ಪ್ರಸಕ್ತ ತಿಂಗಳಲ್ಲೇ ಟಾಟಾದಿಂದ 3 ಫೇಸ್‌ಲಿಫ್ಟ್ ಮಾಡೆಲ್ ಎಂಟ್ರಿ

ಡ್ರೈವ್ ಸ್ಪಾರ್ಕ್ ಗ್ಯಾಲರಿ

ವರದಿಗಳ ಪ್ರಕಾರ ಇಂಡಿಗೊ ಇಸಿಎಸ್, ಸುಮೋ ಗೋಲ್ಡ್ ಹಾಗೂ ವಿಶ್ವದ ಅಗ್ಗದ ಕಾರಾದ ನ್ಯಾನೋ ಫೇಸ್‌ಲಿಫ್ಟ್ ವರ್ಷನ್ ಸದ್ಯದಲ್ಲೇ ಮಾರುಕಟ್ಟೆಗೆ ಪರಿಚಯವಾಗಲಿದೆ. ಈ ಮೂಲಕ ಟಾಟಾ ಮೋಟಾರ್ಸ್ ಮಾರಾಟಕ್ಕೆ ಉತ್ತೇಜನೆ ನೀಡುವ ಪ್ರಯತ್ನ ಮಾಡಲಿದೆ.

ಭಾರತೀಯ ಪ್ರಯಾಣಿಕ ಮಾರುಕಟ್ಟೆಯಲ್ಲಿ ತನ್ನದೇ ಸ್ಥಾನ ಉಳಿಸಿಕೊಳ್ಳುವಲ್ಲಿ ಟಾಟಾ ಮೋಟಾರ್ಸ್ ಯಶಸ್ವಿಯಾಗಿದೆ. ಇದೀಗ ಮತ್ತೆ ಜನಪ್ರಿಯ ಮಾಡೆಲ್‌ಗಳ ಪರಿಷ್ಕೃತ ಆವೃತ್ತಿ ಪರಿಚಯಿಸಲು ಮುಂದಾಗುತ್ತಿದೆ. ಇದರ ಜತೆ ಟಾಟಾ ಸಫಾರಿ ಸ್ಟ್ರೋಮ್‌ಗೆ ವಿಶೇಷ ಆಫ್ ರೋಡ್ ಪ್ಯಾಕೇಜ್ ಒದಗಿಸುವ ಯೋಜನೆ ಕೂಡಾ ಕಂಪನಿ ಮುಂದಿದೆ.

ಟಾಟಾ ಸಫಾರಿ ಸ್ಟ್ರೋಮ್ 4x4 ವಿಶೇಷ ಪ್ಯಾಕೇಜ್ ಸಾಹಸಿ ಚಾಲಕರನ್ನು ಉತ್ತೇಜಿಸಲಿದ್ದು, ಆಫ್ ರೋಡಿಂಗ್ ರೈಡಿಂಗ್‌ಗೆ ಹೆಚ್ಚು ಸೂಕ್ತವೆನಿಸಲಿದೆ. ಪರಿಷ್ಕೃತ ಇಂಡಿಗೊ ಇಸಿಎಸ್ ಕೆಲವೊಂದು ಕಾಸ್ಮೆಟಿಕ್ ಬದಲಾವಣೆಯೊಂದಿಗೆ ಆಗಮಿಸಲಿದೆ. ಮಾರುತಿ ಸ್ವಿಫ್ಟ್ ಡಿಜೈರ್, ಹೋಂಡಾ ಅಮೇಜ್, ಷೆವರ್ಲೆ ಸೈಲ್ ಹಾಗೂ ಫೋರ್ಡ್ ಕ್ಲಾಸಿಕ್ ಪ್ರಮುಖ ಸ್ಪರ್ಧಾಳುಗಳಾಗಿರುವುದರಿಂದ ಇಂಟಿರಿಯರ್ ಬದಲಾವಣೆ ಹೇಗಿರಲಿದೆ ಎಂಬುದು ಬಹಳ ಮುಖ್ಯವೆನಿಸಲಿದೆ.

ಇನ್ನು ಟಾಟಾ ಸುಮೋ ಗೋಲ್ಡ್ ಎಸ್‌ಯುವಿಯಲ್ಲಿ ಇಂಟಿರಿಯರ್ ಸೇರಿದಂತೆ ಎಕ್ಸ್‌ಟೀರಿಯರ್ ವಿನ್ಯಾಸದಲ್ಲಿ ಬದಲಾವಣೆ ಕಂಡುಬರಲಿದೆ. ಹಾಗೆಯೇ ಆರಾಮದಾಯಕ ಪಯಣಕ್ಕಾಗಿ ಹೆಚ್ಚಿನ ಸೌಲಭ್ಯ ಆಳವಡಿಸಲಾಗುವುದು. ಮತ್ತೊಂದೆಡೆ ಟಾಟಾ ನ್ಯಾನೋ ಫೇಸ್‌ಲಿಫ್ಟ್ ವರ್ಷನ್ ಕೂಡಾ ಪರಿಚಯವಾಗಲಿದೆ. ಹಾಗೆಯೇ ಸಿಎನ್‌ಜಿ ಹಾಗೂ ಡೀಸೆಲ್ ವರ್ಷನ್ ನಿಕಟ ಭವಿಷ್ಯದಲ್ಲಿ ಮಾರುಕಟ್ಟೆ ಪ್ರವೇಶವಾಗಲಿದೆ.