ತಾಂತ್ರಿಕ ದೋಷ ಸರಿಪಡಿಸಲು ಕಾರುಗಳನ್ನು ರಿಕಾಲ್ ಮಾಡಿದ ವೊಲ್ವೊ

ವೊಲ್ವೊ ಬಿಡುಗಡೆ ಮಾಡಿರುವ ಪತ್ರಿಕಾ ಹೇಳಿಕೆಯಲ್ಲಿ, ಕಾಲಕಾಲಕ್ಕೆ ತಯಾರಿಸಿದ ಐಷಾರಾಮಿ ಕಾರುಗಳಲ್ಲಿರುವ ಆಟೋಮ್ಯಾಟಿಕ್ ಬ್ರೇಕ್ ಸಿಸ್ಟಂ ಕಂಟ್ರೋಲರ್ ಸಾಫ್ಟ್‌ವೇರ್‌ನಲ್ಲಿ ಈ ತಾಂತ್ರಿಕ ಸಮಸ್ಯೆ ಕಂಡುಬರುತ್ತದೆ ಎಂದು ಹೇಳಲಾಗಿದೆ.

ಕೆಲವು ಟೆಂಪರೆಚರ್ ಗಳಲ್ಲಿ , ಈ ಆಟೋಮ್ಯಾಟಿಕ್ ಬ್ರೇಕ್ ಸಿಸ್ಟಂ ಅನ್ನು ಕಂಟ್ರೋಲ್ ಮಾಡುವ ಸಾಧನವು ಅಸಮರ್ಪಕವಾಗಿ ಕಾರ್ಯ ನಿರ್ವಹಿಸುವುದರಿಂದ ಕಂಟ್ರೋಲರ್ ಸಾಫ್ಟ್‌ವೇರ್ ಕಾರ್ಯನಿರ್ವಹಿಸದಂತೆ ಆಗುತ್ತದೆ.

ವೊಲ್ವೊ ಕಂಪನಿಯ ಎಕ್ಸ್‌ಸಿ 40, ಎಕ್ಸ್‌ಸಿ 60, ಎಕ್ಸ್‌ಸಿ 90, ಎಸ್ 60, ಎಸ್ 90 ಹಾಗೂ ವಿ ಸರಣಿಯ ಕಾರುಗಳು ಈ ಸಮಸ್ಯೆಯನ್ನು ಹೊಂದಿವೆ ಎಂದು ವರದಿಯಾಗಿದೆ.

2018ರ ನವೆಂಬರ್‌ನಿಂದ ಈ ತಿಂಗಳವರೆಗೆ 7.5 ಲಕ್ಷ ಕಾರುಗಳನ್ನು ವಿಶ್ವದ ವಿವಿಧ ದೇಶಗಳಲ್ಲಿ ಮಾರಾಟ ಮಾಡಲಾಗಿದೆ ಎಂದು ಹೇಳಲಾಗಿದೆ.

ಈ ಕಾರಣಕ್ಕೆ ಈ ಕಾರುಗಳು ಅಪಘಾತಕ್ಕೆ ಒಳಗಾಗುವ ಸಾಧ್ಯತೆಗಳಿರುತ್ತವೆ. ಆದ್ದರಿಂದ ಈ ಕಾರುಗಳಲ್ಲಿರುವ ಆಟೋಮ್ಯಾಟಿಕ್ ಬ್ರೇಕ್ ಸಿಸ್ಟಂ ಅನ್ನು ಕಂಟ್ರೋಲ್ ಮಾಡುವ ಸಾಫ್ಟ್‌ವೇರ್ ಅನ್ನು ಪರೀಕ್ಷಿಸಲು ಹಾಗೂ ಸರಿಪಡಿಸಲು ಮುಂದಾಗಿದ್ದೇವೆ ಎಂದು ವೊಲ್ವೊ ಕಂಪನಿ ಹೇಳಿದೆ.

ಭಾರತದಲ್ಲಿ 1,891 ವೊಲ್ವೊ ಕಾರುಗಳನ್ನು ರಿಕಾಲ್ ಮಾಡಲಾಗುತ್ತಿದ್ದು, ತೊಂದರೆ ಏನು ಎಂಬುದನ್ನು ಪರೀಕ್ಷಿಸಬೇಕಾಗಿದೆ. ಈ ಸಂಬಂಧ, ಡೀಲರ್ ಗಳು ಸಂಬಂಧಪಟ್ಟ ಗ್ರಾಹಕರಿಗೆ ಮಾಹಿತಿ ನೀಡಿದ್ದಾರೆ.

ಆದರೆ, ಕರೋನಾ ವೈರಸ್ ನಿಂದಾಗಿ, ಗ್ರಾಹಕರು ಬರುವುದು ತಡವಾಗಲಿದೆ ಎಂದು ಹೇಳಲಾಗಿದೆ. ವೊಲ್ವೊ ಡೀಲರ್ ಗಳ ಪ್ರಕಾರ, ಸಾಫ್ಟ್‌ವೇರ್ ಅನ್ನು ಶೀಘ್ರದಲ್ಲೇ ಅಪ್ ಡೇಟ್ ಮಾಡಿ, ಸಮಸ್ಯೆಯನ್ನು ಪರಿಹರಿಸಲಾಗುವುದು.

ವೊಲ್ವೊ ಕಾರುಗಳು ವಿಶ್ವದ ಪ್ರಮುಖ ಕಾರು ಮಾದರಿಗಳಾಗಿವೆ. ಆದರೆ, ಈ ಕಾರುಗಳಲ್ಲಿ ಉಂಟಾಗಿರುವ ಸುರಕ್ಷಾ ಫೀಚರ್ ಗಳ ಕೊರತೆಯು ಗ್ರಾಹಕರಲ್ಲಿ ನಿರಾಶೆಯನ್ನು ಉಂಟು ಮಾಡಿದೆ. ಈಗ ವೊಲ್ವೊ ಕಂಪನಿಯು ಸಮಸ್ಯೆಯನ್ನು ಬಗೆಹರಿಸಲು ತಾನೇ ಮುಂದಾಗಿದೆ.