ಭಾರತದಲ್ಲಿ ಹೀಗೆ ಬಂದು ಹಾಗೆ ಹೋದ ಮಹೀಂದ್ರಾ ಕಾರುಗಳಿವು..!

ಹೀಗೆ ದೇಶೀಯ ಮಾರುಕಟ್ಟೆಯಲ್ಲಿ ಬಿಡುಗಡೆಯಾಗಿ ತಮ್ಮ ಛಾಪನ್ನು ಒತ್ತದೆ ಮರೆಯಾದ ಮಹೀಂದ್ರಾ ಕಾರುಗಳ ಬಗ್ಗೆ ಈ ಲೇಖನದಲ್ಲಿ ನೋಡೋಣ.

1. ಮಹೀಂದ್ರಾ ಲೆಜೆಂಡ್

ಮಹೀಂದ್ರಾ ಲೆಜೆಂಡ್, ಒಂದು ಸೀಮಿತ ಆವೃತ್ತಿಯ ಕಾರು. ಈ ಕಾರ್ ಅನ್ನು ವಿಶೇಷವಾಗಿ ಭಾರತೀಯ ಸೇನೆಗಾಗಿ ತಯಾರಿಸಲಾಗಿತ್ತು. ಮಹೀಂದ್ರಾ ಥಾರ್ ಕಾರ್ ಅನ್ನು ಈ ಕಾರಿನ ಆಧಾರದ ಮೇಲೆ ನಿರ್ಮಿಸಲಾಗಿದೆ. ಈ ಕಾರು ಎರಡು ಡೋರುಗಳನ್ನು ಹೊಂದಿರುವ ಆಫ್ ರೋಡ್ ಎಸ್ ಯುವಿಯಾಗಿತ್ತು. ಮಹೀಂದ್ರಾ ಲೆಜೆಂಡ್ ಕ್ಲಾಸಿಕ್ ಕಾಣುವ ಕಾರು. ಈ ಕಾರಿನಲ್ಲಿ ಹಿಂಭಾಗದ ಪ್ರಯಾಣಿಕರಿಗಾಗಿ ಸೀಟುಗಳನ್ನು ಹಾಗೂ ರೂಫ್ ನೀಡಲಾಗಿತ್ತು. ಸಾಕಷ್ಟು ಸಂಖ್ಯೆಯಲ್ಲಿ ಮಾರಾಟವಾಗದ ಕಾರಣಕ್ಕೆ ಈ ಕಾರಿನ ಮಾರಾಟವನ್ನು ಸ್ಥಗಿತಗೊಳಿಸಲಾಯಿತು.

2. ಮಹೀಂದ್ರಾ ಗ್ರ್ಯಾಂಡ್ ಆರ್ಮಾಡಾ

ಮಹೀಂದ್ರಾ ಆರ್ಮಾಡಾ ಮಾರುಕಟ್ಟೆಯಲ್ಲಿ ಸಾಕಷ್ಟು ಜನಪ್ರಿಯವಾಗಿತ್ತು. ಮಹೀಂದ್ರಾ ಗ್ರ್ಯಾಂಡ್ ಆರ್ಮಾಡಾ 4x4 ಮಾದರಿಯಲ್ಲಿತ್ತು. ಈ ಕಾರು ಸ್ಟಾಂಡರ್ಡ ಆರ್ಮಾಡಾಗಿಂತ ಹೆಚ್ಚಿನ ಸ್ಪೇಸ್ ಅನ್ನು ಹೊಂದಿತ್ತು. 10 ಜನರು ಈ ಕಾರಿನಲ್ಲಿ ಆರಾಮವಾಗಿ ಕುಳಿತುಕೊಳ್ಳಬಹುದಿತ್ತು. ಈ ಕಾರು ಸಾಕಷ್ಟು ಬಲಶಾಲಿಯಾಗಿತ್ತು. ಈ ಕಾರು ಭಾರತೀಯ ಗ್ರಾಹಕರಲ್ಲಿ ಜನಪ್ರಿಯವಾಗದ ಕಾರಣಕ್ಕೆ ಸ್ಥಗಿತಗೊಳಿಸಲಾಯಿತು.

3. ಮಹೀಂದ್ರಾ ವಯೋಜರ್

ಮಹೀಂದ್ರಾ ವಯೋಜರ್ ಅನ್ನು 90ರ ದಶಕದಲ್ಲಿ ಬಿಡುಗಡೆಗೊಳಿಸಲಾಗಿತ್ತು. ಆ ಸಮಯದಲ್ಲಿ ಈ ಕಾರು ಭಾರತದ ಮೊದಲ ಎಂಪಿವಿಯಾಗಿತ್ತು. ಈ ಕಾರು ಮಿತ್ಸುಬಿಷಿ ಎಲ್ಎಸ್ 300ರ ರಿಬ್ರಾಂಡ್ ಮಾದರಿಯಾಗಿತ್ತು. ಈ ಕಾರಿನಲ್ಲಿ ಪಿಯುಜಿಯೊ 2.5 ಲೀಟರ್ ಟರ್ಬೋಚಾರ್ಜ್ಡ್ ಡೀಸೆಲ್ ಎಂಜಿನ್ ಅಳವಡಿಸಲಾಗಿತ್ತು. ದುಬಾರಿ ಬೆಲೆಯನ್ನು ಹೊಂದಿದ್ದ ಕಾರಣಕ್ಕೆ ಗ್ರಾಹಕರನ್ನು ಹೆಚ್ಚಿನ ಸಂಖ್ಯೆಯಲ್ಲಿ ಆಕರ್ಷಿಸಿಸಲಿಲ್ಲ.

4. ಮಹೀಂದ್ರಾ ಕಮಾಂಡರ್

ಮಹೀಂದ್ರಾ ಕಮಾಂಡರ್ ಅನ್ನು 1991ರಲ್ಲಿ ಬಿಡುಗಡೆಗೊಳಿಸಲಾಗಿತ್ತು. ನಂತರ ಈ ಕಾರಿನ ವಿವಿಧ ಮಾದರಿಗಳನ್ನು ಬಿಡುಗಡೆಗೊಳಿಸಲಾಯಿತು. ಈ ಕಾರ್ ಅನ್ನು ಹಲವಾರು ಸೀಟಿನ ಆಯ್ಕೆಗಳಲ್ಲಿ ಮಾರಾಟ ಮಾಡಲಾಗುತ್ತಿತ್ತು. ಬಲಿಷ್ಟವಾದ ನಿರ್ಮಾಣಕ್ಕಾಗಿ ಗ್ರಾಮೀಣ ಪ್ರದೇಶಗಳಲ್ಲಿ ಸಾಕಷ್ಟು ಜನಪ್ರಿಯವಾಗಿತ್ತು. ಕಾರು 2 ವೀಲ್ ಡ್ರೈವ್ ಹಾಗೂ 4 ವೀಲ್ ಡ್ರೈವ್‌ನಲ್ಲಿ ಲಭ್ಯವಿತ್ತು. ಜನಪ್ರಿಯತೆ ಕುಸಿಯುತ್ತಿದ್ದಂತೆ ಈ ಕಾರಿನ ಮಾರಾಟವನ್ನು ನಿಲ್ಲಿಸಬೇಕಾಯಿತು.

5. ಮಹೀಂದ್ರಾ ಬೊಲೆರೊ ಇನ್ವೆಡರ್

ಮಹೀಂದ್ರಾ ಬೊಲೆರೊ ಇನ್ವೆಡರ್ ಕಂಪನಿಯ ಜನಪ್ರಿಯ ಬೊಲೆರೊ ಕಾರಿನ ಆಧಾರದ ಮೇಲೆ ತಯಾರಾಗಿತ್ತು. ಮಾರುತಿ ಜಿಪ್ಸಿಗೆ ಪೈಪೋಟಿ ನೀಡಲು ಈ ಕಾರ್ ಅನ್ನು ಬಿಡುಗಡೆಗೊಳಿಸಲಾಗಿತ್ತು. ಕಾರಿನಲ್ಲಿ ಎರಡು ಮುಂಭಾಗ ಹಾಗೂ ಹಿಂಭಾಗದ ಡೋರುಗಳಿದ್ದವು. ಕಾರಿನ ಹಿಂಭಾಗದಲ್ಲಿ ಎದುರು ಬದುರಾದ ಸೀಟುಗಳಿದ್ದವು. ಯುವ ಗ್ರಾಹಕರನ್ನು ಸೆಳೆಯುವ ಉದ್ದೇಶದಿಂದ ಈ ಕಾರ್ ಅನ್ನು

ತಯಾರಿಸಲಾಗಿತ್ತು. ಇನ್ವೆಡರ್ ನಲ್ಲಿ 2.5-ಲೀಟರ್ ಡೀಸೆಲ್ ಎಂಜಿನ್ ಅಳವಡಿಸಲಾಗಿತ್ತು. ಬೇಡಿಕೆ ಕುಸಿದ ಕಾರಣಕ್ಕೆ ಈ ಕಾರ್ ಅನ್ನು ಸ್ಥಗಿತಗೊಳಿಸಲಾಯಿತು.

6. ಮಹೀಂದ್ರಾ ಆಕ್ಸ್

ಮಹೀಂದ್ರಾ ಅಂಡ್ ಮಹೀಂದ್ರಾ ತನ್ನ ವಾಹನಗಳನ್ನು ವಿಶ್ವದ ಅನೇಕ ರಕ್ಷಣಾ ಇಲಾಖೆಗಳಿಗೆ ಪೂರೈಸುತ್ತದೆ. ಮಹೀಂದ್ರಾ ಆಕ್ಸ್ ಅನ್ನು ನಿರ್ದಿಷ್ಟವಾಗಿ ವಿಶ್ವದ ಅನೇಕ ರಕ್ಷಣಾ ಪಡೆಗಳನ್ನು ಪೂರೈಸಲು ನಿರ್ಮಿಸಲಾಗಿದೆ. ಕಂಪನಿಯು ಈ ಕಾರಿನ ನಾಗರಿಕ ಆವೃತ್ತಿಯನ್ನು ಸಹ ಬಿಡುಗಡೆಗೊಳಿಸಿತ್ತು. ಆದರೆ ಹೆಚ್ಚಿನ ಪ್ರಮಾಣದಲ್ಲಿ ಮಾರಾಟವಾಗಲಿಲ್ಲ. ಈ ಕಾರನ್ನು ದೇಸಿ ಹಮ್ಮರ್ ಎಂದೂ ಕರೆಯಲಾಗುತ್ತಿತ್ತು.