ಭಾರತೀಯ ವಾಹನ ಪ್ರೇಮಿಗಳಿಗೆ ಹ್ಯುಂಡೈ ಮೋಸ ?

By Nagaraja

Updated: Saturday, October 15, 2016, 13:39 [IST]

ಭಾರತದ ಎರಡನೇ ಅತಿ ದೊಡ್ಡ ಪ್ರಯಾಣಿಕ ಕಾರು ಸಂಸ್ಥೆಯಾಗಿರುವ ದಕ್ಷಿಣ ಕೊರಿಯಾ ಮೂಲದ ಹ್ಯುಂಡೈ ಮೋಟಾರು ಇಂಡಿಯಾ ಲಿಟಿಮೆಡ್ ಸಂಸ್ಥೆಯಿಂದ ದೇಶದ ವಾಹನ ಪ್ರೇಮಿಗಳಿಗೆ ಭಾರಿ ನಿರಾಸೆಯ ಸುದ್ದಿಯೊಂದು ಕಾದಿದೆ. ಸಂಪೂರ್ಣ ವಿವರಗಳಿಗಾಗಿ ಲೇಖನದತ್ತ ಕಣ್ಣಾಯಿಸಿರಿ.

ವರ್ಷಾರಂಭದಲ್ಲಿ ನಡೆದ 2016 ಆಟೋ ಎಕ್ಸ್ ಪೋದಲ್ಲಿ ಭರ್ಜರಿ ಅನಾವರಣಗೊಂಡಿರುವ ಬಹುನಿರೀಕ್ಷಿತ ಐ30 ಪ್ರೀಮಿಯಂ ಹ್ಯಾಚ್ ಬ್ಯಾಕ್ ಕಾರು ನಿಕಟ ಭವಿಷ್ಯದಲ್ಲೇ ಭಾರತವನ್ನು ಪ್ರವೇಶಿಸುವ ನಿರೀಕ್ಷೆಯನ್ನಿಟ್ಟುಕೊಳ್ಳಲಾಗಿತ್ತು. ಆದರೆ ಈ ಎಲ್ಲ ವರದಿಗಳನ್ನು ಹ್ಯುಂಡೈ ಅಲ್ಲಗಳೆದಿದೆ.

ಹ್ಯುಂಡೈ ಭವಿಷ್ಯದ ಯೋಜನೆಯಲ್ಲಿ ಸಿ ಸೆಗ್ಮೆಂಟ್ ಐ30 ಹ್ಯಾಚ್ ಬ್ಯಾಕ್ ಕಾರನ್ನು ಭಾರತದಲ್ಲಿ ಬಿಡುಗಡೆ ಮಾಡುವ ಯಾವುದೇ ಯೋಜನೆಗಳಿಲ್ಲ. ಇದು ವಾಹನ ಪ್ರೇಮಿಗಳಲ್ಲಿ ನಿರಾಸೆಯನ್ನುಂಟು ಮಾಡಿದೆ.

ಸದ್ಯ ಮಾರುಕಟ್ಟೆಯಲ್ಲಿರುವ ಎರಡನೇ ತಲೆಮಾರಿನ ಐ20 ಹಾಗೂ ಐ20 ಆಕ್ಟಿವ್ ಹ್ಯಾಚ್ ಬ್ಯಾಕ್ ಕಾರುಗಳು 10 ಲಕ್ಷ ರು.ಗಳಷ್ಟು ಬೆಲೆ ಪರಿಧಿಯಲ್ಲಿ ಮಾರಾಟವಾಗುತ್ತಿದೆ. ಹಾಗಿರುವಾಗ ಇದಕ್ಕಿಂತಲೂ ಹೆಚ್ಚು ದುಬಾರಿ ಹ್ಯಾಚ್ ಬ್ಯಾಕ್ ಕಾರನ್ನು ಮಾರುಕಟ್ಟೆಗಿಳಿಸುವುದು ಸೂಕ್ತವಲ್ಲ ಎಂಬುದು ಹ್ಯುಂಡೈ ನಿಲುವಾಗಿದೆ.

ಭಾರತೀಯ ಗ್ರಾಹಕರು 10 ಲಕ್ಷಕ್ಕಿಂತಲೂ ಮೇಲ್ಪಟ್ಟ ಬೆಲೆ ಪರಿಧಿಯಲ್ಲಿ ಪ್ರೀಮಿಯಂ ಹ್ಯಾಚ್ ಬ್ಯಾಕ್ ಖರೀದಿಸಲು ಹಿಂದೇಟು ಹಾಕಲಿದ್ದಾರೆ. ಇದರ ಬದಲಾಗಿ ಹ್ಯುಂಡೈ ಕ್ರೆಟಾ ಹಾಗೂ ವೆರ್ನಾದಂತಹ ಹೆಚ್ಚು ಸ್ಥಳಾವಕಾಶಯುಕ್ತ ಕಾರುಗಳತ್ತ ಒಲವು ತೋರಲಿದ್ದಾರೆ.

ಭಾರತದಲ್ಲಿ ಬೆಲೆ ಪರಿಧಿ ಅತಿ ಮುಖ್ಯ ಘಟಕವೆನಿಸಲಿದೆ. ಅಲ್ಲದೆ ಹೆಚ್ಚೆಚ್ಚು ಗ್ರಾಹಕರನ್ನು ಆಕರ್ಷಿಸಲು ಆಟೋಮ್ಯಾಟಿಕ್ ಗೇರ್ ಬಾಕ್ಸ್ ಸಹ ಅಗತ್ಯವೆನಿಸುತ್ತದೆ.

ಭಾರತದಲ್ಲೀಗ ಹ್ಯುಂಡೈ ಐ20 ಆಟೋಮ್ಯಾಟಿಕ್ ಕಾರು ಒಂಬತ್ತು ಲಕ್ಷ ರು.ಗಳಷ್ಟು ದುಬಾರಿಯೆನಿಸುತ್ತದೆ. ಒಂದು ವೇಳೆ ಐ30 ಆಗಮಿಸಿದ್ದಲ್ಲಿ ಇದಕ್ಕಿಂತಲೂ ದುಬಾರಿಯೆನಿಸಲಿದೆ.

ನಿಸ್ಸಂಶಯವಾಗಿಯೂ ಪ್ರೀಮಿಯಂ ವಾಹನಗಳನ್ನು ಬಿಡುಗಡೆಗೊಳಿಸುವ ಹ್ಯುಂಡೈ ಆಸಕ್ತಿ ತೋರುತ್ತಿದೆ. ಮುಂಬರುವ ಟಕ್ಸನ್ ಇದಕ್ಕೆ ಸ್ಪಷ್ಟ ಉತ್ತರವಾಗಿದೆ. ಆದರೆ ಐ30 ಮಾತ್ರ ಸದ್ಯಕ್ಕೆ ಆಗಮನವಾಗುವ ಯಾವುದೇ ಸಾಧ್ಯತೆಗಳಿಲ್ಲ.