2017 ಕೆಟಿಎಂ ಡ್ಯೂಕ್ 390 ಟೆಸ್ಟಿಂಗ್ ವೇಳೆ ರಹಸ್ಯ ಚಿತ್ರಗಳು ಲೀಕ್!

ಎರಡನೇ ತಲೆಮಾರಿನ ಕೆಟಿಎಂ ಡ್ಯೂಕ್ 390 ಗಮನಾರ್ಹ ಬದಲಾವಣೆಗಳನ್ನು ಪಡೆದುಕೊಂಡಿದ್ದು, ಪ್ರಸಕ್ತ ಸಾಲಿನಲ್ಲೇ ಜಾಗತಿಕ ಮಾರುಕಟ್ಟೆಗೆ ಎಂಟ್ರಿ ಕೊಡಲಿದೆ.

ನೂತನ ಕೆಟಿಎಂ ಬೈಕ್ ನಲ್ಲಿ ಕಂಡುಬಂದಿರುವ ಪ್ರಮುಖ ಬದಲಾವಣೆಯೆಂದರೆ ಹೊಸತಾದ ಟ್ವಿನ್ ಹೆಡ್ ಲ್ಯಾಂಪ್, ಪರಿಷ್ಕೃತ ಮತ್ತು ವರ್ಧಿತ ಇಂಧನ ಟ್ಯಾಂಕ್, ಪರಿಷ್ಕೃತ ಫ್ರೇಮ್ ಮತ್ತು ಹೊಸ ಸ್ವಿಚ್ ಗೇರ್ ಗಳಾಗಿವೆ.

ಎಂಜಿನ್ ತಾಂತ್ರಿಕತೆಯಲ್ಲೂ ಟ್ಯೂನ್ ಮಾಡುವ ಸಾಧ್ಯತೆಯಿದ್ದು, ನೂತನ ಮಾದರಿಯು 373.27 ಸಿಸಿ ಸಿಂಗಲ್ ಸಿಲಿಂಡರ್ ಲಿಕ್ವಿಡ್ ಕೂಲ್ಡ್ ಎಂಜಿನ್ ನಿಯಂತ್ರಿಸಲ್ಪಡಲಿದೆ. ಇದು 35 ಎನ್ ಎಂ ತಿರುಗುಬಲದಲ್ಲಿ 44 ಅಶ್ವಶಕ್ತಿಯನ್ನು ಉತ್ಪಾದಿಸಲಿದೆ.

ತನ್ಮೂಲಕ ಹಿಂದಿನ ಮಾದರಿಗಿಂತಲೂ ಹೆಚ್ಚು ಶಕ್ತಿಶಾಲಿ ಎನಿಸಿಕೊಳ್ಳಲಿದೆ. ಅಲ್ಲದೆ ರೈಡ್-ಬೈ-ವೈರ್ ತಂತ್ರಜ್ಞಾನದೊಂದಿಗೂ ಕೂಡಿರಲಿದೆ.

ಇನ್ನುಳಿದಂತೆ ಎಂಜಿನ್ ಸೆಕೆಂಡರ್ ಕೌಂಟರ್-ಬಾಲನ್ಸರ್ ಶಾಫ್ಟ್, ಇಸಿಯು ಹಾಗೂ ಕೂಲಿಂಗ್ ಸಿಸ್ಟಂಗಳಲ್ಲೂ ಸುಧಾರಣೆ ಕಂಡುಬರುವ ಸಾಧ್ಯತೆಯಿದೆ.

ನವೆಂಬರ್ ತಿಂಗಳಲ್ಲಿ ನಡೆಯಲಿರುವ 2016 ಮಿಲಾನ್ ಮೋಟಾರು ಶೋದಲ್ಲಿ ಪಾದಾರ್ಪಣೆಗೈಯಲಿರುವ 2017 ಕೆಟಿಎಂ ಡ್ಯೂಕ್ 390, ಭಾರತಕ್ಕೆ 2017ನೇ ಸಾಲಿನ ದ್ವಿತಿಯಾರ್ಧದಲ್ಲಷ್ಟೇ ಆಗಮಿಸುವ ಸಾಧ್ಯತೆಯಿದೆ.