ಭಾರತದಲ್ಲಿ ಅಸುರಕ್ಷಿತ ಕಾರುಗಳ ಮೇಲೆ ಹದ್ದಿನ ಕಣ್ಣು!!

ಅಮೆರಿಕದಲ್ಲಿ ಸೀಟು ಬೆಲ್ಟ್, ಬ್ಯಾಟರಿ ಪಿನ್, ಡೋರ್ ಲಾಕ್, ಹೀಗೆ ವಾಹನಗಳಲ್ಲಿ ಸಣ್ಣಪುಟ್ಟ ಸಮಸ್ಯೆ ಕಂಡರೂ ವಾಹನಗಳನ್ನು ಹಿಂಪಡೆಯಲಾಗುತ್ತದೆ. ಭಾರತದಲ್ಲಿ ಇನ್ನು ಮುಂದೆ ಇಂತಹ ರಾಷ್ಟ್ರೀಯ ವಾಹನ ನಿಗಾ ಏಜೆನ್ಸಿ ಸ್ಥಾಪಿಸಿದರೆ ವಾಹನ ಕಂಪನಿಗಳು ವಾಹನದಲ್ಲಿನ ಸಣ್ಣಪುಟ್ಟ ಸಮಸ್ಯೆಗಳಿಗೂ ಉತ್ತರಿಸಬೇಕಾಗುತ್ತದೆ.

"ವಾಹನಗಳ ಸುರಕ್ಷತೆಯ ಮೇಲೆ ನಿಗಾ ಇಡುವಂತಹ ಏಜೆನ್ಸಿ ಆರಂಭಿಸುವ ಕುರಿತು ಪರಿಶೀಲಿಸುತ್ತಿದ್ದೇವೆ. ದೇಶದ ವಾಹನೋದ್ಯಮ ಅತ್ಯಂತ ವೇಗವಾಗಿ ಅಭಿವೃದ್ಧಿಗೊಳ್ಳುತ್ತಿದೆ. ಮುಂದಿನ ಐದು ವರ್ಷಗಳಲ್ಲಿ ವಾಹನ ಮಾರುಕಟ್ಟೆ ಪಾಲು ದ್ವಿಗುಣಗೊಳ್ಳುವ ನಿರೀಕ್ಷೆಯಿದೆ. ಇಂತಹ ಸಮಯದಲ್ಲಿ ನಿಗಾ ಏಜೆನ್ಸಿ ಅತ್ಯಂತ ಅಗತ್ಯ" ಎಂದು ಭಾರಿ ಉದ್ಯಮಗಳ ಸಹಾಯಕ ಕಾರ್ಯದರ್ಶಿ ಅಂಬುಜ್ ಶರ್ಮಾ ಅಭಿಪ್ರಾಯಪಟ್ಟಿದ್ದಾರೆ.

ಭಾರತದಲ್ಲಿ ವಾಹನಗಳ ಹಿಂಪಡೆತ ನೀತಿ ಇಲ್ಲ. ಹತ್ತಾರೂ ನ್ಯಾನೊ ಬೆಂಕಿಗಾಹುತಿಯಾದರೂ, ಎಂಜಿನ್ ಸಮಸ್ಯೆ ಕಂಡರೂ ವಾಹನಗಳನ್ನು ಹಿಂಪಡೆಯುವ ಸಂಪ್ರದಾಯ ಬಲು ಕಡಿಮೆ. ಅವೆಲ್ಲ ಕಂಪನಿಗಳ ಮರ್ಜಿಗೆ ಬಿಟ್ಟ ವಿಷಯ. ಮಾರುತಿ ಸುಜುಕಿ ಎಂಜಿನ್ ಸಮಸ್ಯೆ ಹಿನ್ನಲೆಯಲ್ಲಿ ಇತ್ತೀಚೆಗೆ ಕೆಲವು ಡೀಸೆಲ್ ಕಾರು ಹಿಂಪಡೆದಿತ್ತು. ಹೋಂಡಾ ಸಿಯೆಲ್ ಕೂಡ ಸಿಟಿ ಸೆಡಾನ್ ಕಾರುಗಳನ್ನು ಹಿಂಪಡೆದಿತ್ತು.

ನ್ಯಾಷನಲ್ ಆಟೋಮೊಟಿವ್ ಬೋರ್ಡ್ ಅಂದ್ರೆ ವಾಹನಗಳ ನಿಗಾ ಘಟಕ. ಈ ಏಜೆನ್ಸಿಯು ಅಪಘಾತವಾದ ವಾಹನಗಳನ್ನು ಪರಿಶೀಲಿಸುತ್ತದೆ. ಗ್ರಾಹಕರ ದೂರುಗಳನ್ನು ಅವಲೋಕಿಸುತ್ತದೆ. ವಾಹನಗಳು ಸುರಕ್ಷಿತವಲ್ಲ ಅನಿಸಿದರೆ ಹಿಂಪಡೆದುಕೊಳ್ಳುವಂತೆ ಕಾರು ಕಂಪನಿಗಳಿಗೆ ಆದೇಶಿಸುತ್ತದೆ. ಈ ಏಜೆನ್ಸಿಯು ಸುರಕ್ಷತಾ ನೀತಿ ನಿಯಮಗಳನ್ನು ಬಿಡುಗಡೆ ಮಾಡುತ್ತದೆ ಮತ್ತು ಸುರಕ್ಷತಾ ಫೀಚರುಗಳಿಗೆ ರೇಟಿಂಗ್ ನೀಡುತ್ತದೆ.