ಅಮೆರಿಕನ್ನರಿಗೆ ಭಾರತದ ಕಾರುಗಳೆಂದರೆ ಅಲರ್ಜಿ!!

ಹೌದು, ಮಾರುಕಟ್ಟೆ ಸಂಶೋಧನಾ ಸಂಸ್ಥೆ ಜಿಎಫ್ ಕೆ ಆಟೋಮೋಟಿವ್ ಅಧ್ಯಯನ ಈ ವಿಷಯವನ್ನು ಬಹಿರಂಗಪಡಿಸಿದೆ. ಅಲ್ಲಿನವರಿಗೆ ಭಾರತದ ಕಾರುಗಳೆಂದರೆ ಹೆಚ್ಚು ಇಷ್ಟವಿಲ್ಲವಂತೆ.

ಸಮೀಕ್ಷೆಯಲ್ಲಿ ಭಾಗವಹಿಸಿದ ಶೇಕಡ 41ರಷ್ಟು ಅಮೆರಿಕದ ಯುವ ತಲೆಮಾರಿಗೆ ಭಾರತೀಯ ಕಾರು ಖರೀದಿಸುವ ಐಡಿಯಾವೇ ಇಲ್ಲವಂತೆ. ಆದರೂ ಶೇಕಡ 30ರಷ್ಟು ಜನರಿಗೆ ತುಸು ಆಸಕ್ತಿಯಿದೆ ಅನ್ನೋದೇ ಇಲ್ಲಿನ ಕಂಪನಿಗಳಿಗೆ ತುಸು ನೆಮ್ಮದಿ ಕೊಡೊ ಸಂಗತಿ.

ಭಾರತ ಮಾತ್ರವಲ್ಲ ಅಲ್ಲಿನವರಿಗೆ ಚೈನಿಸ್ ಕಾರುಗಳೂ ಇಷ್ಟವಿಲ್ಲವಂತೆ. ಚೀನಾದ ಬಿವೈಡಿ ಮತ್ತು ಚೆರ್ರಿ ಕಂಪನಿಗಳು ಈಗಾಗಲೇ ದೊಡ್ಡಣ್ಣನ ಊರಲ್ಲಿ ಕಾರು ಮಾರಾಟ ಮಾಡುತ್ತಿವೆ.

ಭಾರತದ ಕಾರುಗಳು ಇಂಧನ ದಕ್ಷತೆಯ ವಿಷ್ಯದಲ್ಲಿ ಅಮೆರಿಕದ ಜನರಿಗೆ ಇಷ್ಟವಾಗುತ್ತದೆ. ಆದರೆ ಇಂಟಿರಿಯರ್ ಸ್ಥಳಾವಕಾಶ ಇತ್ಯಾದಿಗಳು ಇಷ್ಟವಾಗುವುದಿಲ್ಲವಂತೆ.

ದೇಶದ ಕಾರು ಕಂಪನಿಗಳು ಜಾಗತಿಕ ವಾಹನ ಮಾರುಕಟ್ಟೆಯಲ್ಲಿ ಸಾಕಷ್ಟು ಪಾಲು ಪಡೆಯಲು ಹವಣಿಸುತ್ತಿವೆ. ಮಹೀಂದ್ರ ಈಗಾಗಲೇ ಅಮೆರಿಕದಲ್ಲಿ ಸ್ಪೋರ್ಟ್ಸ್ ಯುಟಿಲಿಟಿ ವೆಹಿಕಲ್ ತರುವುದಾಗಿ ಹೇಳಿದೆ. ಉತ್ತರ ಅಮೆರಿಕ ಕಾಂಟಿನೆಂಟಲ್ ನಲ್ಲಿ ಕಾರು ಮಾರಾಟ ಮಾಡಲು ನಮ್ಮ ದೇಶದ ಕಂಪನಿಗಳು ಅತೀವ ಉತ್ಸಾಹ ತೋರುತ್ತಿವೆ.

ಮತ್ತೆ ಅಮೆರಿಕದ ಜನರಿಗೆ ಇಷ್ಟವಾಗುವ ಕಾರುಗಳು ಯಾವುವು? ಅಧ್ಯಯನದ ಪ್ರಕಾರ ಅಮೆರಿಕನ್ನರಿಗೆ ಅಮೆರಿಕದ ಕಾರೇ ಹೆಚ್ಚು ಇಷ್ಟವಂತೆ. ನಂತರದ ಸ್ಥಾನ ಜರ್ಮನಿ, ಜಪಾನ್ ಮತ್ತು ಕೊರಿಯಾದ ಕಾರುಗಳಿಗಂತೆ. ಟಾಟಾ ಮೋಟರ್ಸ್ ನ ಜಾಗ್ವಾರ್ ಮತ್ತು ಲ್ಯಾಂಡ್ ರೋವರ್ ಗೆ, ಸ್ವೀಡನಿನ ವೊಲ್ವೊಗೆ ಅಮೆರಿಕದಲ್ಲಿ ತುಸು ಬೇಡಿಕೆಯಿದೆ.