Toyota EV: ಮೊದಲ ಟೊಯೋಟಾ ಎಲೆಕ್ಟ್ರಿಕ್ ಎಸ್‌ಯುವಿ ಬಿಡುಗಡೆ ಬಹಿರಂಗ: ಧೂಳೆಬ್ಬಿಸಲಿದೆ!

ಭಾರತದಲ್ಲಿ ಎಲೆಕ್ಟ್ರಿಕ್ ಕಾರುಗಳಿಗೆ ಬೇಡಿಕೆ ಹೆಚ್ಚಾಗುತ್ತಿರುವ ಹಿನ್ನೆಲೆಯಲ್ಲಿ ಬಹುತೇಕ ಬ್ರಾಂಡ್‌ಗಳು ಹೊಸ ಇವಿ ಕಾರುಗಳನ್ನು ಪರಿಚಯಿಸಲು ಸಜ್ಜಾಗಿವೆ. ಟೊಯೋಟಾ ಕೂಡ ತನ್ನ ಮೊದಲ ಎಲೆಕ್ಟ್ರಿಕ್ ಎಸ್‌ಯುವಿಯನ್ನು ಆದಷ್ಟು ಬೇಗ ಬಿಡುಗಡೆ ಮಾಡುವ ಬಗ್ಗೆ ಈಗ ಮಾಹಿತಿ ಹೊರಬಿದ್ದಿದೆ. ಮೂಲಗಳ ಪ್ರಕಾರ 2025ರ ದ್ವೀತಿಯಾರ್ಧದಲ್ಲಿ ಮೊದಲ ಟೊಯೋಟಾ ಇವಿ ಬಿಡುಗಡೆಯಾಗಲಿದೆ.

ಕಳೆದ ವರ್ಷದ ಕೊನೆಯಲ್ಲಿ ಟೊಯೋಟಾ ತನ್ನ ಮಿಡ್‌ ಸೈಜ್ ಎಲೆಕ್ಟ್ರಿಕ್ ಎಸ್‌ಯುವಿಯ ಕಾನ್ಸೆಪ್ಟ್ ಮಾಡಲ್ ಅನ್ನು ಬಹಿರಂಗಪಡಿಸಿತ್ತು. ಇದು ಬಹುತೇಕ ಮಾರುತಿ ಸುಜುಕಿಯ ಹೊಸ ಎಲೆಕ್ಟ್ರಿಕ್ ಕಾರಿನಂತೆ ಅದೇ ಡಿಸೈನ್ ಹಾಗೂ ತಾಂತ್ರಿಕ ವಿಶೇಷತೆಗಳಿಗೆ ಹತ್ತಿರವಾಗಿದೆ. ಟೊಯೋಟಾ - ಮಾರುತಿ ಸುಜುಕಿ ಬ್ರಾಂಡ್‌ಗಳ ಪಾಲುದಾರಿಕೆಯಲ್ಲಿ ಹಲವು ಕಾರುಗಳು ಬಂದಿರುವುದು ಎಲ್ಲರಿಗೂ ತಿಳಿದೆ ಇದೆ. ಹಾಗೆಯೇ ಈಗ ಎಲೆಕ್ಟ್ರಿಕ್ ಕಾರುಗಳು ಕೂಡ ಒಂದೇ ಪ್ಲಾಟ್‌ಫಾರ್ಮ್ ಹಂಚಿಕೊಳ್ಳಲಿವೆ.

ಮಾರುತಿ ಸುಜುಕಿಯ ಹೊಸ ಎಲೆಕ್ಟ್ರಿಕ್ ಕಾರು ಮಾರ್ಚ್ 2025ರ ವೇಳೆಗೆ ಬಿಡುಗಡೆಯಾಗಲಿದೆ. ಇದಾದ 6 ತಿಂಗಳ ಬಳಿಕ ಟೊಯೋಟಾ ತನ್ನ ಎಲೆಕ್ಟ್ರಿಕ್ ಎಸ್‌ಯುವಿಯನ್ನು ಬಿಡುಗಡೆ ಮಾಡಲಿದೆ ಎಂದು ಮೂಲಗಳು ಹೇಳುತ್ತಿವೆ. ಅಲ್ಲಿಗೆ 2025ರ ಸೆಪ್ಟೆಂಬರ್ ಅಥವಾ ಅಕ್ಟೋಬರ್ ವೇಳೆಗೆ ಟೊಯೋಟಾ ಇವಿ ಬರುವುದು ಖಚಿತ ಎನ್ನಲಾಗುತ್ತಿದೆ.

ಹೇಗಿರಲಿದೆ ಮೊದಲ ಟೊಯೋಟಾ ಇವಿ: ಇದು ಅತ್ಯಾಧುನಿಕ ಡಿಸೈನ್ ಎಲಿಮೆಂಟ್‌ಗಳನ್ನು ಹೊಂದಿರಲಿದೆ. ಸಿ-ಆಕಾರದ ಎಲ್‌ಇಡಿ ಡಿಆರ್‌ಎಲ್‌, ಆಕರ್ಷಕವಾದ ಮುಂಭಾಗದ ಬಂಪರ್, ಫೇರ್ಡ್ ವ್ಹೀಲ್ ಆರ್ಚ್‌ಗಳೊಂದಿಗೆ ರಗಡ್ ಎಸ್‌ಯುವಿ ಲುಕ್‌ನೊಂದಿಗೆ ಬರಲಿದೆ. ಇನ್ನು ಹಿಂಭಾಗದ ವಿಷಯಕ್ಕೆ ಬಂದರೆ ಇದು ಬಹುತೇಕ ಮಾರುತಿ ಇವಿನಂತೆ ಇರಲಿದೆ ಎಂದು ಬಲ್ಲ ಮೂಲಗಳು ಖಚಿತಪಡಿಸಿವೆ.

ಟೊಯೋಟಾ ಹೊಸ ಎಲೆಕ್ಟ್ರಿಕ್ ಎಸ್‌ಯುವಿ 4,300 ಎಂಎಂ ಉದ್ದ, 1,820 ಎಂಎಂ ಅಗಲ ಮತ್ತು 1,620 ಎಂಎಂ ಎತ್ತರವಿರಲಿದೆ. ಮಾರುತಿ ಇವಿಎಕ್ಸ್ ಕೂಡ ಇದೇ ಆಯಾಮಗಳೊಂದಿಗೆ ಬರಲಿದ್ದು, ಟೊಯೋಟಾ ಇವಿ ಎರಡೂ ಮಾದರಿಗಳು ಒಂದೇ ರೀತಿಯ 2,700 ಎಂಎಂ ವ್ಹೀಲ್ ಬೇಸ್ ಅನ್ನು ಪಡೆಯುವ ನಿರೀಕ್ಷೆಯಿದೆ.

ಹೊಸ ಮುಂಬರುವ ಟೊಯೋಟಾ ಇವಿಗೆ ಎರಡು ಬ್ಯಾಟರಿ ಆಯ್ಕೆಗಳಿರಲಿದ್ದು, ಸುಮಾರು 550 ಕಿ.ಮೀ ರೇಂಜ್ ನೀಡುವ 60 ಕಿಲೋವ್ಯಾಟ್ ಬ್ಯಾಟರಿ ಹಾಗೂ 400 ಕಿ.ಮೀ ರೇಂಜ್ ನೀಡುವ ಸಣ್ಣ 48 ಕಿಲೋವ್ಯಾಟ್ ಬ್ಯಾಟರಿ ಪ್ಯಾಕ್ ಹೊಂದಿರುವ ಎಂಟ್ರಿ ಲೆವೆಲ್ ರೂಪಾಂತರವನ್ನು ಸಹ ನಿರೀಕ್ಷಿಸಲಾಗಿದೆ. ಈ ಎಸ್ ಯುವಿ ಕೆಲವು ಮಾರುಕಟ್ಟೆಗಳಲ್ಲಿ ಎಫ್‌ಡಬ್ಲ್ಯುಡಿ ಮತ್ತು ಡ್ಯುಯಲ್ ಮೋಟಾರ್ ಎಡಬ್ಲ್ಯುಡಿ ಆಯ್ಕೆಗಳನ್ನು ಹೊಂದಿರುತ್ತದೆ ಎಂದು ಟೊಯೊಟಾ ಹೇಳಿದೆ.

ಇಂಟೀರಿಯರ್ ಬಗ್ಗೆ ಬಹಿರಂಗಪಡಿಸದಿದ್ದರೂ, ಇಲ್ಲಿ ಇವಿಎಕ್ಸ್ ನೊಂದಿಗೆ ಸಾಕಷ್ಟು ಸಾಮ್ಯತೆ ಮತ್ತು ಭಾಗಗಳ ಹಂಚಿಕೆಯನ್ನು ನಿರೀಕ್ಷಿಸಬಹುದು. ಮಾರುತಿ ಪ್ರತಿರೂಪದಂತೆ, ಇದು ಸೌಕರ್ಯ, ಸುರಕ್ಷತಾ ವೈಶಿಷ್ಟ್ಯಗಳು ಮತ್ತು ತಂತ್ರಜ್ಞಾನದ ವಿಸ್ತಾರವಾದ ಪಟ್ಟಿಯೊಂದಿಗೆ ಐಷಾರಾಮಿ ಒಳಾಂಗಣವನ್ನು ಹೊಂದಿರುತ್ತದೆ ಎಂದು ನಿರೀಕ್ಷಿಸಲಾಗಿದೆ. ಹೆಚ್ಚಿನ ವಿವರಗಳು ಶೀಘ್ರದಲ್ಲೇ ಹೊರಬರಲಿವೆ.

ಬಿಡುಗಡೆಯಾದ ನಂತರ, ಟೊಯೊಟಾದ ಮಧ್ಯಮ ಗಾತ್ರದ ಎಲೆಕ್ಟ್ರಿಕ್ ಎಸ್‌ಯುವಿ ಹ್ಯುಂಡೈ ಕ್ರೆಟಾ ಇವಿ, ಟಾಟಾ ಕರ್ವ್ ಇವಿ ಮತ್ತು ಮಾರುತಿ ಇವಿಎಕ್ಸ್ ಜೊತೆ ಪೈಪೋಟಿ ಇರಲಿದೆ. ಡ್ರೈವ್‌ಸ್ಪಾರ್ಕ್ ಕನ್ನಡ ವೆಬ್‌ಸೈಟ್ ಹೊಸ ಕಾರು, ಹೊಸ ಬೈಕ್ ಕುರಿತ ನವೀಕೃತ ಸುದ್ದಿಗಳನ್ನು ತ್ವರಿತವಾಗಿ ಓದುಗರಿಗೆ ನೀಡುತ್ತದೆ.

ಜೊತೆಗೆ ಸೋಷಿಯಲ್ ಮೀಡಿಯಾಗಳ ಮೂಲಕ ತಕ್ಷಣವೇ ಓದುಗರೊಂದಿಗೆ ಸುದ್ದಿಗಳನ್ನು ಶೇರ್ ಮಾಡುತ್ತೇವೆ. ಇತ್ತೀಚಿನ ಕಾರು, ಬೈಕ್ ಸುದ್ದಿ, ಟೆಸ್ಟ್ ಡ್ರೈವ್ ವರದಿಗಳು ಮತ್ತು ವೀಡಿಯೊಗಳನ್ನು ಪಡೆಯಲು ನಮ್ಮ ಫೇಸ್‌ಬುಕ್, ಇನ್‌ಸ್ಟಾಗ್ರಾಮ್, ಯೂಟ್ಯೂಬ್ ಪೇಜ್‌ಗಳೊಂದಿಗೆ ಫಾಲೋ ಮಾಡಿ. ನಿಮಗೆ ನಮ್ಮ ಯಾವುದೇ ಸುದ್ದಿ ಇಷ್ಟವಾದರೆ ಲೈಕ್, ಕಾಮೆಂಟ್ ಮಾಡುವುದನ್ನು ಮರೆಯದಿರಿ.