ಕೇರಳದಲ್ಲಿ ಮಹಿಳೆಯರಿಗಾಗಿ 'ಶಿ ಟ್ಯಾಕ್ಸಿ'; ಬೆಂಗ್ಳೂರಿಗೂ ಬೇಕೇ?

By Nagaraja

Updated: Thursday, January 22, 2015, 10:30 [IST]

ನೆರೆಯ ಕೇರಳ ರಾಜ್ಯದಲ್ಲಿ ಅಲ್ಲಿನ ಸರಕಾರವು ಮಹಿಳಾ ಪ್ರಯಾಣಿಕರ ಸುರಕ್ಷಿತ ಪ್ರಯಾಣಿಕ್ಕೆ ಹೆಚ್ಚಿನ ಆದ್ಯತೆ ಕೊಡುತ್ತಿದೆ. ಕಳೆದ ವರ್ಷ ತಿರುವನಂತಪುರ ನಗರಕ್ಕೆ ಪರಿಚಯವಾಗಿದ್ದ ನೂತನ 'ಶಿ ಟ್ಯಾಕ್ಸಿ' ವ್ಯವಸ್ಥೆಯು ಇದೀಗ ಕೊಚ್ಚಿ ನಗರವನ್ನು ಪ್ರವೇಶಿಸಿದೆ.

ಈ ಮೂಲಕ ತಿರುವನಂತಪುರ ಬಳಿಕ ಮಹಿಳೆಯರಿಗಾಗಿ ವಿಶೇಷ ಕ್ಯಾಬ್ ವ್ಯವಸ್ಥೆ ಹೊಂದಿರುವ ದೇಶದ ಎರಡನೇ ನಗರವೆಂಬ ಹೆಗ್ಗಳಿಕೆಗೆ ಕೊಚ್ಚಿ ಪಾತ್ರವಾಗಿದೆ. ಕೇರಳ ಸರಕಾರದ ಸಹಭಾಗಿತ್ವದಲ್ಲಿ ಶಿ ಟ್ಯಾಕ್ಸಿ ಆರಂಭಿಸಲಾಗಿದೆ. ಇದರಂತೆ ಕೇರಳ ಮುಖ್ಯಮಂತ್ರಿ ಉಮ್ಮನ್ ಚಾಂಡಿ ಯೋಜನೆಗೆ ಹಸಿರು ನಿಶಾನೆ ತೋರಿದರು.

ಕೇರಳದಲ್ಲಿ ಮಹಿಳೆಯರಿಗಾಗಿ 'ಶಿ ಟ್ಯಾಕ್ಸಿ'; ಬೆಂಗ್ಳೂರಿಗೆ ಬೇಕೇ?

ರಾತ್ರಿ ಹೊತ್ತು ಟ್ಯಾಕ್ಸಿ ಅಥವಾ ರಿಕ್ಷಾ ಪ್ರಯಾಣ ಅಪಾಯಕಾರಿಯಾಗಿ ಪರಿಣಮಿಸಿರುವುದರಿಂದ ಕೇರಳ ಸರಕಾರ 24 ತಾಸು ಸೇವೆ ಒದಗಿಸುವ ಮಹಿಳೆಯರೇ ಚಲಾಯಿಸುವ ಶಿ ಟ್ಯಾಕ್ಸಿ‌ಗಳನ್ನು ಪರಿಚಯಿಸಿದೆ.

ಆರು ತಿಂಗಳುಗಳ ಹಿಂದೆಯಷ್ಟೇ ಅಂದರೆ 2013 ನವೆಂಬರ್ 19ರಂದು ರಾಜಧಾನಿ ತಿರುವನಂತಪುರದಲ್ಲಿ ಮೊದಲ ಬಾರಿಗೆ ಶಿ ಟ್ಯಾಕ್ಸಿ ಆರಂಭವಾಗಿತ್ತು. ಕೇರಳದ ಜನಪ್ರಿಯ ನಟಿ ಮಂಜು ವಾರಿಯರ್ ಶಿ ಟ್ಯಾಕ್ಸಿ ಯೋಜನೆಯ ಸದ್ಭಾವನಾ ಪ್ರಚಾರ ರಾಯಭಾರಿಯಾಗಿ ಆಯ್ಕೆಯಾಗಿದ್ದಾರೆ.

ಈ ಸಂದರ್ಭದಲ್ಲಿ ಮಾತನಾಡಿದ ಕೇರಳ ಸಿಎಂ ಉಮ್ಮನ್ ಚಾಂಡಿ, ಮಹಿಳಾ ಸಬಲೀಕರಣದಲ್ಲಿ ದೇಶಕ್ಕೆ ಶಿ ಟ್ಯಾಕ್ಸಿ ಯೋಜನೆಯು ಮಾದರಿಯಾಗಲಿದೆ ಎಂದಿದ್ದಾರೆ.

ಶಿ ಟ್ಯಾಕ್ಸಿ ಯಶಸ್ಸಿನ ಬೆನಲ್ಲೇ ಕೇರಳ ಜಾಗತಿಕವಾಗಿಯೂ ಗುರುತಿಸಲ್ಪಟ್ಟಿದ್ದು, ಯುನೈಟೆಡ್ ಅರಬ್ ಎಮಿರೇಟ್ಸ್ ಸಹ ಇದರ ಸಾಧಕ ಬಾಧಕಗಳನ್ನು ಪರಿಶೀಲಿಸಿ ಈ ಯೋಜನೆ ಕೈಗೆತ್ತಿಕೊಳ್ಳುವ ಇರಾದೆಯಲ್ಲಿದೆ.

ಸದ್ಯ ಕೊಚ್ಚಿಯಲ್ಲಿ 10 ಶಿ ಟ್ಯಾಕ್ಸಿ ಕ್ಯಾಬ್‌ಗಳು ಲಭ್ಯವಾಗಲಿದೆ. ಮುಂದಿನ ದಿನಗಳಲ್ಲಿ ಉತ್ತರ ಮಲಬಾರ್‌ನ ಕಲ್ಲಿಕೋಟೆ ನಗರದಲ್ಲೂ ಪರಿಚಯವಾಗಲಿದೆ ಎಂದು ಕೇರಳ ಸಚಿವರಾದ ಎಂ. ಕೆ. ಮುನೀರ್ ತಿಳಿಸಿದ್ದಾರೆ.

ಮಾತು ಮುಂದುವರಿಸಿರುವ ಅವರು, ಕೇರಳದ್ಯಾಂತ ಎಲ್ಲ ಪ್ರಮುಖ ನಗರಗಳಲ್ಲಿ 250ರಷ್ಟು ಶಿ ಟ್ಯಾಕ್ಸಿ ಪರಿಚಯಿಸಲಾಗುವುದು ಎಂದಿದ್ದಾರೆ.

ಅಂದ ಹಾಗೆ ದೇಶದ ನಂಬರ್ ವನ್ ಕಾರು ಸಂಸ್ಥೆಯಾಗಿರುವ ಮಾರುತಿ ಸುಜುಕಿ, ಶಿ ಟ್ಯಾಕ್ಸಿ‌ ಯೋಜನೆಗಾಗಿ ಕಾರುಗಳನ್ನು ಒದಗಿಸಲಿದೆ. ಇದು ವಿಶೇಷವಾದ ಗುಲಾಬಿ ಹಾಗೂ ಶ್ವೇತ ಬಣ್ಣದ ಮಿಶ್ರಣವನ್ನು ಹೊಂದಿದೆ.

ವೈಶಿಷ್ಟ್ಯತೆಗಳು

ಈ ಕಾರಿನಲ್ಲಿ ಜಿಪಿಎಸ್, ನಿಖರ ಮಾಪಕ ವ್ಯವಸ್ಥೆ. ಎಲ್‌ಸಿಡಿ ಸಿಸ್ಟಂ, ವೈಯಕ್ತಿಕ ಮತ್ತು ತುರ್ತು ಎಚ್ಚರಿಕೆಯ ವ್ಯವಸ್ಥೆಗಳು, ಮನರಂಜನೆ ಮತ್ತು ಇನ್ನಿತರ ಹಲವಾರು ಸೌಕರ್ಯಗಳನ್ನು ಒಳಗೊಂಡಿರಲಿದೆ.

ಸುರಕ್ಷತೆ

ಇದರ ಜತೆಗೆ ಸುರಕ್ಷಾ ಮಾನದಂಡಗಳಿಗೂ ಹೆಚ್ಚಿನ ಆದ್ಯತೆ ಕೊಡಲಾಗಿದ್ದು, ಚಾಲಕಿ ಹಾಗೂ ಪ್ರಯಾಣಿಕರಿಗೆ ಎಮರ್ಜನ್ಸಿ ಅಲರ್ಟ್ ಸ್ವಿಚ್ ಅಂತೆಯೇ ಮಹಿಳಾ ಚಾಲಕರಿಯರಿಗೆ ಸೇಫ್ಟಿ ಅಲರ್ಟ್ ಮೊಬೈಲ್ ಅಪ್ಲಿಕೇಷನ್ ವ್ಯವಸ್ಥೆಯಿರುತ್ತದೆ.

ಕೇರಳ ಸರಕಾರದ ಸಾಮಾಜಿಕ ನ್ಯಾಯ ಇಲಾಖೆಯ ಜೆಂಡರ್ ಪಾರ್ಕ್ ಸಂಸ್ಥೆ, ಈ ಮಹತ್ತರ ಶಿ ಟ್ಯಾಕ್ಸಿ ಯೋಜನೆಯನ್ನು ಕೈಗೆತ್ತಿಕೊಂಡಿದೆ. ಈ ಮೂಲಕ ಪುರುಷರಿಗೆ ಮಹಿಳೆಯರು ಸಹ ಸರಿಸಮಾನರು ಎಂಬ ಏಕರೂಪದ ವೇದಿಕೆ ರೂಪಿಸಲು ಸಂಸ್ಥೆ ಕಟುಬದ್ಧವಾಗಿದೆ.