ಇಂಡಿಯನ್ ಗ್ರಾಂಡ್ ಪ್ರಿ: ಸತತ 2ನೇ ಬಾರಿ ವೆಟಲ್ ಚಾಂಪಿಯನ್

ನಿರೀಕ್ಷೆಯಂತೆಯೇ ಗ್ರೇಟರ್ ನೋಯ್ಡಾದ ಬುದ್ಧ ಅಂತರಾಷ್ಟ್ರೀಯ ಸರ್ಕ್ಯೂಟ್‌ನಲ್ಲಿ ಸಾಗಿದ ಇಂಡಿಯನ್ ಗ್ರಾಂಡ್ ಪ್ರಿ ಫಾರ್ಮುಲಾ ಒನ್ ರೇಸ್‌ನಲ್ಲಿ ಅತಿ ವೇಗವನ್ನು ಕಾಯ್ದುಕೊಂಡಿರುವ ರೆಡ್ ಬುಲ್ ತಂಡದ ಸೆಬಾಸ್ಟಿಯನ್ ವೆಟಲ್ ಚಾಂಪಿಯನ್ ಆಗಿ ಹೊರಹೊಮ್ಮಿದ್ದಾರೆ.

ಒಲಿಂಪಿಕ್ಸ್ ಕಂಚಿನ ಪದಕ ವಿಜೇತ ಶೂಟರ್ ಗಗನ್ ನಾರಂಗ್, ರೇಸ್‌ಗೆ ಚಾಲನೆ ನೀಡುತ್ತಿದ್ದಂತೆ ಶರವೇಗದಲ್ಲಿ ಮುನ್ನುಗ್ಗಿದ್ದ ವೆಟಲ್ ಸತತ ಎರಡನೇ ಬಾರಿ ಇಂಡಿಯನ್ ಗ್ರಾಂಡ್ ಪ್ರಿ ಎಫ್-1 ರೇಸ್ ಗೆದ್ದ ಸಾಧನೆ ಮಾಡಿದರು. ಅಲ್ಲದೆ ಒಟ್ಟಾರೆಯಾಗಿ ನಾಲ್ಕನೇ ಫಾರ್ಮುಲಾ ಒನ್ ಪ್ರಶಸ್ತಿ ತಮ್ಮದಾಗಿಸಿಕೊಂಡರು.

ಚಿತ್ರಲೋಕ

ವಿಜಯ್ ಮಲ್ಯ ಒಡೆತನದ ಫೋರ್ಸ್ ಇಂಡಿಯಾ 8ನೇ ಸ್ಥಾನ ಪಡೆಯಿತು. ನಿಕೊ ಹಲ್ಕನ್‌ಬರ್ಗ್ 8ನೇ ಸ್ಥಾನ ಗಳಿಸುವುದರೊಂದಿಗೆ ಫೋರ್ಸ್ ಇಂಡಿಯಾ 4 ಅಂಕ ಗಿಟ್ಟಿಸಿಕೊಂಡಿತು.

ಇದೇ ರೇಸ್‌ನಲ್ಲಿ ಪಾಲ್ಗೊಂಡಿದ್ದ ಭಾರತದ ಏಕಮಾತ್ರ ಚಾಲಕ ನರೈನ್ ಕಾರ್ತಿಕೇಯನ್ 21ನೇ ಸ್ಥಾನಕ್ಕೆ ಕುಸಿಯುವ ಮೂಲಕ ನಿರಾಸೆ ಅನುಭವಿಸಿದರು. ಎಚ್‌ಆರ್‌ಟಿ ತಂಡದ ಕಾರ್ತಿಕೇಯನ್ ಕಳೆದ ಬಾರಿ 17ನೇ ಸ್ಥಾನ ಪಡೆದಿದ್ದರು.

ಲಂಡನ್ ಒಲಿಂಪಿಕ್ಸ್‌ ಪದಕ ವಿಜೇತರಾದ ಗಗನ್ ನಾರಂಗ್, ಸುಶೀಲ್ ಕುಮಾರ್ ಹಾಗೂ ವಿಜಯ್ ಕುಮಾರ್ ಸಹಿತ ಅನೇಕ ಗಣ್ಯ ವ್ಯಕ್ತಿಗಳು ಉಪಸ್ಥಿತರಿದ್ದರು. ಕ್ರಿಕೆಟಿಗ ಹರಭಜನ್ ಸಿಂಗ್ ಗೆಳತಿ ನಟಿ ಗೀತಾ ಬ್ರಾಸಾ ಜತೆ ಆಗಮಿಸಿದ್ದರೆ ಯುವರಾಜ್ ಸಿಂಗ್, ವಿರಾಟ್ ಕೊಹ್ಲಿ, ಮಾಜಿ ನಾಯಕ ಮೊಹಮ್ಮದ್ ಅಜರುದ್ದೀನ್, ಐಪಿಎಲ್ ಅಧ್ಯಕ್ಷ ರಾಜೀವ್ ಶುಕ್ಲಾ ಕೂಡಾ ಉಪಸ್ಥಿತರಿದ್ದರು. ಬಾಲಿವುಡ್‌ನಿಂದ ಅಜಯ್ ದೇವಗನ್, ಸೋನಾಕ್ಷಿ ಸಿನ್ಹಾ, ನೇಹಾ ದೂಫಿಯಾ, ಅನಿಲ್ ಕಪೂರ್ ಹಾಗೂ ಇನ್ನಿತರ ಗಣ್ಯರು ತಾರಾ ಮೆರಗು ನೀಡಿದ್ದರು.