ಮುಂಬೈ ಬಂದರಿನಿಂದ ಏಕಕಾಲಕ್ಕೆ ದಾಖಲೆಯ 6316 ಕಾರುಗಳ ರಫ್ತು!

ಹಡಗು ಸಚಿವಾಲಯ ಬಿಡುಗಡೆ ಮಾಡಿರುವ ಪತ್ರಿಕಾ ಪ್ರಕಟಣೆಯ ಪ್ರಕಾರ ಮುಂಬೈ ಬಂದರಿನಿಂದ ಏಕಕಾಲಕ್ಕೆ 6316ರಷ್ಟು ಕಾರುಗಳನ್ನು ರಫ್ತು ಮಾಡಲಾಗಿದೆ.

ಹೊಸತಾದ ಲಂಗರುದಾಣ ಒಸಿಟಿ-2 ಕಣದಿಂದ 6316ರಷ್ಟು ಕಾರುಗಳನ್ನು ರಫ್ತು ಮಾಡಲಾಗಿದೆ. ಈ ಹಿಂದೆ ಒಂದೇ ಸಮಯದಲ್ಲಿ 5376 ಕಾರುಗಳನ್ನು ರಫ್ತು ಮಾಡಿರುವುದು ಇದುವರೆಗಿನ ದಾಖಲೆಯಾಗಿತ್ತು.

ಎಂ.ವಿ. ಹೋಗ್ ಸೈಂಟ್ ಪೀಟರ್ಸ್ ಬರ್ಗ್ ಎಂಬ ಹಡಗು ದಾಖಲೆಯ ಕಿರೀಟ ಧರಿಸಿದ್ದು, 2016 ಆಗಸ್ಟ್ 6ರಂದು ಟಿಕಾಣಿ ಹೂಡಿದ್ದ ಹಡಗು ಆಗಸ್ಟ್ 9ರಂದು 6316 ಕಾರುಗಳೊಂದಿಗೆ ಪ್ರಯಾಣ ಬೆಳೆಸಿತ್ತು.

ಈ ಪೈಕಿ 3115 ಕಾರುಗಳು ಜನರಲ್ ಮೋಟಾರ್ಸ್ ಮತ್ತು 3093 ಕಾರುಗಳು ಫೋಕ್ಸ್ ವ್ಯಾಗನ್ ಸಂಸ್ಥೆಗೆ ಸೇರಿದ್ದಾಗಿದೆ. ಈ ಎಲ್ಲ ಕಾರುಗಳನ್ನು ಮೆಕ್ಸಿಕೊಗೆ ರಫ್ತು ಮಾಡಲಾಗಿದೆ.

'ಮೇಕ್ ಇನ್ ಇಂಡಿಯಾ' ಯೋಜನೆಗೆ ತನ್ನ ಬದ್ಧತೆಯನ್ನು ಪ್ರದರ್ಶಿಸಿರುವ ಮುಂಬೈ ಪೋರ್ಟ್ ಟ್ರಸ್ಟ್, ದೇಶದಿಂದ ಕಾರು ರಫ್ತು ಮಾಡುವುದರಲ್ಲಿ ಮುಂಚೂಣಿಯಲ್ಲಿದೆ.

ಮೂಲ ಸೌಕರ್ಯಗಳನ್ನು ಹೆಚ್ಚಿಸುವ ಮೂಲಕ ಸರಕು ನಿರ್ವಹಣಾ ವೆಚ್ಚವನ್ನು ಗಣನೀಯವಾಗಿ ಕಡಿಮೆ ಮಾಡುವುದತ್ತವೂ ಮುಂಬೈ ಬಂದರು ಗಮನ ಕೇಂದ್ರಿಕರಿಸಿದೆ.

ಪಶ್ಚಿಮ ಭಾರತದ ಸಮುದ್ರ ತಟದಲ್ಲಿ ಸ್ಥಿತಗೊಂಡಿರುವ ಮುಂಬೈ ಬಂದರು ಕಳೆದ ಕೆಲವು ವರ್ಷಗಳಲ್ಲಿ ಶೇಕಡಾ 25ರಷ್ಟು ವೃದ್ಧಿಯನ್ನು ಸಾಧಿಸಿದೆ.