ಹ್ಯುಂಡೈ ಅಕ್ಟೋಬರ್ ಮಾರಾಟ ಶೇಕಡ 7.5ರಷ್ಟು ಇಳಿಕೆ

ಹ್ಯುಂಡೈ ಮೋಟರ್ ಅಕ್ಟೋಬರ್ 2011ರಲ್ಲಿ ಒಟ್ಟು 48,325 ಯೂನಿಟ್ ಕಾರು ಮಾರಾಟ ಮಾಡಿದೆ. ಕಳೆದ ವರ್ಷ ಇದೇ ತಿಂಗಳಲ್ಲಿ ಕಂಪನಿಯ ಕಾರು ಮಾರಾಟ 52,217 ಯುನಿಟ್ ಆಗಿತ್ತು. ದಕ್ಷಿಣ ಕೊರಿಯಾದ ಕಂಪನಿಯು ಇತ್ತೀಚೆಗೆ ನೂತನ ಸಣ್ಣಕಾರು ಇಯಾನ್ ಅನಾವರಣ ಮಾಡಿತ್ತು.

ಹೊಸ ಸಣ್ಣಕಾರು ಇಯಾನ್ ಹೊರತಂದ ಹಿನ್ನಲೆಯಲ್ಲಿ ಕಂಪನಿಯು ಮಾರಾಟ ಏರಿಕೆ ಕಾಣುವ ನಿರೀಕ್ಷೆಯನ್ನು ಹಿಂದೆ ವ್ಯಕ್ತಪಡಿಸಿತ್ತು. ಆದರೆ ಇಂಧನ ದರ, ಬಡ್ಡಿದರ ಇತ್ಯಾದಿಗಳು ಗ್ರಾಹಕರ ಮೇಲೆ ಸಕಾರಾತ್ಮಕ ಪರಿಣಾಮ ಬೀರಿಲ್ಲವೆಂದು ಕಂಪನಿ ಹೇಳಿದೆ.

ಕಂಪನಿಯ ನೂತನ ಕಾರು ಇಯಾನ್ ಕುರಿತು ಹೆಚ್ಚು ಗ್ರಾಹಕರು ಆಸಕ್ತಿ ವಹಿಸುತ್ತಿದ್ದಾರೆ. ಈಗಾಗಲೇ ಸುಮಾರು 9 ಸಾವಿರ ಗ್ರಾಹಕರು ಇಯಾನ್ ಬುಕ್ಕಿಂಗ್ ಮಾಡಿದ್ದಾರೆ ಎಂದು ಕಂಪನಿ ಹೇಳಿದೆ. ಈ ಕಾರಣದಿಂದ ಕಂಪನಿಯ ನವೆಂಬರ್ ಮಾರಾಟ ಅತ್ಯುತ್ತಮವಾಗಿರಲಿದೆ ಎಂಬ ಜ್ಯೋತಿಷ್ಯವನ್ನು ನಾವು ಈಗಲೇ ಹೇಳಬಹುದಾಗಿದೆ.