ಸಮುದ್ರ ಮಟ್ಟಕ್ಕಿಂತ 13 ಸಾವಿರ ಅಡಿ ಎತ್ತರದಲ್ಲಿ ಎಲೆಕ್ಟ್ರಿಕ್ ಬಸ್ ಸಂಚಾರ

ಗಗನಕ್ಕೆ ತಲುಪಿದ ಹಾಗೆಯೇ ಸಮುದ್ರ ಮಟ್ಟಕ್ಕಿಂತ 13 ಸಾವಿರ ಅಡಿ ಎತ್ತರದಲ್ಲಿರುವ ರೋಹಟಂಗ್ ಪಾಸ್, ವಿಶ್ವದ ಅತಿ ಎತ್ತರದ ವಾಹನ ಸಂಚಾರ ಪ್ರದೇಶಗಳಲ್ಲಿ ಒಂದಾಗಿದೆ. ಇಲ್ಲಿ ಗಾಡಿ ಓಡಿಸಲು ಕೌಶಲ್ಯಗಿಂತಲೂ ಹೆಚ್ಚಾಗಿ ಧಮ್ ಇದ್ದೇ ಇರಬೇಕು.

ಸಮುದ್ರ ಮಟ್ಟದಿಂದ 13,050 ಅಡಿ ಎತ್ತರದಲ್ಲಿರುವ ರೋಹಟಂಗ್ ಪಾಸ್ ನಲ್ಲಿ ಹಿಮಾಚಲ ಸಾರಿಗೆ ಇಲಾಖೆಯು ಪರಿಸರ ಸ್ನೇಹಿ ಎಲೆಕ್ಟ್ರಿಕ್ ಬಸ್ಸುಗಳ ಪರೀಕ್ಷೆಯನ್ನು ನಡೆಸಿದೆ.

ಹಾಗಿದ್ದರೂ ಎಲೆಕ್ಟ್ರಿಕ್ ಬಸ್ಸುಗಳ ಗ್ರೌಂಡ್ ಕ್ಲಿಯರನ್ಸ್ ಇನ್ನು ಹಿಮಾಲಯ ಪರ್ವತ ಪ್ರದೇಶಗಳ ರಸ್ತೆಗಳಲ್ಲಿ ಸಮಸ್ಯೆಯಾಗಿ ಪರಿಣಮಿಸಿದೆ ಎಂದು ಮೂಲಗಳು ತಿಳಿಸಿವೆ.

ಮಾನಾಲಿ ಮತ್ತು ರೋಹಟಂಗ್ ಪ್ರದೇಶದಲ್ಲಿ ಎಲೆಕ್ಟ್ರಿಕ್ ಬಸ್ಸುಗಳನ್ನು ಮಹತ್ತರ ಯೋಜನೆಯನ್ನು ಹಿಮಾಚಲ ಪ್ರದೇಶ ಸಾರಿಗೆ ಇಲಾಖೆಯು ಹೊಂದಿದೆ. ಈ ನಿಟ್ಟಿನಲ್ಲಿ ಕಠಿಣ ಚಾಲನಾ ಪರೀಕ್ಷೆಯನ್ನು ಹಮ್ಮಿಕೊಳ್ಳಲಾಗುತ್ತಿದೆ.

ಇದರೊಂದಿಗೆ 13,050 ಅಡಿ ಎತ್ತರದಲ್ಲಿ ವಿದ್ಯುತ್ ಚಾಲಿತ ಬಸ್ಸನ್ನು ಓಡಿಸಿದ ದೇಶದ ಮೊದಲ ರಾಜ್ಯವೆಂಬ ಹೆಗ್ಗಳಿಕೆಗೆ ಹಿಮಾಚಲ ಪ್ರದೇಶ ಪಾತ್ರವಾಗಿದೆ.

ಪರೀಕ್ಷಾರ್ಥ ಚಾಲನೆ ಪರೀಕ್ಷೆಯ ವೇಳೆ ಅನೇಕ ಸವಾಲುಗಳು ಎದುರಾಗಿದ್ದವು. ಮಾನಾಲಿಯಿಂದ ರೋಹಟಂಗ್ ವರೆಗಿನ 50 ಕೀ.ಮೀ. ದೂರದ ಯಾತ್ರೆಯಲ್ಲಿ 40 ಮಂದಿ ಪ್ರಯಾಣಿಯಕರನ್ನು ಹೊತ್ತೊಯ್ಯಲಾಗಿತ್ತು.

ಈ ದೂರವನ್ನು ತಲುಪಲು ಶೇಕಡಾ 28ರಿಂದ 30ರಷ್ಟು ಬ್ಯಾಟರಿ ವ್ಯಯವಾಗಿದೆ. ಇನ್ನು ಒಂದೆರಡು ಸಂಸ್ಥೆಗಳು ಪ್ರಾಯೋಗಿಕ ಸಂಚಾರವನ್ನು ನಡೆಸಲಿದ್ದು, ಗ್ರೌಂಡ್ ಕ್ಲಿಯರನ್ಸ್ ಹೆಚ್ಚಿಸುವಂತೆ ಹಿಮಾಚಲ ಪ್ರದೇಶ ಸಾರಿಗೆ ಇಲಾಖೆಯು ಸೂಚನೆ ನೀಡಿದೆ.

ಪೆಟ್ರೋಲ್ ಹಾಗೂ ಡೀಸೆಲ್ ಚಾಲಿತ ವಾಹನಗಳಿಗೆ ಬದಲಿ ಪರ್ಯಾಯ ವ್ಯವಸ್ಥೆಯನ್ನು ಹುಡುಕಲಾಗುತ್ತಿದೆ. ಸದ್ಯ 25 ಎಲೆಕ್ಟ್ರಿಕ್ ಬಸ್ಸುಗಳನ್ನು ರಸ್ತೆಗಿಳಿಸುವ ಯೋಜನೆಯನ್ನು ಹೊಂದಲಾಗಿದೆ.

ಇವನ್ನೂ ಓದಿ

ದೇಶದ ಶ್ರೇಷ್ಠ ಚಾಲಕರು ಯಾವ ರಾಜ್ಯದವರು ?