Maruti: 8 ಲಕ್ಷಕ್ಕೆ ಬೆಸ್ಟ್ 7-ಸೀಟರ್ ಕಾರು: 26.11 ಕಿ.ಮೀ ಮೈಲೇಜ್... ಫುಲ್ ಡಿಮ್ಯಾಂಡ್!

ಭಾರತೀಯ ಗ್ರಾಹಕರಿಗೆ, ವಿಶೇಷವಾಗಿ ದೀರ್ಘ ಪ್ರಯಾಣವನ್ನು ಇಷ್ಟಪಡುವ ಕುಟುಂಬಗಳಿಗೆ, 7 ಆಸನಗಳ ಕಾರುಗಳಿಗೆ ಬೇಡಿಕೆ ವೇಗವಾಗಿ ಹೆಚ್ಚುತ್ತಿದೆ. ದೇಶದಲ್ಲಿ 7 ಸೀಟರ್ ಕಾರುಗಳು ಸಾಕಷ್ಟಿದ್ದರು, ಮಾರುತಿಯ ಈ ಒಂದು ಕಾರು ಮಾತ್ರ ಸದ್ಯ ತುಂಬಾ ಬೇಡಿಕೆ ಪಡೆದುಕೊಂಡಿದೆ. ಕೈಗೆಟುಕುವ ಬೆಲೆ, ಮೈಲೇಜ್ ಮತ್ತು ವಿಶಾಲತೆಗೆ ಹೆಸರುವಾಸಿಯಾದ ಜನಪ್ರಿಯ 7 ಸೀಟರ್ ಕಾರು ಮಾರುತಿ ಸುಜುಕಿ ಎರ್ಟಿಗಾ (Maruti Suzuki Ertiga), ಸದ್ಯ ಭಾರತದ ಬೆಸ್ಟ್ ಫ್ಯಾಮಿಲಿ ಕಾರಾಗಿದೆ. ಮಾರುತಿ ಎರ್ಟಿಗಾ ಬೆಲೆ ರೂ. 8.69 ಲಕ್ಷದಿಂದ ರೂ. 13.03 ಲಕ್ಷದವರೆಗೆ (ಎಕ್ಸ್‌ ಶೋರೂಂ) ಇದೆ.

ಮಾರುತಿ ಸುಜುಕಿ ಎರ್ಟಿಗಾದ ಕೈಗೆಟುಕುವ ಬೆಲೆ ಮತ್ತು ಅತ್ಯುತ್ತಮ ಮೈಲೇಜ್ ಕಾರಣದಿಂದಾಗಿ ಅತ್ಯುತ್ತಮ ಫ್ಯಾಮಿಲಿ ಕಾರೆಂದು ಸಾಬೀತಾಗಿದೆ. ಮಾರುತಿ ಸುಜುಕಿ ಎರ್ಟಿಗಾವನ್ನು 2012 ರಲ್ಲಿ ಭಾರತೀಯ ಮಾರುಕಟ್ಟೆಯಲ್ಲಿ ಪರಿಚಯಿಸಲಾಯಿತು, ಅಂದಿನಿಂದ ಕಾರು ಹಲವಾರು ನವೀಕರಣಗಳೊಂದಿಗೆ ಬಂದಿದೆ. ಇದರ ಆರಾಮದಾಯಕ ಒಳಾಂಗಣ ಮತ್ತು ಕಡಿಮೆ ಬೆಲೆಗಳು ಲಕ್ಷಾಂತರ ಗ್ರಾಹಕರ ಮನಗೆದ್ದಿದೆ.

ಎರ್ಟಿಗಾದ ಪ್ರಮುಖ ವೈಶಿಷ್ಟ್ಯವೆಂದರೆ ಅದರ ಅಗಾಧ ಸ್ಥಳಾವಕಾಶ. ಇದು 7 ಜನರಿಗೆ ಆರಾಮದಾಯಕವಾಗಿ ಕುಳಿತುಕೊಳ್ಳಲು ಅನುಕೂಲಕರವಾಗಿದ್ದು, ಕುಟುಂಬಗಳಿಗೆ ಸೂಕ್ತವಾಗಿದೆ. ಮೂರನೇ ಸಾಲಿನ ಸೀಟುಗಳು ಸಹ ಆರಾಮದಾಯಕವಾಗಿದ್ದು, ದೀರ್ಘ ಪ್ರಯಾಣದಲ್ಲಿ ಹೆಚ್ಚುವರಿ ಸೌಕರ್ಯವನ್ನು ಒದಗಿಸುತ್ತದೆ. ಇದರ ಕಾರ್ಯಕ್ಷಮತೆ ನಗರದಲ್ಲಿ ಮತ್ತು ಹೆದ್ದಾರಿಯಲ್ಲಿ ಪ್ರಯಾಣಿಸಲು ಸೂಕ್ತವಾಗಿದೆ.

ಎಂಜಿನ್ ವಿಷಯಕ್ಕೆ ಬಂದರೆ, ಮಾರುತಿ ಸುಜುಕಿ ಎರ್ಟಿಗಾದ ಸುಧಾರಿತ ತಂತ್ರಜ್ಞಾನದ ವೈಶಿಷ್ಟ್ಯಗಳು ಅವಶ್ಯಕತೆಗಳಿಗೆ ಸರಿಹೊಂದುವಂತೆ ವ್ಯಾಪಕ ಗ್ರಾಹಕರನ್ನು ಹೊಂದಿದೆ. ಮಾರುತಿ ಸುಜುಕಿ ಎರ್ಟಿಗಾವು ನೆಕ್ಸ್ಟ್ - ಜೆನ್ K - ಸಿರೀಸ್ 1.5L ಡ್ಯುಯಲ್ ಜೆಟ್, ಡ್ಯುಯಲ್ VVT ಎಂಜಿನ್ ಜೊತೆಗೆ ಪ್ರೋಗ್ರೆಸ್ಸಿವ್ ಸ್ಮಾರ್ಟ್ ಹೈಬ್ರಿಡ್ ಟೆಕ್ನಾಲಜಿಯನ್ನು ಹೊಂದಿದೆ.

ಇದು ಮೈಲ್ಡ್-ಹೈಬ್ರಿಡ್ ತಂತ್ರಜ್ಞಾನದೊಂದಿಗೆ 1.5 - ಲೀಟರ್ ಪೆಟ್ರೋಲ್ ಎಂಜಿನ್‌ ಹೊಂದಿದೆ. ಇದನ್ನು 5-ಸ್ಪೀಡ್ MT ಅಥವಾ 6 - ಸ್ಪೀಡ್ AT ಯೊಂದಿಗೆ ಜೋಡಿಸಲಾಗಿದೆ. CNG ನಿಂದ ಚಾಲಿತವಾದಾಗ ಎಂಜಿನ್‌ 5 - ಸ್ಪೀಡ್ MT ನೊಂದಿಗೆ ಪ್ರತ್ಯೇಕವಾಗಿ ಲಭ್ಯವಿದೆ. ಎರ್ಟಿಗಾದ ಮೈಲೇಜ್ ಲೀಟರ್‌ಗೆ 22 ಕಿ.ಮೀ ಆಗಿದ್ದು, ತನ್ನ ವಿಭಾಗದ ಇತರ ಕಾರುಗಳಿಗೆ ಹೋಲಿಸಿದರೆ ಹೆಚ್ಚು ಮೈಲೇಜ್ ನೀಡುತ್ತದೆ.

ಕಂಪನಿಯ ಪ್ರಕಾರ, ಪೆಟ್ರೋಲ್ MT ನಲ್ಲಿ ಪ್ರತಿ ಲೀಟರ್‌ಗೆ 20.51 ಕಿ.ಮೀ, ಪೆಟ್ರೋಲ್ AT ನಲ್ಲಿ ಪ್ರತಿ ಲೀಟರ್‌ಗೆ 20.3 ಕಿ.ಮೀ ಹಾಗೂ CNG MT ನಲ್ಲಿ ಪ್ರತಿ ಕೆ.ಜಿಗೆ ಬರೋಬ್ಬರಿ 26.11 ಕಿ.ಮೀ ಮೈಲೇಜ್ ನೀಡುವುದಾಗಿ ಕಂಪನಿ ಹೇಳಿಕೊಂಡಿದೆ. ಇದು LXi, VXi, ZXi, ಮತ್ತು ZXi+ ಎಂಬ ನಾಲ್ಕು ಟ್ರಿಮ್‌ಗಳಲ್ಲಿ ಬರುತ್ತದೆ. ಅವುಗಳಲ್ಲಿ ಎರಡು VXi ಮತ್ತು ZXi ಐಚ್ಛಿಕ CNG ಕಿಟ್‌ನೊಂದಿಗೆ ಬರುತ್ತವೆ.

ಮಾರುತಿ ಎರ್ಟಿಗಾ ಫೀಚರ್ಸ್ ವಿಷಯಕ್ಕೆ ಬಂದರೆ ಇದು ತನ್ನ ಪ್ರತಿಸ್ಪರ್ಧಿಗಳಲ್ಲಿ ಹೆಚ್ಚು ವೈಶಿಷ್ಟ್ಯ-ಸಮೃದ್ಧವಾಗಿಲ್ಲದಿರಬಹುದು ಆದರೆ ಅಗತ್ಯ ಸೌಲಭ್ಯಗಳನ್ನು ನೀಡುವ ಮೂಲಕ ಬೆಸ್ಟ್ ಎನ್ನಿಸಿಕೊಂಡಿದೆ. ಇದರಲ್ಲಿ ವೈರ್‌ಲೆಸ್ ಆಂಡ್ರಾಯ್ಡ್ ಆಟೋ ಮತ್ತು ಆಪಲ್ ಕಾರ್‌ಪ್ಲೇ ಸಪೋರ್ಟ್ ಮಾಡುವ 7-ಇಂಚಿನ ಟಚ್‌ಸ್ಕ್ರೀನ್ ಇನ್ಫೋಟೈನ್‌ಮೆಂಟ್ ಸಿಸ್ಟಮ್‌ನೊಂದಿಗೆ ಬರುತ್ತದೆ.

ಟಾಪ್‌ ವೇರಿಯೆಂಟ್‌ಗಳಲ್ಲಿ ಕನೆಕ್ಟೆಡ್ ಕಾರ್ ಟೆಕ್, ಪುಶ್-ಬಟನ್ ಎಂಜಿನ್ ಸ್ಟಾರ್ಟ್/ಸ್ಟಾಪ್, ಸ್ವಯಂಚಾಲಿತ ಹೆಡ್‌ಲೈಟ್‌ಗಳು, ಪ್ಯಾಡಲ್ ಶಿಫ್ಟರ್‌ಗಳು (AT ಮಾತ್ರ), ಕ್ರೂಸ್ ಕಂಟ್ರೋಲ್, ಆಟೋ AC, ಎರಡನೇ-ಸಾಲಿಗೆ AC ವೆಂಟ್‌ಗಳು, ಅರ್ಕಾಮಿಸ್ ಟ್ಯೂನ್ ಮಾಡಿದ 6-ಸ್ಪೀಕರ್ ಸೌಂಡ್ ಸಿಸ್ಟಮ್ ಸೇರಿದಂತೆ ಹೆಚ್ಚಿನವನ್ನು ಪಡೆಯುತ್ತದೆ.