ಸುನಾಮಿ ಪರಿಣಾಮ: ಭಾರತದ ಉತ್ಪಾದನೆಗೆ ಹೋಂಡಾ ಕೋಕ್!

ಹೋಂಡಾ ಮೋಟರ್ಸ್ ಭಾರತದ ಸಿಯೆಲ್ ಗ್ರೂಪ್ ನೊಂದಿಗೆ ಇಲ್ಲಿ ಜಂಟಿ ಉದ್ಯಮ ಹೊಂದಿದೆ. ಗ್ರೇಟರ್ ನೋಯ್ಡಾದಲ್ಲಿರುವ ತನ್ನ ಘಟಕದಲ್ಲಿ ಕಂಪನಿಯು ವರ್ಷಕ್ಕೆ ಸುಮಾರು ಒಂದು ಲಕ್ಷ ವಾಹನಗಳನ್ನು ಉತ್ಪಾದಿಸುತ್ತಿದೆ. "ಏಪ್ರಿಲ್ ಅಂತ್ಯದವರೆಗೆ ನಾವು ಉತ್ಪಾದನೆ ಮುಂದುವರೆಸಲಿದ್ದೇವೆ. ನಂತರ ಸ್ವಲ್ಪ ದಿನ ವಾಹನ ಉತ್ಪಾದನೆಯನ್ನು ನಿಲ್ಲಿಸಲಿದ್ದೇವೆ. ಬಿಡಿಭಾಗಗಳ ಪೂರೈಕೆ ಸಂಬಂಧಿತ ಸಮಸ್ಯೆಗಳಿಂದ ಪಾರಾಗಲು ಕಂಪನಿಯು ಈ ನಿರ್ಧಾರಕ್ಕೆ ಬಂದಿದೆ" ಎಂದು ಹೋಂಡಾ ಸಿಯೆಲ್ ಕಾರ್ಸ್ ಇಂಡಿಯಾ ಉಪಾಧ್ಯಕ್ಷರು ಹೇಳಿದ್ದಾರೆ.

ಈಗ ಕಂಪನಿಯ ಉತ್ಪಾದನೆಯು ಕಡಿಮೆಯಾಗಿದ್ದು ಪ್ರತಿತಿಂಗಳು ಸುಮಾರು 5 ಸಾವಿರದಷ್ಟು ವಾಹನಗಳನ್ನು ನೋಯ್ಡಾ ಘಟಕದಲ್ಲಿ ಉತ್ಪಾದಿಸುತ್ತಿದೆ. ಕಂಪನಿಯು ಎಂಜಿನ್ ಸೇರಿದಂತೆ ಹೆಚ್ಚಿನ ಬಿಡಿಭಾಗಗಳನ್ನು ಜಪಾನಿನಿಂದ ಆಮದು ಮಾಡಿಕೊಳ್ಳುತ್ತಿರುವುದರಿಂದ ಈಗ ಪೂರೈಕೆಯ ಕೊರತೆಯನ್ನು ಎದುರಿಸುತ್ತಿದೆ.