ಆಡಿ ಕ್ಯೂ5 ಪೆಟ್ರೋಲ್ ವರ್ಷನ್ ಕಾರಿನ ಬಿಡುಗಡೆಗೆ ಕ್ಷಣಗಣನೆ..

ಕಳೆದ ಜನವರಿ 18ರಂದು ಮೊದಲ ಬಾರಿಗೆ ಕ್ಯೂ5 ಡಿಸೇಲ್ ವರ್ಷನ್‌ಗಳನ್ನು ಬಿಡುಗಡೆ ಮಾಡಿದ್ದ ಆಡಿ ಸಂಸ್ಥೆಯು ಇದೀಗ ಬೇಡಿಕೆಗೆ ಅನುಗುಣವಾಗಿ ಪೆಟ್ರೋಲ್ ವರ್ಷನ್ ಬಿಡುಗಡೆ ಮಾಡುವ ಸುಳಿವು ನೀಡಿದ್ದು, 2017ರಲ್ಲಿ ಬಿಡುಗಡೆಯಾದ ಕ್ಯೂ7 ಪೆಟ್ರೋಲ್ ವರ್ಷನ್ ಮಾದರಿಯಲ್ಲೇ ಹೊಸ ಪೆಟ್ರೋಲ್ ಕಾರುಗಳ ಮಾರಾಟವನ್ನು ಹೆಚ್ಚಿಸಲು ಈ ಯೋಜನೆ ರೂಪಿಸಿದೆ.

ಮಧ್ಯಮ ಗಾತ್ರದ ಐಷಾರಾಮಿ ಎಸ್‌ಯುವಿಗಳಲ್ಲಿ ಜನಮನ್ನಣೆ ಗಳಿಸಿರುವ ಆಡಿ ಸಂಸ್ಥೆಯು ಕ್ಯೂ5 ಡಿಸೇಲ್ ವರ್ಷನ್‌ಗಳ ಬೆಲೆಯನ್ನು ಎಕ್ಸ್‌ಶೋರಂಗಳ ಪ್ರಕಾರ ರೂ.53.25 ಲಕ್ಷಕ್ಕೆ ನಿಗದಿ ಮಾಡಿದ್ದು, ಪೆಟ್ರೋಲ್ ಕಾರುಗಳು ಇದಕ್ಕಿಂತಲೂ ಕಡಿಮೆ ದರಗಳಲ್ಲಿ ಲಭ್ಯವಾಗಲಿವೆ.

ಸದ್ಯ ಕ್ಯೂ5 ಡಿಸೇಲ್ ವರ್ಷನ್‌ಗಳಲ್ಲಿ ಕ್ಯೂ5 ಪ್ರಿಮಿಯಂ ಪ್ಲಸ್ ಮತ್ತು ಕ್ಯೂ5 ಟೆಕ್ನಾಲಜಿ ಎನ್ನುವ ಎರಡು ಕಾರು ಮಾದರಿಗಳಿದ್ದು,ಮೊದಲ ಮಾದರಿಯು ರೂ.53.25 ಲಕ್ಷಕ್ಕೆ ಮತ್ತು ಎರಡನೇ ಮಾದರಿಯು ರೂ. 57.60 ಲಕ್ಷಕ್ಕೆ ಖರೀದಿ ಮಾಡಬಹುದಾಗಿದ್ದು, ಇವು ಪೆಟ್ರೋಲ್ ಮಾದರಿಗಳಲ್ಲಿ ಬಂದಲ್ಲಿ ಸುಮಾರು 5 ಲಕ್ಷದಿಂದ 7 ಲಕ್ಷ ತನಕ ಕಡಿಮೆ ಬೆಲೆಗಳಲ್ಲೇ ಟಾಪ್ ಎಂಡ್ ಮಾದರಿಯನ್ನೇ ಖರೀದಿ ಮಾಡಬಹುದು.

ಎಂಜಿನ್ ಸಾಮರ್ಥ್ಯ

ಕ್ಯೂ5 ಮಾದರಿಗಳು ಪೆಟ್ರೋಲ್ ಕಾರುಗಳು 2-ಲೀಟರ್ ಟರ್ಬೋಚಾರ್ಜ್ಡ್ ಎಂಜಿನ್ ಹೊಂದಿದ್ದು, 248-ಬಿಎಚ್‌ಪಿ ಮತ್ತು 370-ಎನ್ಎಂ ಟಾರ್ಕ್ ಉತ್ಪಾದನಾ ಸಾಮರ್ಥ್ಯವನ್ನು ಹೊಂದಿವೆ.

ವೈಶಿಷ್ಟ್ಯತೆಗಳು

ಇನ್ನು ಹೊಸ ಕಾರುಗಳಲ್ಲಿ ಸುಧಾರಿತ ತಂತ್ರಜ್ಞಾನ ಬಳಕೆ ಹಿನ್ನೆಲೆ ಈ ಹಿಂದಿನ ಕ್ಯೂ5ಗಿಂತ ಹೊಸ ಕ್ಯೂ5 ಕಾರುಗಳು 90 ಕೆಜಿಯಷ್ಟು ಹಗುರವಾಗಿದ್ದು, ತ್ರಿ ಸ್ಪೋಕ್ ಲೆದರ್ ಸ್ಟಿರಿಂಗ್, ವಿದ್ಯುತ್ ಪ್ರೇರಣೆಯ ಫ್ರಂಟ್ ಸೀಟು ಮತ್ತು ಚಾಲಕ ಭಾಗದಲ್ಲಿ ಮೆಮೊರಿ ಸ್ಲಾಟ್ ನೀಡಲಾಗಿದೆ.

ಇದರ ಜೊತೆಗೆ 7-ಸ್ಪೀಡ್ ಟ್ರಾನಿಕ್ ಆಟೋ ಮ್ಯಾಟಿಕ್ ಗೇರ್‌ಬಾಕ್ಸ್, ಆಲ್ ವೀಲ್ಹ್ ಡ್ರೈವ್ ಟೆಕ್ನಾಲಜಿ, ವಿಸ್ತರಿಸಿದ ಬೂಟ್ ಸ್ಪೆಸ್, ರೂಮಿರಿಯರ್ ಟೆಕ್ನಾಲಜಿ ಪ್ರೇರಿತ ಒಳವಿನ್ಯಾಸ, ಸಿಂಗಲ್ ಫ್ರೇಮ್ ಗ್ರೀಲ್, ಮ್ಯಾಟಿಕ್ಸ್ ಎಲ್ಇಡಿ ಹೆಡ್‌ಲ್ಯಾಂಪ್, ಸ್ಪೋರ್ಟಿ ಬ್ಯಾನೆಟ್, ಎಲ್‌ಇಡಿ ಟೈಲ್‌ಗೇಟ್ ಪಡೆದುಕೊಂಡಿದೆ.

ಕ್ಯೂ5 ಕಾರುಗಳಲ್ಲಿ ಇತರೆ ಮಾದರಿಗಳಿಂತ ಹೆಚ್ಚಿನ ಗುಣಮಟ್ಟ ಕಾಯ್ದುಕೊಂಡಿರುವ ಆಡಿ ಸಂಸ್ಥೆಯು ಸುರಕ್ಷತೆಗೂ ಹೆಚ್ಚಿನ ಒತ್ತು ನೀಡಿದ್ದು, 8 ಏರ್‌ಬ್ಯಾಗ್, ಪಾರ್ಕಿಂಗ್ ರಿರ್ ಕ್ಯಾಮೆರಾ ಮತ್ತು ಕಂಫರ್ಟ್, ಡೈನಾಮಿಕ್, ಆಟೋ , ಆಪ್ ರೋಡ್ ಚಾಲನಾ ಸೌಲಭ್ಯಗಳನ್ನು ಒದಗಿಸಲಾಗಿದೆ.

ಮರ್ಸಿಡಿಸ್ ಬೆಂಝ್ ಜಿಎಲ್‌ಸಿ, ಲ್ಯಾಂಡ್ ರೋವರ್ ಡಿಸ್ಕವರಿ ಸ್ಪೋರ್ಟ್, ಬಿಎಂಡಬ್ಲ್ಯು ಎಕ್ಸ್3, ಲೆಕ್ಸಸ್ 300ಹೆಚ್ ಮತ್ತು ವೊಲ್ವೋ ಎಕ್ಸ್‌ಸಿ60 ಮಾದರಿಗಳಿಗೆ ಆಡಿ ಕ್ಯೂ5 ಪೆಟ್ರೋಲ್ ಕಾರುಗಳು ಪ್ರತಿಸ್ಪರ್ಧಿಯಾಗಲಿದೆ.