ಹ್ಯುಂಡೈ ಎಎಂಟಿ ಕಾರುಗಳಿಂದ ಮಾರುತಿಗೆ ಕಾದಿದೆ ಅಪಾಯ?

ಆಟೋಮ್ಯಾಟಡ್ ಮ್ಯಾನುವಲ್ ಟ್ರಾನ್ಸ್ ಮಿಷನ್ ವಿಭಾಗದಲ್ಲೂ ಮಾರುತಿ ಗಮನಾರ್ಹ ಮಾರಾಟವನ್ನು ಕಾಪಾಡಿಕೊಂಡಿದೆ. ಇದಕ್ಕೀಗ ಹ್ಯುಂಡೈ ಕಾರುಗಳಿಂದ ಪ್ರಬಲ ಪ್ರತಿಸ್ಪರ್ಧೆಯು ಎದುರಾಗಲಿದೆ.

ಮಾರಾಟಕ್ಕೆ ಉತ್ತೇಜನ ನೀಡಲು ಮುಂದಾಗುತ್ತಿರುವ ಹ್ಯುಂಡೈ ಎಎಂಟಿ ಕಾರುಗಳನ್ನು ಭಾರತದಲ್ಲಿ ಬಿಡುಗಡೆ ಮಾಡಲಿದೆ. ಇದು ತಮಿಳುನಾಡಿನ ಘಟಕದಲ್ಲಿ ನಿರ್ಮಾಣವಾಗಲಿದೆ.

ಹ್ಯುಂಡೈ ಎಎಂಟಿ ಕಾರುಗಳು ಮಾರುತಿಗೆ ಅಪಾಯವನ್ನು ಸೃಷ್ಟಿ ಮಾಡಲಿದೆ ಎಂಬುದು ವಾಹನ ವಿಶ್ಲೇಷಕರ ಮುನ್ನೋಟವಾಗಿದೆ. ಈ ನಿಟ್ಟಿನಲ್ಲಿ ಹ್ಯುಂಡೈ ಮೊದಲ ಹೆಜ್ಜೆಯನ್ನಿಟ್ಟಿದೆ.

ಪ್ರಸ್ತುತ ಮಾರುಕಟ್ಟೆಯಲ್ಲಿ ಗ್ರಾಂಡ್ ಐ10, ಎಲಂಟ್ರಾ ಮತ್ತು ವೆರ್ನಾ ಆಟೋಮ್ಯಾಟಿಕ್ ಗೇರ್ ಬಾಕ್ಸ್ ಆವೃತ್ತಿಗಳನ್ನು ಹ್ಯುಂಡೈ ಒದಗಿಸುತ್ತಿದೆ.

ಮಗದೊಂದು ಕಡೆ ಸೆಲೆರಿಯೊ, ಆಲ್ಟೊ ಕೆ10, ಸ್ವಿಫ್ಟ್ ಡಿಜೈರ್ ಮತ್ತು ವ್ಯಾಗನಾರ್ ಮಾದರಿಗಳಲ್ಲಿ ಮಾರುತಿ ಎಎಂಟಿ ಆಯ್ಕೆಯನ್ನು ನೀಡುತ್ತಿದೆ.

ನಗರ ಚಾಲನೆಗೆ ಆಟೋಮ್ಯಾಟಡ್ ಮ್ಯಾನುವಲ್ ಟ್ರಾನ್ಸ್ ಮಿಷನ್ ಆಯ್ಕೆಯೂ ಹೆಚ್ಚು ಸೂಕ್ತವೆನಿಸಲಿದೆ. ಇದು ಕೂಡಾ ಜನಪ್ರಿಯತೆಯನ್ನು ಹೆಚ್ಚಿಸಿದೆ.

ಇಯಾನ್ ಸೇರಿದಂತೆ ಎಕ್ಸ್ ಸೆಂಟ್ ಮತ್ತು ಮುಂಬರುವ ಸ್ಯಾಂಟ್ರೊ ಮಾದರಿಗಳಲ್ಲಿ ಎಎಂಟಿ ಆಯ್ಕೆಗಳನ್ನು ನೀಡುವುದು ಹ್ಯುಂಡೈ ಗುರಿಯಾಗಿರಲಿದೆ.

ಎಎಂಟಿ ತಂತ್ರಗಾರಿಕೆಯನ್ನು ದೇಶದಲ್ಲೇ ಅಭಿವೃದ್ಧಿಪಡಿಸುವ ಮೂಲಕ ಗಮನಾರ್ಹ ಬೆಲೆಯನ್ನು ಕಾಪಾಡಿಕೊಳ್ಳುವ ಇರಾದೆಯನ್ನು ಹ್ಯುಂಡೈ ಹೊಂದಿದೆ.