ಸ್ಯಾನ್ ಸ್ಟ್ರೋಮ್: ಗೋವಾ ಕಾರಿಗೆ ಸುಸ್ವಾಗತ

ಬೇಜಾರು ಬೇಡ. ಗೋವಾದ ಕಂಪನಿಯೊಂದು ಕನ್ವರ್ಟಿಬಲ್ ಕಾರನ್ನು ಉತ್ಪಾದಿಸುತ್ತಿದೆ. ಇದು ಚಿಕ್ಕ ಕಂಪನಿಯಾಗಿರುವ ಕಾರಣ ತಿಂಗಳಿಗೆ ಒಂದೆರಡುಮೂರು ಕಾರು ಮಾತ್ರ ಉತ್ಪಾದಿಸುತ್ತಿದೆ. ಸದ್ಯ ಕಂಪನಿ ಹೊರತಂದಿರುವ ಕಾರಿನ ಹೆಸರು ಸ್ಯಾನ್ ಸ್ಟ್ರೋಮ್. ಗಾಳಿ ನಿಮ್ಮ ಮುಖಕ್ಕೆ ಬೀಸುವುದು ಎಂದು ಈ ಹೆಸರಿನ ಅರ್ಥ.

ಸ್ಟ್ರೋಮ್ ಅಂದರೆ ಎರಡು ಸೀಟಿನ ಕಾರು. ಇದು ಅಗ್ಗದ ಕನ್ವರ್ಟಿಬಲ್ ಕಾರು ಕೂಡ ಹೌದು. ಇದರ ದರ ಸುಮಾರು 6 ಲಕ್ಷ ರುಪಾಯಿ. ವಿದೇಶಿ ಕಂಪನಿಗಳ ಕನ್ವರ್ಟಿಬಲ್ ಕಾರು ದರ ಸುಮಾರು 20 ಲಕ್ಷ ರು. ಆಸುಪಾಸಿನಲ್ಲಿದೆ. ನಮ್ಮ ದೇಶದಲ್ಲಿಯೇ ಅಗ್ಗದ ದರದ ಕನ್ವರ್ಟಿಬಲ್ ಕಾರು ದೊರಕುವಾಗ ವಿದೇಶಿ ಕಾರುಗಳ ಮೋಹ ನಮಗೆ ಏತಕ್ಕೆ ಅಲ್ಲವೇ?

ಈ ಕಾರು ರೆನಾಲ್ಟಿನ 1.2 ಲೀಟರ್ ಪೆಟ್ರೋಲ್ ಎಂಜಿನ್ ಹೊಂದಿದೆ. ಸ್ಯಾನ್ ಸ್ಟ್ರೋಮ್ ಹೆಚ್ಚು ಶಕ್ತಿಶಾಲಿಯಾಗಲಿದೆಯಂತೆ. ಕಂಪನಿಯು ಈ ಕಾರಿಗೆ 1.3 ಲೀಟರ್ ಎಂಜಿನ್ ಅಳವಡಿಸುತ್ತಿದೆಯಂತೆ. ಈ ಕಾರಿಗೆ ಬಾಡಿ ಪ್ಯಾನೆಲ್ ನ್ನು ಬೆಂಗಳೂರಿನಲ್ಲಿ ನಿರ್ಮಿಸಲಾಗುತ್ತಿದೆ. ಗೋವಾದಲ್ಲಿ ಈ ಕಾರನ್ನು ಸಂಪೂರ್ಣವಾಗಿ ಜೋಡಿಸಲಾಗುತ್ತಿದೆ.

ಸದ್ಯಕ್ಕೆ ಈ ಕಾರನ್ನು ಗೋವಾದಲ್ಲಿ ಮಾತ್ರ ಮಾರಾಟ ಮಾಡಲಾಗುತ್ತದೆ. ಕಂಪನಿಯು ದೇಶದಲ್ಲಿ ಹೆಚ್ಚು ಶೋರೂಂ ತೆರೆದರೆ ಸ್ಯಾನ್ ಮೋಟರ್ಸ್ ಹೆಚ್ಚು ಜನಪ್ರಿಯವಾದೀತು. ನಮ್ಮ ದೇಶದ ಕಂಪನಿ ಸದ್ದಿಲ್ಲದೇ ಬೆರಳೆಣಿಕೆಯ ಕನ್ವರ್ಟಿಬಲ್ ಕಾರನ್ನು ತಯಾರಿಸುತ್ತಿದೆ ಎಂದು ಹೆಚ್ಚಿನವರಿಗೆ ತಿಳಿದಿರಲಿಕ್ಕಿಲ್ಲ.