ಬಜಾಜ್ ಡೊಮಿನರ್ 400 ಟೀಸರ್ ಚಿತ್ರ, ಮೈಕ್ರೋ ವೆಬ್ ಸೈಟ್ ಲೈವ್

'ಬಿಗ್ ಬೈಕ್ ಫಾರ್ ಬಿಗ್ ಬಾಯ್ಸ್' ಎಂಬ ಧ್ಯೇಯ ವಾಕ್ಯದೊಂದಿಗೆ ಬಜಾಜ್ ಡೊಮಿನರ್ 400 ರಸ್ತೆಗಿಳಿಯಲಿದೆ. ಅಲ್ಲದೆ ಯಾವತ್ತೂ ಬೈಕ್ ರೈಡಿಂಗ್ ಸಮಾನವಾಗಿರಲ್ಲ ಎಂಬುದನ್ನು ಉಲ್ಲೇಖಿಸಿದೆ.

ಇದೇ ಸಂದರ್ಭದಲ್ಲಿ ಡೊಮಿನರ್ 400 ಬೈಕ್ ಲಾಂಛನವನ್ನು ಚಿತ್ರದ ಮೂಲಕ ಸಂಸ್ಥೆಯು ಬಿಡುಗಡೆ ಮಾಡಿದೆ. ಇದು ಕೂಡಾ ಹೆಚ್ಚಿನ ನಿರೀಕ್ಷೆಯನ್ನುಂಟು ಮಾಡಿದೆ.

ಡಿಸೆಂಬರ್ 15 ರಂದು ಬಿಡುಗಡೆಯಾಗಲಿರುವ ಡೊಮಿನರ್ 400 ಬೈಕ್ ನ ಟೀಸರ್ ಚಿತ್ರವನ್ನು ಬಿಡುಗಡೆ ಮಾಡಲಾಗಿದೆ. ಇದೇ ಸಂದರ್ಭದಲ್ಲಿ ಮೈಕ್ರೋ ವೆಬ್ ಸೈಟ್ ಲಾಂಚ್ ಮಾಡಲಾಗಿದೆ.

ಅಂತೆಯೇ ಸಾಮಾಜಿಕ ಜಾಲತಾಣಗಳಾದ ಟ್ವಿಟರ್ ಮತ್ತು ಫೇಸ್ ಬುಕ್ ಗಳಲ್ಲಿ ಡೊಮಿನರ್ ವಿಶೇಷ ಪುಟವನ್ನು ತೆರೆದುಕೊಳ್ಳಲಾಗಿದ್ದು, ಈ ಬಹುನಿರೀಕ್ಷಿತ ಬೈಕ್ ಗೆ ಸಂಬಂಧಿಸಿದ ಮಾಹಿತಿಯನ್ನು ಕಲೆ ಹಾಕಬಹುದಾಗಿದೆ.

ದೇಶದ ನಂ.1 ಕ್ರೀಡಾ ಬೈಕ್ ತಯಾರಕರಾದ ಬಜಾಜ್ ದೇಶದಲ್ಲಿ ಬಿಡುಗಡೆ ಮಾಡುತ್ತಿರುವ ಅತ್ಯಂತ ಶಕ್ತಿಶಾಲಿ ಬೈಕ್ ಇದಾಗಿದೆ.

ಕೆಟಿಎಂಗೆ ಸಮಾನವಾದ 373 ಸಿಸಿ ಲಿಕ್ವಿಡ್ ಕೂಲ್ಡ್ ಸಿಂಗಲ್ ಸಿಲಿಂಡರ್ ಎಂಜಿನ್ ಇದರಲ್ಲಿ ಬಳಕೆಯಾಗಲಿದ್ದು 35 ಅಶ್ವಶಕ್ತಿಯನ್ನು ಉತ್ಪಾದಿಸಲಿದೆ.

ಇದೇ ಮೊದಲ ಬಾರಿಗೆ ಎಲ್ ಇಡಿ ಹೆಡ್ ಲ್ಯಾಂಪ್, ಆ್ಯಂಟಿ ಲಾಕ್ ಬ್ರೇಕಿಂಗ್ ಸಿಸ್ಟಂ, ಸಂಪೂರ್ಣ ಡಿಜಿಟಲ್ ಹಾಗೂ ವಿಭಜಿತ ಇನ್ಸ್ಟ್ರುಮೆಂಟ್ ಕ್ಲಸ್ಟರ್, ಬ್ಯಾಕ್-ಲಿಟ್ ಸ್ವಿಚ್ ಗೇರ್ ಹಾಗೂ ಮೊನೊಶಾಕ್ ಸಸ್ಪೆನ್ಷನ್ ಸೌಲಭ್ಯವೂ ಲಭ್ಯವಾಗಲಿದೆ.

ಕ್ರೂಸರ್ ಸ್ಪೋರ್ಟ್ ಮೋಟಾರ್ ಸೈಕಲ್ ಆಗಿರುವ ಬಜಾಜ್ ಡೊಮಿನರ್ 400, ಅತ್ಯುತ್ತಮ ನಿರ್ವಹಣೆ ಜೊತೆಗೆ ಟೂರಿಂಗ್ ಅನುಕೂಲಕತೆಯನ್ನು ಕಾಪಾಡಿಕೊಳ್ಳಲಿದೆ.

ಸ್ಪಾನಿಶ್ ಪದ ಡೊಮಿನರ್ ಎಂಬುದು ಮೀರಿಸು ಅಥವಾ ಉತ್ಕೃಷ್ಟ ಶಕ್ತಿಯ ಅರ್ಥವನ್ನು ನೀಡುತ್ತಿದೆ.

ಪುಣೆ ತಳಹದಿಯ ಜನಪ್ರಿಯ ಬಜಾಜ್ ನಿರ್ಮಿಸುತ್ತಿರುವ ನೂತನ ಡೊಮಿನರ್ ಎರಡು ಲಕ್ಷ ಬೆಲೆ ಪರಿಧಿಯಲ್ಲಿ ಬಿಡುಗಡೆಯಾಗುತ್ತಿರುವುದು ಗಮನಾರ್ಹವೆನಿಸುತ್ತದೆ.

ಇದು ಪ್ರಮುಖವಾಗಿಯೂ ಮಾರುಕಟ್ಟೆಯಲ್ಲಿ ಸದ್ದು ಮಾಡುತ್ತಿರುವ ರಾಯಲ್ ಎನ್ ಫೀಲ್ಡ್ ಕ್ಲಾಸಿಕ್ 350 ಜೊತೆಗೆ ಮಹೀಂದ್ರ ಮೊಜೊ ಮತ್ತು ಕೆಟಿಎಂ ಡ್ಯೂಕ್ 200 ಮಾದರಿಗಳಿಗೆ ಪ್ರತಿಸ್ಪರ್ಧೆಯನ್ನು ಒಡ್ಡಲಿದೆ.

ಇದಕ್ಕೂ ಮೊದಲು ನವೆಂಬರ್ 18ರಂದು ಡೊಮಿನರ್ 400 ಚೊಚ್ಚಲ ಬೈಕನ್ನು ಚಕನ್ ಘಟಕದಲ್ಲಿ ಮಹಿಳಾ ಎಂಜಿನಿಯರ್ ಗಳ ಸಾರಥ್ಯದಲ್ಲಿ ಹೊರತರಲಾಗಿತ್ತು.

2014 ಆಟೋ ಎಕ್ಸ್ ಪೋದಲ್ಲಿ ಬಜಾಜ್ ಕ್ರೂಸರ್ ಸ್ಪೋರ್ಟ್ 400 ಬೈಕ್ ಮೊದಲ ಬಾರಿಗೆ ಅನಾವರಣಗೊಳಿಸಲಾಗಿತ್ತು. ತದಾ ಬಳಿಕ ವ್ಯಾಂಟೇಜ್ ಸ್ಪೋರ್ಟ್ 400 ಹಾಗೂ ಕ್ರೆಟೊಸ್ 400 ಎಂದು ಹೆಸರಿಸಿಕೊಂಡರೂ ಕೊನೆಗೆ ಡೊಮಿನರ್ ನಲ್ಲಿ ಅಂತ್ಯ ಕಂಡಿದೆ.