ಇನ್ನು ಮುಂದೆ ಐಷಾರಾಮಿ ಬಸ್‌ಗಳಲ್ಲೂ 'ಬ್ಲ್ಯಾಕ್ ಬಾಕ್ಸ್'

ವಿಮಾನಗಳಂತೆ ಐಷಾರಾಮಿ ಬಸ್ಸುಗಳಲ್ಲೂ ಪ್ರಯಾಣ ಸುರಕ್ಷಿತವಾಗಿಸುವ ನಿಟ್ಟಿನಲ್ಲಿ ಬ್ಲ್ಯಾಕ್ ಬಾಕ್ಸ್ ಆಳವಡಿಸುವ ಕುರಿತಂತೆ ಪ್ರಸ್ತಾಪ ಮುಂದಿಡಲಾಗಿದೆ.

ಕೇವಲ ಬ್ಲ್ಯಾಕ್ ಬಾಕ್ಸ್ ಅಷ್ಟೇ ಅಲ್ಲ ಪ್ರತಿಯೊಂದು ಸೀಟಿಗೂ ಸೀಟು ಬೆಲ್ಟ್ ಆಳವಡಿಸಲಾಗುವುದು. ಅಲ್ಲದೆ ಐಷಾರಾಮಿ ಬಸ್ಸುಗಳಲ್ಲಿ ಸ್ಪೀಡ್ ಗವರ್ನರ್ ಲಗತ್ತಿಸುವ ಬಗ್ಗೆಯೂ ಆಲೋಚನೆಯಲ್ಲಿದೆ. ಸದ್ಯ ಎರಡು ಸೀಟುಗಳಿಗೆ ಮಾತ್ರ ಸೀಟು ಬೆಲ್ಟ್ ಲಭ್ಯವಿದೆ.

ಪ್ರಸ್ತುತ ಎಲ್ಲವೂ ಪ್ರಾಥಮಿಕ ಹಂತದಲ್ಲಿದ್ದು, ಇದೇ ತಿಂಗಳು ಬೆಂಗಳೂರಿನಲ್ಲಿ ನಡೆಯಲಿರುವ ಸಭೆಯಲ್ಲಿ ನಿರ್ಣಯ ಕೈಗೊಳ್ಳಲಿದ್ದಾರೆ. ಸಭೆಯಲ್ಲಿ ರಾಜ್ಯ ಸಾರಿಗೆ ಇಲಾಖೆ ಅಧಿಕಾರಿಗಳು ಹಾಗೂ ವೋಲ್ವೋ ಮತ್ತು ಸ್ಕಾನಿಯಾದಂತಹ ಐಷಾರಾಮಿ ಬಸ್ ತಯಾರಕ ಸಂಸ್ಥೆಯ ಪ್ರತಿನಿಧಿಗಳು ಉಪಸ್ಥಿತಲಿದ್ದಾರೆ ಎಂದು ತಿಳಿದು ಬಂದಿದೆ.

ಚಾಲಕರ ಅಜಾಗರೂಕತೆ ಅಥವಾ ಬಿಡುವಿಲ್ಲದ ಕೆಲಸದಿಂದಾಗಿಯೇ ದುರಂತಗಳು ಘಟಿಸುತ್ತವೆ. ಇದನ್ನು ತಡೆಯುವ ನಿಟ್ಟಿನಿಲ್ಲಿ ಚಾಲಕರು ಎಷ್ಟು ಹೊತ್ತು ಚಾಲನೆ ಮಾಡಬಹುದು ಎಂಬುದನ್ನು ತೀಮಾರ್ನಿಸಲಿದ್ದಾರೆ.

ಇವೆಲ್ಲದರ ಜೊತೆಗೆ ಸಾಮಾನ್ಯ ಸ್ಟಾಂಡರ್ಡ್ ಬಸ್ ಕೋಡ್ ಬಳಕೆ ಬಗ್ಗೆಯೂ ನಿರ್ಧಾರವುಂಟಾಗಲಿದೆ. ಇದು ಬಸ್ ನಿರ್ಮಾಣ ವೇಳೆ ಬೇಗನೇ ಆಗ್ನಿಸ್ಪರ್ಶವಾಗದಂತಹ ಬಿಡಿಭಾಗಗಳ ಬಳಕೆಯ ಬಗ್ಗೆಯೂ ಖಾಸಜಿ ವಹಿಸಲಾಗುವುದು.

ಈ ಎಲ್ಲ ಬದಲಾವಣೆಗಳು ಸದ್ಯದಲ್ಲೇ ವೋಲ್ವೋ ಹಾಗೂ ಇನ್ನಿತರ ಐಷಾರಾಮಿ ಬಸ್ಸುಗಳು ಜನಪ್ರಿಯವಾಗಿರುವ ಕರ್ನಾಟಕ, ಕೇರಳ, ತಮಿಳುನಾಡು, ಆಂಧ್ರ ಪ್ರದೇಶಗಳಲ್ಲಿ ಅತಿ ಶೀಘ್ರದಲ್ಲೇ ಆಳವಡಿಕೆಯಾಗಲಿದೆ.

ಕಳೆದ ವರ್ಷ ಅಕ್ಟೋಬರ್ ತಿಂಗಳಲ್ಲಿ ಬೆಂಗಳೂರಿನಿಂದ ಹೈದರಾಬಾದ್‌ಗೆ ಹೊರಟಿದ್ದ ವೋಲ್ವೋ ಬಸ್ ಅಗ್ನಿ ಅನಾಹುತಕ್ಕೀಡಾಗಿತ್ತು. ಈ ದಾರುಣ ದುರಂತದಲ್ಲಿ 45 ಮಂದಿ ಸಜೀವವಾಗಿ ದಹನವಾಗಿದ್ದರು.