ಸ್ವಿಫ್ಟ್ ಇಂದು ಅನಾವರಣ, ಕ್ಷಣಗಣನೆ ಆರಂಭ

ಈಗಾಗಲೇ ರಸ್ತೆಯಲ್ಲಿ ಹಳೆಯ ಸ್ವಿಫ್ಟ್ ಮಾಡಿದ ಮೋಡಿ ಈಗ ಇತಿಹಾಸ. ರಸ್ತೆಯಲ್ಲಿ ಎಲ್ಲಿ ನೋಡಿದರೂ ಹೆಚ್ಚು ಸ್ವಿಫ್ಟ್ ಕಾರುಗಳೇ ಕಾಣಸಿಗುತ್ತಿವೆ. ಗ್ರಾಹಕರಿಗೆ ಇನ್ನಷ್ಟು ಉತ್ತಮ ಸ್ವಿಫ್ಟ್ ರೈಡಿಂಗ್ ಅನುಭವ ನೀಡುವ ಉದ್ದೇಶದಿಂದ ಕಂಪನಿಯು ಹಳೆಯ ಸ್ವಿಫ್ಟ್ ಉತ್ಪಾದನೆಯನ್ನು ಇತ್ತೀಚೆಗೆ ಸ್ಥಗಿತಗೊಳಿಸಿತ್ತು.

ನೂತನ ಸ್ವಿಫ್ಟ್ ಹೇಗಿರಲಿದೆ ಅನ್ನೋದು ತಿಳಿಯುವ ಮೊದಲೇ ಸಾಕಷ್ಟು ಬುಕ್ಕಿಂಗ್ ಆಗಿತ್ತು. ಇತ್ತೀಚೆಗೆ ಕಂಪನಿಯು ನೂತನ ಸ್ವಿಫ್ಟ್ ಕಾರಿನ ಚಿತ್ರವನ್ನು ಹೊರತಂದಿತ್ತು. ಒಂದು ಮೂಲದ ಪ್ರಕಾರ ಈಗಾಗಲೇ ನೂತನ ಸ್ವಿಫ್ಟ್ ಬುಕ್ಕಿಂಗ್ 45 ಸಾವಿರ ಯೂನಿಟ್ ಗಡಿ ದಾಟಿದೆಯಂತೆ.

ನೂತನ ಸ್ವಿಫ್ಟ್ ದರ ಹಳೆಯ ಸ್ವಿಫ್ಟ್ ಗಿಂತ ಕೊಂಚ ಹೆಚ್ಚಿರಲಿದೆ. ಇದರೊಂದಿಗೆ ಇಂಟಿರಿಯರ್ ಸ್ಥಳಾವಕಾಶ ಮತ್ತು ಕಾರ್ಯಕ್ಷಮತೆ ಹೆಚ್ಚಾಗಲಿದೆ. ಫೋರ್ಡ್ ಫಿಗೊ, ಫೋಕ್ಸ್ ವ್ಯಾಗನ್ ಪೊಲೊ ಮತ್ತು ಇತ್ತೀಚೆಗೆ ರಸ್ತೆಗಿಳಿದ ಟೊಯೊಟಾ ಎಟಿಯೋಸ್ ಲಿವಾ ಕಾರುಗಳಿಗೆ ನೂತನ ಸ್ವಿಫ್ಟ್ ಪ್ರಬಲ ಪೈಪೋಟಿ ನೀಡುವ ನಿರೀಕ್ಷೆಯಿದೆ.