ಹೋಂಡಾ ಸಂಸ್ಥೆಯ ಜನಪ್ರಿಯ ಕಾರು ಹೋಂಡಾ ಸಿಟಿ ಎನ್ನುವವರು ಈ ಲೇಖನ ಓದಿ

ಹೋಂಡಾ ಕಾರ್ ಇಂಡಿಯಾ ಲಿಮಿಟೆಡ್(HCIL) ಸಂಸ್ಥೆ ತನ್ನ ಮಾಸಿಕ ಮಾರಾಟ ಅಂಕಿಅಂಶವನ್ನು ಬಿಡುಗಡೆಗೊಳಿಸಿದ್ದು, ಕಳೆದ ವರ್ಷದ ಜುಲೈ ತಿಂಗಳಿಗೆ ಹೋಲಿಸಿದರೆ ಈ ವರ್ಷ ಸಂಸ್ಥೆಯು 3,052 ಕಾರುಗಳನ್ನು ಹೆಚ್ಚಿಗೆ ಮಾರಾಟ ಮಾಡುವ ಮೂಲಕ ಹೆಚ್ಚು ಪ್ರಗತಿ ಕಂಡಿದೆ.

ಕಳೆದ ವರ್ಷಕ್ಕೆ ಹೋಲಿಕೆ ಮಾಡಿದರೆ ಹೋಂಡಾ ಸಂಸ್ಥೆಯ ಮಾರಾಟ ಶೇಕಡಾ 22% ರಷ್ಟು ಹೆಚ್ಚಿಗೆಯಾಗಿದ್ದು, ಈ ಬೆಳವಣಿಗೆ ಕಂಪನಿಗೆ ಧನಾತ್ಮಕ ಶಕ್ತಿ ತುಂಬುವಲ್ಲಿ ಸಫಲವಾಗಲಿದೆ ಎನ್ನಬಹುದು.

ಆಶ್ಚರ್ಯವೆಂದರೆ, ಹೋಂಡಾದ ಜನಪ್ರಿಯ ಸೆಡಾನ್ ಸಿಟಿ ಕಾರು ಮಾರಾಟವಾಗುವ ಟಾಪ್ ಹೋಂಡಾ ಕಾರುಗಳ ಪಟ್ಟಿಯಲ್ಲಿ ಮೊದಲನೇ ಸ್ಥಾನವನ್ನು ಹೋಂಡಾ ಡಬ್ಲ್ಯೂಆರ್-ವಿ ಕಾರಿಗೆ ಬಿಟ್ಟುಕೊಟ್ಟಿದೆ.

ಹೋಂಡಾ ಕಾರು ಜುಲೈ ತಿಂಗಳಿನಲ್ಲಿ 4,894 ಡಬ್ಲ್ಯೂಆರ್ -ವಿ ಕಾರುಗಳನ್ನು ಮಾರಾಟ ಮಾಡಿದ್ದು, ಹೋಂಡಾ ಸಿಟಿ ಕಾರಿಗೆ ತೀವ್ರಮಟ್ಟದಲ್ಲಿ ಪೈಪೋಟಿ ನೀಡಿದೆ. ಹೋಂಡಾ ಸಿಟಿ ಸೆಡಾನ್ ಕಾರು 4,854 ಗಳಷ್ಟು ಮಾರಾಟವಾಗುವ ಮೂಲಕ ಎರಡನೇ ಸ್ಥಾನಕ್ಕೆ ತೃಪ್ತಿಪಟ್ಟುಕೊಂಡಿದೆ.

"ನಾವು ಕಳೆದ ತಿಂಗಳಿನಿಂದ ಡಬ್ಲ್ಯೂಆರ್-ವಿ ಕಾರಿನ ಉತ್ಪಾದನೆಯನ್ನು ಹೆಚ್ಚಿಗೆ ಮಾಡಿದ್ದು, ಇದರಿಂದಾಗಿ ಈ ಕಾರಿಗಾಗಿ ಕಾಯುತ್ತಿರುವ ಗ್ರಾಹಕರಿಗೆ ಆದಷ್ಟು ಬೇಗ ಕಾರು ದೊರಕುವಂತಾಗಿದೆ" ಎಂದು ಹೋಂಡಾ ಕಾರ್ಸ್ ಇಂಡಿಯಾ ಲಿಮಿಟೆಡ್‌ನ ಸಿಇಓ ಮತ್ತು ಅಧ್ಯಕ್ಷರಾದ ಯೊಇಚಿರೊ ಏನೊ ತಿಳಿಸಿದ್ದಾರೆ.

ಕಳೆದ ವರ್ಷ ಹೋಲಿಕೆ ಮಾಡಿದರೆ, ಪ್ರಸಕ್ತ ವರ್ಷದಲ್ಲಿ ಹೋಂಡಾ ಸಂಸ್ಥೆ ಶೇಕಡಾ 21% ರಷ್ಟು ಬೆಳವಣಿಗೆ ದಾಖಲಿಸಿದೆ. ಕಳೆದ ವರ್ಷ ಹೋಂಡಾ ಸಂಸ್ಥೆ ಕೇವಲ 45,880 ವಾಹನಗಳನ್ನು ಮಾರಾಟ ಮಾಡಿದ್ದು, ಈ ವರ್ಷ ತನ್ನ ಮಾರಾಟವನ್ನು 55,647 ಕಾರುಗಳಿಗೆ ಹೆಚ್ಚಿಸಿಕೊಂಡಿದೆ.