ವೆಚ್ಚ ಕಡಿತ; 2 ಮಾರಾಟ ಮಳಿಗೆಗೆ ಬೀಗ ಜಡಿದ ಫೋಕ್ಸ್‌ವ್ಯಾಗನ್

ಜರ್ಮನಿಯ ಪ್ರಖ್ಯಾತ ವಾಹನ ತಯಾರಿಕ ಸಂಸ್ಥೆಯಾಗಿರುವ ಪೋಕ್ಸ್ ವ್ಯಾಗನ್ ಭಾರತದಲ್ಲಿ ತನ್ನದೇ ಆದ ಮಾರಾಟ ವಲಯವನ್ನು ಹೊಂದಿದೆ. ಪ್ರಸ್ತುತ ಸಂಸ್ಥೆಯೀಗ ವೆಚ್ಚ ಕಡಿತದ ಹಿನ್ನೆಲೆಯಲ್ಲಿ ತನ್ನ ಎರಡು ಮಾರಾಟ ಮಳಿಗೆಗೆ ಬೀಗ ಜಡಿದಿದೆ.

ಸಂಸ್ಥೆಯ ಬೆಂಗಳೂರು ಹಾಗೂ ದೆಹಲಿಯಲ್ಲಿರುವ ಸ್ಥಳೀಯ ಮಾರಾಟ ಕಚೇರಿಯನ್ನು ಮುಚ್ಚುಗಡೆಗೊಳಿಸಲಾಗಿದೆ. ಅಂದ ಹಾಗೆ ಪುಣೆಯ ಚಕನ್ ಘಟಕದಲ್ಲಿ ನಿರ್ಮಾಣವನ್ನು ಹೊಂದಿರುವ ಸಂಸ್ಥೆಯು ವಾರ್ಷಿಕವಾಗಿ 1,30,000 ಯುನಿಟ್‌ಗಳಷ್ಟು ವಾಹನಗಳನ್ನು ಉತ್ಪಾದಿಸುತ್ತಿದೆ.

ವಿಶೇಷವೆಂದರೆ ಫೋಕ್ಸ್‌ವ್ಯಾಗನ್‌ನಿಂದ ದೇಶದಲ್ಲಿ ನಿರ್ಮಾಣವಾಗುತ್ತಿರುವ ಶೇ.60ರಷ್ಟು ವಾಹನಗಳು ರಫ್ತಾಗುತ್ತಿದೆ. ಪ್ರಸ್ತುತ ಮಾರಾಟ ಹಿನ್ನಡೆಯಲ್ಲಿ ಹೊಸ ಉತ್ಪನ್ನಗಳತ್ತ ದೃಷ್ಟಿ ಹಾಯಿಸುತ್ತಿದೆ.

ನಿಮ್ಮ ಮಾಹಿತಿಗಾಗಿ ಫೆಬ್ರವರಿ 17ರಂದು ಫೋಕ್ಸ್‌ವ್ಯಾಗನ್ ಸಂಸ್ಥೆಯು ಜೆಟ್ಟಾ ಸೆಡಾನ್ ಕಾರಿನ ಪರಿಷ್ಕೃತ ಮಾದರಿಯನ್ನು ಬಿಡುಗಡೆ ಮಾಡಲಿದೆ. ಕೆಲವು ಸಮಯಗಳ ಹಿಂದೆಯಷ್ಟೇ ಪರಿಷ್ಕೃತ ಪೊಲೊ ಮಾದರಿಯನ್ನು ಪರಿಚಯಿಸಲಾಗಿತ್ತು. ಭಾರತದಲ್ಲಿ ಪೊಲೊ, ಕ್ರಾಸ್ ಪೊಲೊ, ವೆಂಟೊ ಹಾಗೂ ಜೆಟ್ಟಾ ಮಾದರಿಗಳು ಮಾರಾಟದಲ್ಲಿದೆ.