ಹೋಂಡಾ ಸಿಬಿಆರ್ 150 ಆರ್, ಸಿಬಿಆರ್ 250ಆರ್ ಬೈಕುಗಳ ಉತ್ಪಾದನೆ ಸ್ಥಗಿತ

ಈ ವರ್ಷದ ಕಳೆದ ಏಪ್ರಿಲ್ 1ರಿಂದ ಹೋಂಡಾ ಸಂಸ್ಥೆಯು ಈ ಎರಡೂ ಮಾದರಿಗಳ ಒಂದೂ ಬೈಕನ್ನು ಸಹ ತಯಾರಿಸಿಲ್ಲ ಎಂದು ಮನಿ ಕಾಂಟ್ರೋಲ್ ವರದಿ ಮಾಡಿದೆ. ಮಾರ್ಚ್ 30-31ರ ಒಳಗಾಗಿ ಈ ಬೈಕುಗಳ ಹಳೆಯ ಸ್ಟಾಕ್ ರಿಯಾಯಿತಿಯೊಂದಿಗೆ ಮಾರಾಟ ಮಾಡಲಾಗಿದೆ ಎಂದು ವರದಿ ಮಾಡಿದೆ.

ಎರಡೂ ಮೋಟಾರ್ ಸೈಕಲ್‌ಗಳು ಬಿಎಸ್-3 ಎಂಜಿನ್ ಆಯ್ಕೆಯನ್ನು ಹೊಂದಿದ್ದವು ಎನ್ನಲಾಗಿದ್ದು, ಈ ಎಂಜಿನ್ ಪಡೆದ ಬೈಕುಗಳು ಏಪ್ರಿಲ್ 1ರಿಂದ ಅನುಪಯುಕ್ತ ವಿಭಾಗಕ್ಕೆ ಸೇರಿರುವುದರಿಂದ ಈ ನಿರ್ಧಾರಕ್ಕೆ ಕಂಪನಿ ಬಂದಿದೆ ಎನ್ನಬಹುದು.

ಹೋಂಡಾ ಕಂಪನಿಯು ಸಿಬಿಆರ್ 150ಆರ್ ಮತ್ತು ಸಿಬಿಆರ್ 250ಆರ್ ಮೋಟಾರ್ ಸೈಕಲ್‌ಗಳನ್ನು ಭಾರತದ ಅಧಿಕೃತ ವೆಬ್ ಸೈಟ್‌ನಿಂದ ತೆಗೆದುಹಾಕಿರುವುದನ್ನು ನಾವು ಗಮನಿಸಬಹುದಾಗಿದೆ.

ಬಿಎಸ್-4 ಎಂಜಿನ್ ಆಯ್ಕೆ ಹಾಗು ಮತ್ತಿತರ ಸೌಲಭ್ಯಗಳೊಂದಿಗೆ ಈ ಮೋಟಾರ್ ಸೈಕಲ್‌ಗಳು ಮತ್ತೆ ಭಾರತದ ಮಾರುಕಟ್ಟೆಗೆ ಲಗ್ಗೆ ಇಡಬಹುದು ಎಂಬ ಸುಳಿವನ್ನು ಹೋಂಡಾ ಕಂಪನಿಯ ವಕ್ತಾರರು ತಿಳಿಸಿದ್ದಾರೆ. ಆದರೆ, ಸಮಯವನ್ನು ಖಚಿತಪಡಿಸಿಲ್ಲ.

2011ರಲ್ಲಿ ಮೊದಲ ಬಾರಿಗೆ ಈ ಬೈಕುಗಳನ್ನು ಹೋಂಡಾ ಸಂಸ್ಥೆಯು ಭಾರತದಲ್ಲಿ ಪರಿಚಯಿಸಿತು. ಪರಿಷ್ಕೃತ ಎಂಜಿನ್ ಮತ್ತು ಗುಣಮಟ್ಟದ ನಿರ್ಮಾಣದ ಕಾರಣದಿಂದಾಗಿ ಈ ಜೋಡಿ ದ್ವಿಚಕ್ರ ವಾಹನಗಳು ಜನಪ್ರಿಯವಾಗಿವೆ. BS-III ಕಂಪ್ಲೈಂಟ್ ಎಂಜಿನ್ ಹೊಂದಿರುವ ಹೋಂಡಾ ಸಿಬಿಆರ್ 150 ಆರ್ ಬೈಕ್ 18.3 ಬಿಎಚ್‌ಪಿ ಶಕ್ತಿ ಉತ್ಪಾದಿಸುತ್ತದೆ ಮತ್ತು ಸಿಬಿಆರ್ 250 ಆರ್ ಬೈಕ್ 26.15 ಬಿಎಚ್‌ಪಿ ಶಕ್ತಿ ಬಿಡುಗಡೆ ಮಾಡುತ್ತದೆ.

ಆದರೆ ಸರಿಯಾದ ನವೀಕರಣ ಇಲ್ಲದೆ ಇರುವ ಕಾರಣ ಈ ಮೋಟಾರ್ ಸೈಕಲ್ ಮಾರಾಟವು ಕಳೆದ ಒಂದು ವರ್ಷದಲ್ಲಿ ಕ್ಷೀಣಿಸಿತ್ತು. ಬೇರೆ ಕಂಪನಿಗಳ ಹೊಸ ಪ್ರತಿಸ್ಪರ್ಧಿ ವಾಹನಗಳು ಬಿಡುಗಡೆಗೊಂಡ ನಂತರ ಸಿಬಿಆರ್ 150ಆರ್ ಮತ್ತು ಸಿಬಿಆರ್ 250ಆರ್ ಮೋಟಾರ್ ಸೈಕಲ್‌ಗಳ ಪ್ರಗತಿಗೆ ಭಾರಿ ಹಿನ್ನಡೆಯಾಯಿತು.