ಟಾಟಾ ಕ್ಸೆನನ್ ರೂಪ ಬದಲಾವಣೆ; 2017ರಲ್ಲಿ ಬಿಡುಗಡೆ ಭಾಗ್ಯ!

ಜಪಾನ್ ಮೂಲದ ಗುಣಮಟ್ಟದ ಇಸುಝು ಡಿ-ಮ್ಯಾಕ್ಸ್ ವಿಕ್ರಾಸ್ ಎಂಟ್ರಿಯೊಂದಿಗೆ ಟಾಟಾಗೆ ಕಠಿಣ ಸ್ಪರ್ಧೆಯು ಎದುರಾಗಿದೆ. ಇದರಿಂದಾಗಿ ಸದ್ಯ ಮಾರಾಟದಲ್ಲಿರುವ ಕ್ಸೆನನ್ ನಲ್ಲಿ ಹೆಚ್ಚಿನ ಬದಲಾವಣೆ ತರುವುದು ಅನಿವಾರ್ಯವೆನಿಸಿದೆ.

ಬಲ್ಲ ಮೂಲಗಳ ಪ್ರಕಾರ ಟಾಟಾ ಕ್ಸೆನನ್ ಟೆಸ್ಟಿಂಗ್ ಪ್ರಕ್ರಿಯೆ ಜೋರಾಗಿ ನಡೆಯುತ್ತಿದ್ದು, ಹೊರಮೈ ಸೇರಿದಂತೆ ಒಳಮೈಯಲ್ಲಿ ಗಮನಾರ್ಹ ಬದಲಾವಣೆಗಳು ಕಂಡುಬರಲಿದೆ.

ಎಂಜಿನ್ ಮಾನದಂಡಗಳಲ್ಲೂ ಬದಲಾವಣೆಯು ಸಾಧ್ಯತೆಯಿದೆ. ಸದ್ಯ ಮಾರಾಟದಲ್ಲಿರುವ ಕ್ಸೆನನ್ 2.2 ಲೀಟರ್ ಡೀಸೆಲ್ ಎಂಜಿನ್ ಪೆಡದಿದ್ದು, ಇದನ್ನು ವಿಶೇಷವಾಗಿ ಟ್ಯೂನ್ ಮಾಡುವ ಸಂಭವವಿದೆ.

ನೂತನ ಟಾಟಾ ಕ್ಸೆನನ್ ಪಿಕಪ್ ಟ್ರಾಕ್ 400 ಎನ್ ಎಂ ತಿರುಗುಬಲದಲ್ಲಿ 154 ಅಶ್ವಶಕ್ತಿ ಉತ್ಪಾದಿಸುವ ಸಾಧ್ಯತೆಯಿದ್ದು, ಆರು ಸ್ಪೀಡ್ ಆಟೋಮ್ಯಾಟಿಕ್ ಗೇರ್ ಬಾಕ್ಸ್ ಇದರಲ್ಲಿರಲಿದೆ. ಇದು ಇನ್ನಷ್ಟೇ ಬಿಡುಗಡೆಯಾಗಲಿರುವ ಟಾಟಾ ಹೆಕ್ಸಾ ಕಾರಿಗೆ ಸಮಾನವಾಗಿರಲಿದೆ.

ಆರಂಭದಲ್ಲಿ ಏಕಮಾತ್ರ ಕ್ಯಾಬಿನ್ ಆಯ್ಕೆಯ ಕ್ಸೆನನ್ ಮಾದರಿಯನ್ನು ಟಾಟಾ ಬಿಡುಗಡೆ ಮಾಡಲಿದೆ. ಇದು ಸರಿ ಸುಮಾರು ಎಂಟು ಲಕ್ಷ ರುಪಾಯಿಗಳಷ್ಟು ದುಬಾರಿಯೆನಿಸಲಿದೆ.

ಸದ್ಯ ಮಾರಾಟದಲ್ಲಿರುವ ಟಾಟಾ ಕ್ಸೆನನ್ ಟು ವೀಲ್ ಡ್ರೈವ್ ವೆರಿಯಂಟ್ ದೆಹಲಿ ಎಕ್ಸ್ ಶೋ ರೂಂ ಬೆಲೆಯ ಪ್ರಕಾರ 9.92 ಲಕ್ಷ ರು.ಗಳಷ್ಟು ಬೆಲೆ ಬಾಳುತ್ತದೆ. ಹಾಗೆಯೇ ಟಾಟಾ ಕ್ಸೆನನ್ ಫೋರ್ ವೀಲ್ ಡ್ರೈವ್ ವೆರಿಯಂಟ್ 11 ಲಕ್ಷ ರು.ಗಳಷ್ಟು ದುಬಾರಿಯೆನಿಸಿದೆ.

ನವೀಕೃತ ಫ್ರಂಟ್ ಗ್ರಿಲ್, ಪರಿಷ್ಕೃತ ಫ್ರಂಟ್ ಬಂಪರ್ ಸೇರಿದಂತೆ ಕಾರಿನೊಳಗೆ ಪ್ರಯಾಣಿಕ ವಾಹನಗಳಿಗೆ ತಕ್ಕುದಾಗಿ ಮನರಂಜನಾ ವೈಶಿಷ್ಟ್ಗಗಳನ್ನು ಖಾತ್ರಿಪಡಿಸಲಾಗುವುದು.

ಅಂದ ಹಾಗೆ ನೂತನ ಕ್ಸೆನನ್ ಮಾರುಕಟ್ಟೆಯಲ್ಲಿ ಇಸುಝು ಡಿ ಮ್ಯಾಕ್ಸ್ ವಿ ಕ್ರಾಸ್ ಮತ್ತು ಮಹೀಂದ್ರ ಸ್ಕಾರ್ಪಿಯೊ ಗೇಟ್ ವೇ ಮುಂತಾದ ಮಾದರಿಗಳಿಗೆ ಪ್ರತಿಸ್ಪರ್ಧೆಯನ್ನು ಒಡ್ಡಲಿದೆ.