ಮಾರುತಿ ಸುಜುಕಿ ಲಾಭ ಶೇಕಡ 64ರಷ್ಟು ಇಳಿಕೆ

ಕಂಪನಿಯ ನಿವ್ವಳ ಲಾಭ ಇಳಿಕೆಗೆ ಇತರ ಪ್ರಮುಖ ಕಾರಣಗಳೆಂದರೆ ಮಾನೆಸರ್ ಘಟಕದಲ್ಲಿನ ನೌಕರರ ಪ್ರತಿಭಟನೆ. ಕಾರ್ಮಿಕರ ಪ್ರತಿಭಟನೆಯಿಂದ ಅತ್ಯಧಿಕ ಮಾರಾಟದ ಸ್ವಿಫ್ಟ್ ಉತ್ಪಾದನೆಗೆ ಹಿನ್ನಡೆಯಾಗಿತ್ತು.

ಕಳೆದ ಹಣಕಾಸು ವರ್ಷದ ಮೂರನೇ ತ್ರೈಮಾಸಿಕದಲ್ಲಿ ಕಂಪನಿಯು 565 ಕೋಟಿ ರು. ನಿವ್ವಳ ಲಾಭ ಗಳಿಸಿತ್ತು. "ರೂಪಾಯಿ ಮೌಲ್ಯ ಇಳಿಕೆ ಕಂಡಿರುವುದು ವಾಹನ ಬಿಡಿಭಾಗಗಳ ಆಮದಿನ ಮೇಲೆ ಪರಿಣಾಮ ಬೀರಿದೆ. ಇದರಿಂದ ಕಂಪನಿಯ ಲಾಭ ಗಮನಾರ್ಹವಾಗಿ ಇಳಿಕೆ ಕಂಡಿದೆ" ಎಂದು ಕಂಪನಿ ಪ್ರಕಟಣೆಯಲ್ಲಿ ತಿಳಿಸಿದೆ.

ಇದೇ ಸಮಯದಲ್ಲಿ ಕಂಪನಿಯ ನಿವ್ವಳ ಮಾರಾಟ 7,663.6 ಕೋಟಿ ರು.ಗೆ ತಲುಪಿದ್ದು ಶೇಕಡ 15.4ರಷ್ಟು ಇಳಿಕೆ ಕಂಡಿದೆ. ಇದಕ್ಕೂ ಹಿಂದಿನ ವರ್ಷದ ಇದೇ ತ್ರೈಮಾಸಿಕದಲ್ಲಿ ಇದು 9,276.73 ಕೋಟಿ ರುಪಾಯಿಗೆ ತಲುಪಿತ್ತು. ಪೆಟ್ರೋಲ್ ದರ ಹೆಚ್ಚಳ ಮತ್ತು ಬಡ್ಡಿದರ ಹೆಚ್ಚಳ ಕೂಡ ಕಂಪನಿಯ ಲಾಭ ಇಳಿಕೆಗೆ ಕಾರಣವಾಗಿದೆ.