ಹ್ಯುಂಡೈ ಪ್ರಗತಿ ನೀರಸ: ಸಕ್ಸೆನಾ ಹೇಳಿದ ಕಾರಣ

"ವಾಹನ ಮಾರುಕಟ್ಟೆ ಕಠಿಣ ದಿನಗಳಲ್ಲಿವೆ. ಸದ್ಯ ಯಾವುದೇ ಚೇತರಿಕೆ ಕಾಣುವ ಸೂಚನೆಗಳಿಲ್ಲ" ಎಂದು ಕಂಪನಿಯ ಮಾರಾಟ ವಿಭಾಗದ ನಿರ್ದೇಶಕ ಅರವಿಂದ್ ಸಕ್ಸೆನಾ ಹೇಳಿದ್ದಾರೆ.

ಇಂಧನ ದರಗಳ ಹೆಚ್ಚಳ, ಬ್ಯಾಂಕ್ ಬಡ್ಡಿದರ ಹೆಚ್ಚಳ ಮುಂತಾದ ಕಾರಣಗಳು ಗ್ರಾಹಕರ ಖರೀದಿ ಭಾವನೆ ಮೇಲೆ ಬೀರಿದ ಪರಿಣಾಮದಿಂದ ವಾಹನ ಮಾರಾಟ ಇಳಿಕೆ ಕಂಡಿದೆ ಎಂದು ಸಕ್ಸೆನಾ ಹೇಳಿದ್ದಾರೆ.

ಕಳೆದ ತಿಂಗಳು ಕಂಪನಿಯ ದೇಶಿ ಮಾರಾಟ 26,677 ಯೂನಿಟ್ ಗೆ ತಲುಪಿದ್ದು, ಕಳೆದ ವರ್ಷದ ಇದೇ ತಿಂಗಳ 28,601 ಯೂನಿಟ್ ಗೆ ಹೋಲಿಸಿದರೆ ಶೇಕಡ 6.7 ಇಳಿಕೆ ಕಂಡಿದೆ.

ಆದರೆ ಇದೇ ಅವಧಿಯಲ್ಲಿ ಕಂಪನಿಯ ವಾಹನ ರಫ್ತು 24,353 ಯೂನಿಟ್ ಗೆ ತಲುಪಿದ್ದು ಶೇಕಡ 10.5ರಷ್ಟು ಹೆಚ್ಚಳವಾಗಿದೆ. ಕಂಪನಿಯು ಕಳೆದ ವರ್ಷದ ಆಗಸ್ಟ್ ನಲ್ಲಿ 22,032 ಕಾರು ರಫ್ತು ಮಾಡಿತ್ತು.