ಯಾಕೆ ಎಲ್ರೂ ಡೀಸೆಲ್ ಕಾರು ಖರೀದಿಸ್ತಾರೆ?

ಚಿತ್ರಲೋಕ

ಪೆಟ್ರೋಲ್ ಕಾರುಗಳಿಗೆ ಹೋಲಿಸಿದರೆ ಡೀಸೆಲ್ ಕಾರುಗಳ ಮೇಟೆಂನ್ಸ್ ವೆಚ್ಚವೂ ಕಡಿಮೆ. ಸೆಕೆಂಡ್ ಹ್ಯಾಂಡ್ ಕಾರು ಮಾರುಕಟ್ಟೆಯಲ್ಲಿ ಡೀಸೆಲ್ ಕಾರುಗಳ ಬೆಲೆ ದುಬಾರಿಯಾಗಿರುವುದು ಕೂಡ ಡೀಸೆಲ್ ಕಾರು ಬೇಡಿಕೆ ಹೆಚ್ಚಿಸಿದೆ. ಹೀಗಾಗಿ ಡೀಸೆಲ್ ಕಾರು ಮರು ಮಾರಾಟ ಮಾಡಿದ್ರೂ ಹೆಚ್ಚು ನಷ್ಟವಿಲ್ಲ.

ಈ ಹಿಂದಿನ ವರದಿಯಲ್ಲಿ ತಿಳಿಸಿರುವಂತೆ ಪೆಟ್ರೋಲ್ ಕಾರುಗಳಿಗೆ ಕಾರು ಕಂಪನಿಗಳು ಭಾರಿ ಪ್ರಮಾಣದ ಡಿಸ್ಕೌಂಟ್ ನೀಡುತ್ತಿವೆ. ಆದರೆ ಗ್ರಾಹಕರು ಕೆಲವು ಸಾವಿರ ರುಪಾಯಿ ಹೆಚ್ಚಾದರೂ ಚಿಂತೆಯಿಲ್ಲ, ಡೀಸೆಲ್ ಕಾರುಗಳಿಗೆ ಓಕೆ ಎನ್ನುತ್ತಿದ್ದಾರೆ. ಡೀಸೆಲ್ ಮತ್ತು ಪೆಟ್ರೋಲ್ ಕಾರುಗಳ ಅನುಪಾತ ಈಗ 80:20ರಷ್ಟಿದೆ.

ಪೆಟ್ರೋಲ್ ದರ ದುಬಾರಿಯಾದ ನಂತರ ಬಿ ಸೆಗ್ಮೆಂಟ್ ಕಾರುಗಳಿಗೆ ಬೇಡಿಕೆ ಕಡಿಮೆಯಾಗಿದೆ. "ಪೆಟ್ರೋಲ್ ದರ ಹೆಚ್ಚಳದ ನಂತರ ಹೆಚ್ಚಿನ ಜನರು ಪೆಟ್ರೋಲ್ ಕಾರು ಬುಕ್ಕಿಂಗ್ ಕ್ಯಾನ್ಸಲ್ ಮಾಡುತ್ತಿದ್ದಾರೆ. ಈ ಸಮಯದಲ್ಲಿ ಡೀಸೆಲ್ ಕಾರುಗಳಿಗೆ ಬೇಡಿಕೆ ಹೆಚ್ಚಾಗಿದೆ" ಎಂದು ಹೋಂಡಾ ಕಾರು ಡೀಲರೊಬ್ಬರು ಹೇಳಿದ್ದಾರೆ.

"ಡೀಸೆಲ್ ಕಾರು ಖರೀದಿಸಲಾಗದವರು, ಪೆಟ್ರೋಲ್ ದರದ ಮೇಲೆ ಭಯವಿರುವವರು ಈಗ ನ್ಯಾನೊ ಕಾರು ಖರೀದಿಸುತ್ತಿದ್ದಾರೆ. ಪ್ರಸಕ್ತ ದುಬಾರಿ ಪೆಟ್ರೋಲಿಗೆ ನ್ಯಾನೊ ಮೈಲೇಜ್ ಮತ್ತು ರನ್ನಿಂಗ್ ವೆಚ್ಚ ಸಮರ್ಥ ಆಯ್ಕೆಯಾಗಿದೆ" ಎಂದು ಟಾಟಾ ವಕ್ತಾರರು ಹೇಳುತ್ತಾರೆ.

ಮಾರುತಿ ಡೀಲರುಗಳು ಕೂಡ ಗ್ರಾಹಕರ ಮನಸು ಬದಲಾಯಿಸಲು ಪ್ರಯತ್ನಿಸುತ್ತಿದ್ದಾರೆ. "ಡೀಸೆಲ್ ಕಾರುಗಳಿಗೆ ಒಂದು ಲಕ್ಷ ಜಾಸ್ತಿ ದುಡ್ಡು ಕೊಡುವುದಕ್ಕಿಂತ ಪೆಟ್ರೋಲ್ ಕಾರು ಸೂಕ್ತ. ಹೆಚ್ಚಿನ ಜನರು ಮೂರು ವರ್ಷದಲ್ಲಿ ಹೆಚ್ಚೆಂದರೆ 25 ಸಾವಿರ ಕಿ.ಮೀ. ಕಾರು ಚಲಾಯಿಸುತ್ತಾರೆ. ಅವರಿಗೆಲ್ಲ ಡೀಸೆಲ್ ಕಾರುಗಳು ವ್ಯರ್ಥ. ಇದನ್ನು ಗ್ರಾಹಕರಿಗೆ ಅರ್ಥ ಮಾಡಿಸಲು ಪ್ರಯತ್ನಿಸುತ್ತಿದ್ದೇವೆ" ಎಂದು ಮಾರುತಿ ಡೀಲರೊಬ್ಬರು ತಿಳಿಸಿದ್ದಾರೆ.

ಪೆಟ್ರೋಲ್ ದರ ಹೆಚ್ಚಳದಿಂದ ಐಷಾರಾಮಿ ಕಾರು ಕಂಪನಿಗಳು ಅಂತಹ ಹಿನ್ನಡೆ ಅನುಭವಿಸಿಲ್ಲ. "ಐಷಾರಾಮಿ ಕಾರು ಗ್ರಾಹಕರು ಪೆಟ್ರೋಲಿನಿಂದ ಡೀಸೆಲ್ ಸೆಗ್ಮೆಂಟಿಗೆ ವಲಸೆ ಹೋಗಿಲ್ಲ" ಎಂದು ಐಷಾರಾಮಿ ಕಾರು ಡೀಲರೊಬ್ಬರು ಮಾಹಿತಿ ನೀಡಿದ್ದಾರೆ.