ಭಾರತದ ಮಹಾರಾಜರ ಕಾರು ಲಂಡನ್ ನಲ್ಲಿ ಹರಾಜು

ನಂಬರ್ ಪ್ಲೇಟಿನಲ್ಲಿ "ಸಿಕ್ಸಿ" ಎಂದು ಬರೆಯಲಾಗಿರುವ "ದಿ ರೂಬ್" ಸೂಪರ್ ಕಾರನ್ನು 2005ರಲ್ಲಿ ರೋಲ್ಸ್ ರಾಯ್ಸ್ ಮರುವಿನ್ಯಾಸ ಮಾಡಿತ್ತು. ನಾಲ್ಕು ಸೀಟ್ ನ ಪಾಂಟೊಮ್ ಡಿಸಿ ಕಾನ್ಸೆಪ್ಟ್ ಕಾರಿನ ಮಾಲೀಕರು ಭಾರತದ ಮಹಾರಾಜರೊಬ್ಬರು ಎಂದು ಡೈಲಿ ಮೈಲ್ ವರದಿ ಮಾಡಿದೆ. ಈ ಕಾರು ಪ್ರತಿಗಂಟೆಗೆ ಗರಿಷ್ಠ 200 ಕಿ.ಮೀ. ವೇಗ ಹೊಂದಿದೆ.

ಕಾರಿನ ಕೆಂಪು ಬಣ್ಣದ ಲೀದರ್ ಇಂಟಿರಿಯರ್ ಆಕರ್ಷಕವಾಗಿದ್ದು, ಸುಂದರವಾದ ಡ್ಯಾಷ್ ಬೋರ್ಡ್, ಡಿವಿಡಿ ಸ್ಕ್ರೀನ್ ಮತ್ತು 22 ಇಂಚಿನ ಅಲಾಯ್ ವೀಲನ್ನು ವಿಶೇಷವಾಗಿ ಮಹಾರಾಜರಿಗಾಗಿ ಕಂಪನಿ ರೂಪಿಸಿತ್ತು ಎಂದು ಮೈಲ್ ವರದಿಯಲ್ಲಿ ಉಲ್ಲೇಖಿಸಿದೆ. "ಈ ಕಾರು ಸಾಕಷ್ಟು ವಾಹನ ಪ್ರೇಮಿಗಳನ್ನು ಸೆಳೆದಿದೆ. ಇದಕ್ಕೆ ಸಾಕ್ಷಿಯಾಗಿ ಕಳೆದ ಒಂದು ವಾರದಲ್ಲಿ ತಮ್ಮ ವೆಬ್ ಸೈಟ್ ಈ ಕಾರಿನ ಕುರಿತು 16,800 ಹಿಟ್ಸ್ ಪಡೆದಿದೆ" ಎಂದು ಲಂಡನಿನ ಸ್ಪಾರ್ಕ್ಸ್ ಡಾಟ್ ಕಾಂ ಹೇಳಿದೆ.