ ಉಚಿತ ಕಾರು ಸರ್ವಿಸ್ ಗಳನ್ನು ಹೊಂದಿದ್ದವರಿಗೆ ಜೂನ್ 30ರವರೆಗೆ ಗಡುವನ್ನು ನೀಡಲಾಗಿದೆ. ಇದರಿಂದಾಗಿ ಉಚಿತ ಸರ್ವಿಸ್ ಅವಧಿ ಮುಗಿಯುತ್ತದೆ ಎಂಬ ಆತಂಕದಲ್ಲಿದ್ದ ಜನರು ನಿಟ್ಟುಸಿರು ಬಿಡುವಂತಾಗಿದೆ.

ಫೋರ್ಡ್ ಕಂಪನಿಯು ಜೂನ್ 30ರವರೆಗೆ ತಮ್ಮ ಕಾರುಗಳನ್ನು ಬುಕ್ಕಿಂಗ್ ಮಾಡುವ ಗ್ರಾಹಕರಿಗೆ ಕಾರುಗಳನ್ನು ವಿತರಿಸಲಿದೆ. ಬುಕ್ಕಿಂಗ್ ಹಾಗೂ ವೇಟಿಂಗ್ ಅವಧಿ ಹೆಚ್ಚಾದರೂ ಕಾರುಗಳನ್ನು ವಿತರಿಸಲಾಗುವುದು.

ಗ್ರಾಹಕರ ಯಾವುದೇ ಪ್ರಶ್ನೆಗಳಿಗೆ ಮಾಹಿತಿ ನೀಡುವ ಸಲುವಾಗಿ ತನ್ನ ಗ್ರಾಹಕ ಸೇವಾ ಕೇಂದ್ರವನ್ನು ದಿನದ 24 ಗಂಟೆಗಳ ಕಾಲ ತೆರೆಯುವುದಾಗಿ ಫೋರ್ಡ್ ಕಂಪನಿ ತಿಳಿಸಿದೆ. ಈ ಕೇಂದ್ರದಲ್ಲಿ ಫೋನ್, ಸಾಮಾಜಿಕ ನೆಟ್‌ವರ್ಕ್ ಹಾಗೂ ಇ-ಮೇಲ್ ಮೂಲಕ ಮಾತುಕತೆ ನಡೆಸಬಹುದಾಗಿದೆ.

ಇದರ ಜೊತೆಗೆ ಫೋರ್ಡ್ ಕಂಪನಿಯು ಎಮರ್ಜೆನ್ಸಿ ರೋಡ್ ಸೈಡ್ ಅಸಿಸ್ಟೆನ್ಸ ಜೊತೆಗೆ 24 ಗಂಟೆಗಳ ಸರ್ವಿಸ್ ನೀಡುತ್ತದೆ. ಲಾಕ್ ಡೌನ್ ಮುಗಿಯುವವರೆಗೂ ತನ್ನ ಗ್ರಾಹಕರಿಗೆ ಎಮರ್ಜೆನ್ಸಿ ರೋಡ್ ಸೈಡ್ ಅಸಿಸ್ಟೆನ್ಸ ನೀಡಲಾಗುವುದು ಎಂದು ಫೋರ್ಡ್ ತಿಳಿಸಿದೆ.

ಗ್ರಾಹಕ ಸೇವಾ ಕೇಂದ್ರದಲ್ಲಿ ಯಾವುದೇ ಸಮಯದಲ್ಲಿ ವಾರಂಟಿ ಅವಧಿ, ವಾರಂಟಿ ವಿಸ್ತರಣೆ, ಉಚಿತ ಸರ್ವಿಸ್ ಹಾಗೂ ಎಮರ್ಜೆನ್ಸಿ ರೋಡ್ ಸೈಡ್ ಅಸಿಸ್ಟೆನ್ಸ ಬಗ್ಗೆ ಮಾಹಿತಿ ಪಡೆಯಬಹುದು ಎಂದು ಫೋರ್ಡ್ ಇಂಡಿಯಾ ಕಂಪನಿ ತಿಳಿಸಿದೆ.