ಮಾರುತಿ ಎಸ್ಎಕ್ಸ್4 ಡೀಸಲ್, 7.74 ಲಕ್ಷ ರೂಪಾಯಿಯ ಕಾರ್

ಹೊಸ ಎಸ್ಎಕ್ಸ್4 ಶಕ್ತಿಶಾಲಿ ಸೂಪರ್ ಟರ್ಬೊ ಡಿಡಿಐಎಸ್ ಎಂಜಿನ್ ಹೊಂದಿದೆ. "ನೂತನ ಡೀಸಲ್ ತಂತ್ರಜ್ಞಾನದೊಂದಿಗೆ ಬಂದಿರುವ ಎಸ್ಎಕ್ಸ್4 ಅತ್ಯಧಿಕ ಶಕ್ತಿ ಮತ್ತು ಅತ್ಯುತ್ತಮ ಕಾರ್ಯ ನಿರ್ವಹಣೆಗೆ ಮತ್ತೊಂದು ಹೆಸರಾಗಿದೆ. ಎಸ್ಎಕ್ಸ್4 ಡೀಸಲ್ ಮಿತ ವೆಚ್ಚದ ಆರಾಮದಾಯಕತೆಯ ಡ್ರೈವಿಂಗ್ ಅನುಭವವನ್ನು ಗ್ರಾಹಕರಿಗೆ ನೀಡುತ್ತದೆ" ಎಂದು ಮಾರುತಿ ಸುಜುಕಿ ಇಂಡಿಯಾದ ವ್ಯವಸ್ಥಾಪಕ ನಿರ್ದೇಶಕ ಮತ್ತು ಮುಖ್ಯಕಾರ್ಯನಿರ್ವಹಣಾಧಿಕಾರಿ ಶಿಂಝೊ ನಕಾನಶಿ ಹೇಳಿದ್ದಾರೆ.

ಹೊಸ ಡೀಸಲ್ ಕಾರ್ ಕಡಿಮೆ ಪರಿಸರ ಮಾಲಿನ್ಯ ಉಂಟುಮಾಡುವ ಕಾರ್ ಕೂಡ ಹೌದು. ಕಂಪನಿಯ ಇತರ ಡೀಸಲ್ ಕಾರ್ ಗಳೊಂದಿಗೆ ನೂತನ ಎಸ್ಎಕ್ಸ್4 ಗೆಲುವು ಪಡೆಯುವ ನಿರೀಕ್ಷೆಯನ್ನು ಅವರು ವ್ಯಕ್ತಪಡಿಸಿದ್ದಾರೆ. ಕಂಪನಿಯ ಸ್ವಿಫ್ಟ್ ಡಿಜೈರ್ ಮತ್ತು ರಿಟ್ಜ್ ಕೂಡ ಡೀಸಲ್ ಆವೃತ್ತಿಗಳಲ್ಲಿ ದೊರಕುತ್ತವೆ. ಎಸ್ ಎಕ್ಸ್4 ಪೆಟ್ರೋಲ್ ಮತ್ತು ಡೀಸಲ್ ಮಾದರಿಗಳಲ್ಲೂ ದೊರಕುತ್ತದೆ. ನೂತನ ಡೀಸಲ್ ಆವೃತ್ತಿಯ ನೆರವಿನಿಂದ ಮಾರಾಟ ಪ್ರಮಾಣವೂ ಗಣನೀಯವಾಗಿ ಏರಿಕೆ ಕಾಣುವ ನಿರೀಕ್ಷೆಯನ್ನು ಕಂಪನಿ ವ್ಯಕ್ತಪಡಿಸಿದೆ.

ಕಂಪನಿಯ ಅಂದಾಜಿನ ಪ್ರಕಾರ ಈಗ ಎ3 ಸೆಗ್ಮೆಂಟ್ ನಲ್ಲಿ ತನ್ನ ಸೆಡಾನ್ ಕಾರ್ ಗಳಾದ ಎಸ್ಎಕ್ಸ್4 ಮತ್ತು ಡಿಜೈರ್ ಪ್ರತಿತಿಂಗಳಿಗೆ ಸುಮಾರು 30 ಸಾವಿರ ಯೂನಿಟ್ ಮಾರಾಟವಾಗುತ್ತಿದೆ. ಕಂಪನಿಗೆ ಎ3 ಸೆಗ್ಮೆಂಟ್ ನಲ್ಲಿ ಉತ್ತಮ ಅವಕಾಶವಿದ್ದು ಇದರಲ್ಲಿ ಶೇ. 30ರಷ್ಟು ಪಾಲನ್ನು ಹೊಂದಿದೆ ಎಂದು ಕಂಪನಿ ತಿಳಿಸಿದೆ.ಮಾರುತಿ ಎಸ್ಎಕ್ಸ್4 ಕಾರ್ ವಿಡಿಐ, ಝಡ್ ಡಿಐ ಮತ್ತು ಝಡ್ ಡಿಐ ಎಂಬ ಮೂರು ಆವೃತ್ತಿಗಳಲ್ಲಿ ದೊರಕುತ್ತಿದೆ.