Click it and Unblock the Notifications
ಪೆಟ್ರೋಲ್ ಆವೃತ್ತಿಯಲ್ಲೂ ಬರಲಿರುವ ಮಾರುತಿ ವಿಟಾರಾ ಬ್ರಿಝಾ
ಬಿಡುಗಡೆಯಾದ ಎರಡು ದಿನಗಳೊಳಗೆ 5,000ಕ್ಕೂ ಹೆಚ್ಚು ಬುಕ್ಕಿಂಗ್ಸ್ ದಾಖಲಿಸಿರುವ ಮಾರುತಿ ಸುಜುಕಿ ವಿಟಾರಾ ಬ್ರಿಝಾ ಆರಂಭಿಕ ಯಶಸ್ಸಿನಿಂದ ಪುಳಕಿತಗೊಂಡಿರುವ ದೇಶದ ಅಗ್ರ ಪ್ರಯಾಣಿಕ ಕಾರು ಸಂಸ್ಥೆ ಮಾರುತಿ ಸುಜುಕಿ, ವಿಟಾರಾ ಸಾಲಿಗೆ ಪೆಟ್ರೋಲ್ ಎಂಜಿನ್ ಸೇರಿಸುವ ಆಸಕ್ತಿಯನ್ನು ಹೊಂದಿದೆ.
2016 ಆಟೋ ಎಕ್ಸ್ ಪೋದಲ್ಲಿ ಭರ್ಜರಿ ಅನಾವರಣಗೊಂಡಿರುವ ವಿಟಾರಾ ಬ್ರಿಝಾ ಈಗಷ್ಟೇ ಬಿಡುಗಡೆ ಭಾಗ್ಯ ಕಂಡಿತ್ತು. ಬಿಡುಗಡೆ ವೇಳೆ ಡೀಸೆಲ್ ಎಂಜಿನ್ ಆಯ್ಕೆಯಲ್ಲಿ ಮಾತ್ರ ಲಭ್ಯವಾಗಿದ್ದ ವಿಟಾರಾ ಬ್ರಿಝಾ ಈಗ ಪೆಟ್ರೋಲ್ ಮಾದರಿಯಲ್ಲೂ ಆಗಮನವಾಗುವ ಸಾಧ್ಯತೆಯಿದೆ.
ಬಲ್ಲ ಮೂಲಗಳ ಪ್ರಕಾರ ನಿಕಟ ಭವಿಷ್ಯದಲ್ಲೇ ಮಾರುತಿ ಸುಜುಕಿ ವಿಟಾರಾ ಬ್ರಿಝಾ 1.0 ಲೀಟರ್ ಟರ್ಬೊ ಪೆಟ್ರೋಲ್ ಎಂಜಿನ್ ಆಯ್ಕೆಯಲ್ಲಿ ಲಭ್ಯವಾಗುವ ಸಾಧ್ಯತೆಯಿದೆ. ಇದು ಕಾಂಪಾಕ್ಟ್ ಕ್ರೀಡಾ ಬಳಕೆಯ ವಿಭಾಗದಲ್ಲಿ ಮತ್ತಷ್ಟು ಶಕ್ತಿಶಾಲಿ ಎನಿಸಿಕೊಳ್ಳಲು ನೆರವಾಗಲಿದೆ.
ಇನ್ನೊಂದೆಡೆ ಮಾರುತಿಯ ಜನಪ್ರಿಯ ಸ್ವಿಫ್ಟ್ ಮಾದರಿಯಲ್ಲಿ 83.1 ಅಶ್ವಶಕ್ತಿ ಉತ್ಪಾದಿಸಬಲ್ಲ 1.2 ಲೀಟರ್ ಎಂಜಿನ್ ಆಳವಡಿಸಲಾಗಿದೆ. ಆದರೆ ಇದು ಎಸ್ ಯುವಿ ಕಾರಿನಲ್ಲಿ ಆಳವಡಿಸಿದರೆ ಕಡಿಮೆ ಶಕ್ತಿಶಾಲಿಯಾಗಿರಲಿದೆ.
ಹಾಗಿದ್ದರೂ ಕ್ರೀಡಾ ಬಳಕೆಯ ವಾಹನಕ್ಕೆ ಹೆಚ್ಚಿನ ಶಕ್ತಿ ಅಗತ್ಯವಿರುವುದರಿಂದ ಶಕ್ತಿಶಾಲಿ ಎಂಜಿನ್ ಆಳವಡಿಸಲಾಗುವುದೇ ಎಂಬುದು ಇನ್ನು ತಿಳಿದು ಬಂದಿಲ್ಲ. ಮಾರುತಿಯ ಪ್ರೀಮಿಯಂ ಕಾರುಗಳಾಗಿರುವ ಸಿಯಾಝ್ ಮತ್ತು ಎರ್ಟಿಗಾದಲ್ಲಿ 1.4 ಲೀಟರ್ ಎಂಜಿನ್ ಬಳಕೆಯಾಗಿದೆ.
ಅತ್ತ 1200 ಸಿಸಿ ಮೇಲ್ಪಟ್ಟ ಎಂಜಿನ್ ಕಾರುಗಳು ಹೆಚ್ಚಿನ ತೆರಿಗೆ ಪಾವತಿಸಬೇಕಾಗಿರುವುದರಿಂದ ಮಾರುತಿ ಇಂತಹದೊಂದು ನಡೆ ಅನುಸರಿಸುವ ಸಾಧ್ಯತೆ ಕಡಿಮೆಯಾಗಿದೆ. ಇವೆಲ್ಲದರಿಂದ 1.0 ಲೀಟರ್ ಟರ್ಬೊ ಪೆಟ್ರೋಲ್ ಎಂಜಿನ್ ಹೆಚ್ಚು ಸೂಕ್ತವೆನಿಸಲಿದೆ.
ಬಲೆನೊ ಆರ್ಎಸ್ ಕಾರಿನಲ್ಲೂ ಬೂಸ್ಟರ್ ಜೆಟ್ ಎಂಜಿನ್ ಆಳವಡಿಕೆಯಾಗಲಿದೆ. ಇಲ್ಲಿಂದಲೇ ಜಾಗತಿಕ ಮಾರುಕಟ್ಟೆಗೂ ರಫ್ತು ಮಾಡುವ ಯೋಜನೆಯನ್ನು ಸಂಸ್ಥೆ ಹೊಂದಿದೆ.
ಸುಜುಕಿಯ ಬೂಸ್ಟರ್ ಜೆಟ್ ಫ್ಯಾಮಿಲಿಗೆ ಸೇರಿದ 1.0 ಲೀಟರ್ ಪೆಟ್ರೋಲ್ ಎಂಜಿನ್, 996 ಸಿಸಿ ಟರ್ಬೊ ಪೆಟ್ರೋಲ್ ಎಂಜಿನ್ 110 ಅಶ್ವಶಕ್ತಿಯನ್ನು ಉತ್ಪಾದಿಸುವ ಸಾಮರ್ಥ್ಯ ಹೊಂದಿರುತ್ತದೆ. ಅಲ್ಲದೆ ಗರಿಷ್ಠ ಇಂಧನ ಕ್ಷಮತೆ ಕಾಪಾಡುವುದರತ್ತ ಮಾರುತಿ ಕಾರ್ಯ ಮಗ್ನವಾಗಿದೆ.
Continue with Google