ಕ್ಯಾಲೆಂಡರ್ ವರ್ಷದಲ್ಲಿ ಸ್ಕೋಡಾ 10 ಲಕ್ಷ ಸೇಲ್ಸ್ ಗುರಿ

ಜೆಕ್ ಗಣರಾಜ್ಯದ ಐಕಾನಿಕ್ ವಾಹನ ತಯಾರಿಕ ಸಂಸ್ಥೆಯಾಗಿರುವ ಸ್ಕೋಡಾ, ಕ್ಯಾಲೆಂಡರ್ ವರ್ಷವೊಂದರಲ್ಲಿ ಒಂದು ಮಿಲಿಯನ್ ವಾಹನಗಳ ಮಾರಾಟವನ್ನು ಗುರಿಯಿರಿಸಿಕೊಂಡಿದೆ.

ಸ್ಕೋಡಾಗೆ ಈ ಐತಿಹಾಸಿಕ ಮೈಲುಗಲ್ಲನ್ನು ತಲುಪಲು ಇನ್ನು ಸ್ವಲ್ಪ ದೂರವಷ್ಟೇ ಸಾಗಬೇಕಾಗಿದೆ. ಸಂಸ್ಥೆಯು ಈಗಾಗಲೇ 2014ನೇ ಸಾಲಿನ ಜನವರಿಯಿಂದ ನವೆಂಬರ್ ವರೆಗಿನ ಮೊದಲ 11 ತಿಂಗಳಲ್ಲಿ 9,55,300 ಯುನಿಟ್‌ಗಳ ಮಾರಾಟ ಕಂಡುಕೊಂಡಿದೆ.

ನವೆಂಬರ್ ತಿಂಗಳಲ್ಲಿ ಮಾತ್ರವಾಗಿ ಜಾಗತಿಕವಾಗಿ 90,200 ಯುನಿಟ್‌ಗಳ ಮಾರಾಟ ಕಂಡುಕೊಂಡಿರುವ ಸ್ಕೋಡಾ ಸಂಸ್ಥೆಗೆ ಈ ದಾಖಲೆ ತುಲುಪುವುದು ಕಷ್ಟದ ವಿಚಾರವಲ್ಲ. ಈಗ ಎಲ್ಲರೂ ಸ್ಕೋಡಾ ಸಂಸ್ಥೆಯಿಂದ ಇಂತಹದೊಂದು ಘೋಷಣೆ ಹೊರ ಬೀಳುವುದನ್ನು ನಿರೀಕ್ಷಿಸುತ್ತಿದ್ದಾರೆ.

ಜಾಗತಿಕ ಮಾರುಕಟ್ಟೆಗೆ ಪರಿಗಣಿಸಿದಾಗ ಭಾರತದಲ್ಲಿ ಸ್ಕೋಡಾ ಕಾರುಗಳು ಅಷ್ಟೊಂದು ಜನಪ್ರಿಯವಾಗಿಲ್ಲ. ಇದನ್ನು ಮಧ್ಯಮ ವರ್ಗಕ್ಕಿಂತ ಮೇಲ್ಪಟ್ಟ ಶ್ರೀಮಂತ ಮಾಲಿಕರು ಖರೀದಿಸಲು ಇಷ್ಟಪಡುತ್ತಾರೆ. ಮಾರಾಟ ನಂತರದ ನಿರ್ವಹಣಾ ವೆಚ್ಚ ಕೂಡಾ ಹೆಚ್ಚಿರುವುದು ದೇಶದಲ್ಲಿ ಸ್ಕೋಡಾ ಕಾರುಗಳ ಹಿನ್ನೆಡೆಗೆ ಕಾರಣವಾಗಿದೆ.

ಇನ್ನೊಂದೆಡೆ ಚೀನಾದಲ್ಲಿ ಸ್ಕೋಡಾ ಕಾರುಗಳಿಗೆ ಅತಿ ಹೆಚ್ಚಿನ ಬೇಡಿಕೆಯಿದೆ. ಭಾರತದಲ್ಲಿ ಫ್ಯಾಬಿಯಾ ಹ್ಯಾಚ್‌ಬ್ಯಾಕ್, ಯೆಟಿ ಎಸ್‌ಯುವಿ, ರಾಪಿಡ್, ಒಕ್ಟಾವಿಯಾ ಹಾಗೂ ಸೂಪರ್ ಸೆಡಾನ್ ಕಾರುಗಳು ಮಾರಾಟದಲ್ಲಿದೆ.