ಕಾದಿರಿ, ಹೊಸ ವರ್ಷಕ್ಕೆ ಹೋಂಡಾದಿಂದ ನೂತನ ಕೊಡುಗೆ

ಇಲ್ಲಿ ಗಮನಾರ್ಹ ಸಂಗತಿ ಏನೆಂದರೆ ಪ್ರಸ್ತುತ ಮಾರಾಟದಲ್ಲಿರುವ ಹೋಂಡಾ ಜಾಝ್ ಹ್ಯಾಚ್ ಬ್ಯಾಕ್ ಕಾರಿನ ತಹಳದಿಯಲ್ಲಿ ನೂತನ ಡಬ್ಲ್ಯುಆರ್-ವಿ ಕ್ರಾಸೋವರ್ ಕಾರು ನಿರ್ಮಾಣವಾಗುತ್ತಿದೆ.

2016 ಸಾವೊ ಪಾಲೊ ಮೋಟಾರು ಶೋದಲ್ಲಿ ಪ್ರದರ್ಶನ ಕಾಣಲಿರುವ ನೂತನ ಕಾನ್ಸೆಪ್ಟ್ ಕಾರು ವಿನ್ಯಾಸ ಹಾಗೂ ವೈಶಿಷ್ಟ್ಯಗಳ ವಿಚಾರದಲ್ಲಿ ಯಾವುದೇ ರಾಜಿಗೂ ತಯಾರಾಗಿಲ್ಲ

ಈ ಸಂಬಂಧ ಬ್ರೆಜಿಲ್ ವಾಹನ ಪ್ರೇಮಿಗಳಿಗಾಗಿ ಆಕರ್ಷಕ ರೇಖಾಚಿತ್ರವನ್ನು ಸಂಸ್ಥೆಯು ಬಿಡುಗಡೆಗೊಳಿಸಿದೆ. ಇದು ಪ್ರಮುಖವಾಗಿಯೂ ಯುವ ಗ್ರಾಹಕರನ್ನು ಗುರಿ ಮಾಡಲಿದೆ.

ಮುಂಭಾಗದಲ್ಲಿ ಶಕ್ತಿಯುತ ರೇಖೆಗಳ ಜೊತೆಗೆ ಕ್ರೋಮ್ ಗ್ರಿಲ್, ಫ್ರಂಟ್ ಹೆಡ್ ಲ್ಯಾಂಪ್ ಗಳು ಜಾಝ್ ಗಿಂತಲೂ ಆಕ್ರಮಣಕಾರಿ ನಿಲುವನ್ನು ಮೈಗೂಡಿಸಿಕೊಂಡಿದೆ.

ಜಾಝ್ ತರಹನೇ ಕಾರಿನ ಬದಿಯಲ್ಲಿ ಸ್ವಭಾವ ರೇಖೆಗಳು ಹಾದು ಹೋಗಲಿದೆ. ಇನ್ನು ದೊಡ್ಡದಾದ ಸ್ಟೈಲಿಷ್ ಅಲಾಯ್ ಚಕ್ರಗಳನ್ನು ನಿರೀಕ್ಷೆ ಮಾಡಬಹುದಾಗಿದೆ.

ಕಾರಿನೊಳಗೆ ಜಾಝ್ ರೀತಿಯಲ್ಲಿ ಗಮನಾರ್ಹ ವೈಶಿಷ್ಟ್ಯಗಳಿಗೆ ಮನೆ ಮಾಡಲಾಗುವುದು. ಹಾಗಿದ್ದರೂ ಪ್ರೀಮಿಯಂ ಸೌಲಭ್ಯಗಳಿಗೆ ಒತ್ತು ನೀಡಲಾಗುವುದು.

ಎರಡು ಎಂಜಿನ್ ಆಯ್ಕೆಗಳಲ್ಲಿ 2017 ಡಬ್ಲ್ಯುಆರ್-ವಿ ಆಗಮನವಾಗುವ ಸಾಧ್ಯತೆಯಿದೆ. ಇದು 1.2 ಲೀಟರ್ ಐ-ವಿಟೆಕ್ ಪೆಟ್ರೋಲ್ ಮತ್ತು ಅರ್ಥ್ ಡ್ರೀಮ್ಸ್ ಐ-ಡಿಟೆಕ್ ಡೀಸೆಲ್ ಎಂಜಿನ್ ಗಳನ್ನು ಪಡೆಯಲಿದೆ.

ಈ ಪೈಕಿ 90 ಅಶ್ವಶಕ್ತಿ ಉತ್ಪಾದಿಸಬಲ್ಲ 1.2 ಲೀಟರ್ ಎಂಜಿನ್ ಮ್ಯಾನುವಲ್ ಜೊತೆಗೆ ಆಟೋಮ್ಯಾಟಿಕ್ ಗೇರ್ ಬಾಕ್ಸ್ ಗಳನ್ನು ಪಡೆಯಲಿದೆ. ಇನ್ನೊಂದೆಡೆ 1.5 ಲೀಟರ್ ಡೀಸೆಲ್ ಎಂಜಿನ್ 100 ಅಶ್ವಶಕ್ತಿ ಉತ್ಪಾದಿಸಲಿದ್ದು, ಆರು ಸ್ಪೀಡ್ ಮ್ಯಾನುವಲ್ ಟ್ರಾನ್ಸ್ ಮಿಷನ್ ಗಿಟ್ಟಿಸಿಕೊಳ್ಳಲಿದೆ.

ಹಾಗೊಂದು ವೇಳೆ 2017 ಮಾರ್ಚ್ ವೇಳೆಯಲ್ಲಿ ಭಾರತದಲ್ಲಿ ಬಿಡುಗಡೆ ಭಾಗ್ಯ ಕಂಡ್ಡಲ್ಲಿ ನೂತನ ಕಾರು ಹ್ಯುಂಡೈ ಐ20 ಆಕ್ಟಿವ್, ಟೊಯೊಟಾ ಎಟಿಯೋಸ್ ಕ್ರಾಸ್, ಫೋಕ್ಸ್ ವ್ಯಾಗನ್ ಕ್ರಾಸ್ ಪೊಲೊ ಮತ್ತು ಫಿಯೆಟ್ ಅರ್ಬನ್ ಕ್ರಾಸ್ ಮಾದರಿಗಳಿಗೆ ಪೈಪೋಟಿಯನ್ನು ಒಡ್ಡಲಿದೆ.