ಹೊಸ ವರ್ಷಕ್ಕೆ ಹ್ಯುಂಡೈ ಶಾಕ್; 1 ಲಕ್ಷದ ವರೆಗೆ ಬೆಲೆ ಏರಿಕೆ

ಹೊಸ ವರ್ಷದಿಂದ ಹ್ಯುಂಡೈ ಕಾರುಗಳು ದುಬಾರಿಯೆನಿಸಲಿದ್ದು, ಒಂದು ಲಕ್ಷ ರುಪಾಯಿಗಳ ವರೆಗೆ ಬೆಲೆ ಏರಿಕೆಯಾಗಲಿದೆ.

By Nagaraja

Published: Wednesday, December 14, 2016, 10:42 [IST]

ಕಚ್ಚಾ ವಸ್ತುಗಳ ಬೆಲೆ ಏರಿಕೆಯಿಂದಾಗಿ ನಿರ್ಮಾಣ ವೆಚ್ಚ ಗಣನೀಯವಾಗಿ ಹೆಚ್ಚಿರುವುದರಿಂದ ದೇಶದೆಲ್ಲ ಮುಂಚೂಣಿಯ ವಾಹನ ಸಂಸ್ಥೆಗಳು ಹೊಸ ವರ್ಷದಿಂದ ಬೆಲೆ ಏರಿಕೆ ನೀತಿಯನ್ನು ಅನುಸರಿಸುತ್ತಿದೆ. ಇದಕ್ಕೀಗ ದಕ್ಷಿಣ ಕೊರಿಯಾ ಮೂಲದ ದೇಶದ ಎರಡನೇ ಅತಿ ದೊಡ್ಡ ಪ್ರಯಾಣಿಕ ಕಾರು ಸಂಸ್ಥೆ ಹ್ಯುಂಡೈ ಮೋಟಾರ್ಸ್ ಇಂಡಿಯಾ ಸೇರ್ಪಡೆಗೊಂಡಿದೆ.

ಹೊಸ ವರ್ಷಕ್ಕೆ ಹ್ಯುಂಡೈ ಶಾಕ್; 1 ಲಕ್ಷದ ವರೆಗೆ ಬೆಲೆ ಏರಿಕೆ

ಹೊಸ ವರ್ಷದ ಸಂಭ್ರಮದ ವೇಳೆಯಲ್ಲಿ ಗ್ರಾಹಕರಿಗೆ ಶಾಕ್ ನೀಡಲಿರುವ ಹ್ಯುಂಡೈ, ತನ್ನೆಲ್ಲ ಶ್ರೇಣಿಯ ಕಾರುಗಳಿಗೆ ಗರಿಷ್ಠ ಒಂದು ಲಕ್ಷ ರುಪಾಯಿಗಳ ವರೆಗೆ ಬೆಲೆ ಏರಿಕೆಗೊಳಿಸಲಿದೆ.

ಭಾರತದಲ್ಲಿ ಎಂಟ್ರಿ ಲೆವೆಲ್ ಇಯಾನ್ ಹ್ಯಾಚ್ ಬ್ಯಾಕ್ ಕಾರಿನಿಂದ ಹಿಡಿದು ಸಾಂಟಾ ಫೆ ಪ್ರೀಮಿಯಂ ಕ್ರೀಡಾ ಬಳಕೆಯ ವಾಹನವನ್ನು ಮಾರಾಟ ಮಾಡುತ್ತಿದೆ.

ಇತ್ತೀಚೆಗಷ್ಟೇ ಬಿಡುಗಡೆಗೊಂಡಿರುವ ಹ್ಯುಂಡೈ ಟಕ್ಸನ್ ಕ್ರೀಡಾ ಬಳಕೆಯ ವಾಹನಕ್ಕೂ ಬೆಲೆ ಏರಿಕೆ ಬಿಸಿ ತಟ್ಟಲಿದೆ.

ನಿರ್ಮಾಣ ವೆಚ್ಚ ಏರಿಕೆ, ವಿದೇಶ ವಿನಿಮಯ ದರಗಳ ಏರಿಳಿತ ಮತ್ತು ಮಾರ್ಕೆಟಿಂಗ್ ವೆಚ್ಚ ಹೆಚ್ಚಿರುವುದು ಬೆಲೆ ಏರಿಕೆಗೆ ಕಾರಣವಾಗಿದೆ ಎಂದು ಹ್ಯುಂಡೈ ಪ್ರಕಟಣೆಯಲ್ಲಿ ತಿಳಿಸಿದೆ.

ಹ್ಯುಂಡೈ ಬೆಲೆ ಏರಿಕೆ ನೀತಿಯು 2017 ಜನವರಿ ತಿಂಗಳಿಂದಲೇ ಜಾರಿಗೆ ಬರಲಿದೆ. ಇದರಿಂದಾಗಿ ಈ ವರ್ಷಾಂತ್ಯದ ವೇಳೆಯಲ್ಲಿ ಹೆಚ್ಚಿನ ಮಾರಾಟವನ್ನು ನಿರೀಕ್ಷೆ ಮಾಡುತ್ತಿದೆ.

ಇದಕ್ಕೂ ಮೊದಲು ನಿಸ್ಸಾನ್, ಟಾಟಾ ಮೋಟಾರ್ಸ್ ಹಾಗೂ ಟೊಯೊಟಾಗಳಂತಹ ವಾಹನ ಸಂಸ್ಥೆಗಳು ಬೆಲೆ ಏರಿಕೆ ನೀತಿಯನ್ನು ಪ್ರಕಟಿಸಿದ್ದವು. ಪ್ರಸ್ತುತ ಪಟ್ಟಿಗೀಗ ಮತ್ತಷ್ಟು ವಾಹನ ಸಂಸ್ಥೆಗಳು ಸೇರ್ಪಡೆಯಾಗುವ ಸಾಧ್ಯತೆಯಿದೆ.