ಹ್ಯುಂಡೈ ಅಗ್ಗದ ಸಣ್ಣ ಕಾರು ಇಯಾನ್ ಬುಕ್ಕಿಂಗ್ ಸುರು

ಹ್ಯುಂಡೈ ಇಯಾನ್ ಮಾರುತಿ ಸುಜುಕಿ ಆಲ್ಟೊಗೆ ಪ್ರತಿಸ್ಪರ್ಧಿ ಎನ್ನಲಾಗಿದೆ. ಇಯಾನ್ ರಸ್ತೆಗಿಳಿಯುವ ಹದಿನೈದು ದಿನ ಮುನ್ನವೇ ಡೀಲರುಗಳು ಬುಕ್ಕಿಂಗ್ ಆರಂಭಿಸಿದ್ದಾರೆ. ಇದು ಮಾರುತಿ 800 ಕಾರಿನಂತೆ ಜನಪ್ರಿಯವಾಗುವ ನಿರೀಕ್ಷೆ ಕಂಪನಿಗಿದೆ.

ನಮ್ಮ ಪ್ರತಿನಿಧಿ ಹಲವು ಡೀಲರುಗಳ ಬಳಿ ಮಾತನಾಡಿದ್ದಾರೆ. ವಿವಿಧ ಡೀಲರುಗಳು ವಿಧಿಸುವ ಬುಕ್ಕಿಂಗ್ ಶುಲ್ಕ ಕೂಡ ವಿಭಿನ್ನವಾಗಿದೆ. ಒಬ್ಬ ಡೀಲರು 5 ಸಾವಿರ ರು.ಗೆ ಬುಕ್ಕಿಂಗ್ ಮಾಡುವುದಾಗಿ ಹೇಳಿದ್ದಾರೆ. ಆದರೆ ಮತ್ತೊಂದು ಡೀಲರ್ ಬಳಿ ಬುಕ್ಕಿಂಗ್ ಶುಲ್ಕ 25 ಸಾವಿರ ರುಪಾಯಿ.

ನೂತನ ಇಯಾನ್ ಟಾಪ್ ಎಂಡ್ ಕಾರಿನ ಆನ್ ರೋಡ್ ದರ 3.5 ಲಕ್ಷ ರುಪಾಯಿ. ಬೇಸ್ ಆವೃತ್ತಿ ಆನ್ ರೋಡ್ ದರ ಸುಮಾರು 3 ಲಕ್ಷ ರುಪಾಯಿ. ಶೋರೂಂ ದರ ಮೂರು ಲಕ್ಷ ರು.ಗಿಂತ ಕಡಿಮೆ ಇರಲಿದೆ ಎಂದು ನಮ್ಮ ಪ್ರತಿನಿಧಿ ಹೇಳಿದ್ದಾರೆ.

ಹ್ಯುಂಡೈ ಇಯಾನ್ ಮಾರುತಿ 800 ಸ್ಥಾನ ತುಂಬುವ ನಿರೀಕ್ಷೆಯಿದೆ. ಯಾಕೆಂದರೆ ನೂತನ ಕಾರು 800 ಸಿಸಿ ಪೆಟ್ರೋಲ್ ಎಂಜಿನ್ ಹೊಂದಿದೆ. ಮಾರುತಿ ಸುಜುಕಿ ಕೂಡ 800 ಸಿಸಿಯ ಕಾರೊಂದನ್ನು ಅಭಿವೃದ್ಧಿಪಡಿಸುತ್ತಿದೆ. ಆದರೆ ಈ ಕುರಿತು ಹೆಚ್ಚಿನ ಮಾಹಿತಿ ಲಭ್ಯವಿಲ್ಲ.