ವಿಶ್ವದೇಶಗಳು ತಿರುಗಿ ನೋಡುವಂತಾಗಿದೆ... ಭಾರತದಿಂದ 2,00,000 ಯುನಿಟ್‌ ಕಾರುಗಳ ರಫ್ತು

ಪ್ರಮುಖ ಕಾರುಗಳ ತಯಾರಕರಾದ ಹೋಂಡಾ ಕಾರ್ಸ್ ಇಂಡಿಯಾ ಲಿಮಿಟೆಡ್ (HCIL), ಇಂದು ಭಾರತದಿಂದ 2,00,000 ಯುನಿಟ್‌ ಕಾರುಗಳನ್ನು ರಫ್ತು ಮಾಡುವ ಮೂಲಕ ಗಮನಾರ್ಹ ಮೈಲಿಗಲ್ಲನ್ನು ಸಾಧಿಸಿರುವುದಾಗಿ ಘೋಷಿಸಿದೆ. ಹೆಚ್ಚಿನ ರಫ್ತು ಮಾಡಲ್‌ಗಳು, ವಿಶೇಷವಾಗಿ ಹೆಚ್ಚು ಜನಪ್ರಿಯವಾಗಿರುವ ಹೋಂಡಾ ಸಿಟಿ ಮತ್ತು ಹೋಂಡಾ ಎಲಿವೇಟ್ ಕಾರುಗಳು ಇರುವುದಾಗಿ ಕಂಪನಿ ತಿಳಿಸಿದೆ. ಈ ಸಾಧನೆಯು ಭಾರತೀಯ ಕಾರ್ಯಾಚರಣೆಗಳಲ್ಲಿ ಹೋಂಡಾದ ಬಲವಾದ ಉತ್ಪಾದನಾ ಸಾಮರ್ಥ್ಯ ಮತ್ತು ವಿಶ್ವಾದ್ಯಂತ ತನ್ನ ಗ್ರಾಹಕರಿಗೆ ಉತ್ತಮ ಗುಣಮಟ್ಟದ ಉತ್ಪನ್ನಗಳನ್ನು ತಲುಪಿಸುವ ಬದ್ಧತೆಯನ್ನು ಎತ್ತಿ ತೋರಿಸುತ್ತದೆ.

ಹೋಂಡಾ ಭಾರತದಲ್ಲಿ ತನ್ನ ರಫ್ತು ಕಾರ್ಯಾಚರಣೆಯನ್ನು ಪ್ರಾರಂಭಿಸಿ, ನೆರೆಯ ಮಾರುಕಟ್ಟೆಗಳಿಗೆ ಸೀಮಿತ ಯುನಿಟ್‌ಗಳನ್ನು ಕಳುಹಿಸಲಾಯಿತು. ಮೊದಲ 50,000 ಯುನಿಟ್‌ ಕಾರುಗಳನ್ನು ಪ್ರಾಥಮಿಕವಾಗಿ ನೆರೆಯ SAARC ದೇಶಗಳು, ದಕ್ಷಿಣ ಆಫ್ರಿಕಾ ಮತ್ತು SADC ದೇಶಗಳಿಗೆ 2021 ರವರೆಗೆ ರಫ್ತು ಮಾಡಲಾಯಿತು. ಮುಂದಿನ 50,000 ಯುನಿಟ್‌ ಕಾರುಗಳ ರಫ್ತು 2.5 ವರ್ಷಗಳಲ್ಲಿ ನಡೆಯಿತು.

ಇದು ಕಂಪನಿಯ ವ್ಯಾಪ್ತಿಯನ್ನು ಮಧ್ಯಪ್ರಾಚ್ಯ, ಮೆಕ್ಸಿಕೊ ಮತ್ತು ಟರ್ಕಿಯಲ್ಲಿನ ಎಡಗೈ ಡ್ರೈವ್ ಮಾರುಕಟ್ಟೆಗಳಿಗೆ ಹೋಂಡಾ ಸಿಟಿಗಾಗಿ ವಿಸ್ತರಿಸಿತು. ಇತ್ತೀಚಿನ ವರ್ಷಗಳಲ್ಲಿ, ಹೋಂಡಾ ರಫ್ತು ಪ್ರಮಾಣದಲ್ಲಿ ಗಮನಾರ್ಹ ಜಿಗಿತವನ್ನು ಕಂಡಿದೆ. ಮುಂದಿನ 1,00,000 ಯುನಿಟ್‌ ಕಾರುಗಳ ರಫ್ತು 2 ವರ್ಷಗಳಲ್ಲಿ ಸಾಧಿಸಲ್ಪಟ್ಟಿತು. ಇದು ಜಪಾನ್, ದಕ್ಷಿಣ ಅಮೆರಿಕಾ ಮತ್ತು ಕೆರಿಬಿಯನ್ ರಾಷ್ಟ್ರಗಳ ಹೊಸ ಮಾರುಕಟ್ಟೆಗಳಲ್ಲಿ ಅದರ ಮಧ್ಯಮ ಗಾತ್ರದ SUV ಎಲಿವೇಟ್‌ಗೆ ಹೆಚ್ಚಿನ ಬೇಡಿಕೆಯಿಂದಾಗಿದೆ ಎಂದು ಕಂಪನಿ ಹೇಳಿದೆ.

ಈ ಸಾಧನೆಯ ಕುರಿತು, ಹೋಂಡಾ ಕಾರ್ಸ್ ಇಂಡಿಯಾ ಲಿಮಿಟೆಡ್‌ನ ಮಾರ್ಕೆಟಿಂಗ್ ಮತ್ತು ಮಾರಾಟ ವಿಭಾಗದ ಉಪಾಧ್ಯಕ್ಷರಾದ ಕುನಾಲ್ ಬೆಹ್ಲ್ ಮಾತನಾಡಿ, "2,00,000 ರಫ್ತು ಕಾರುಗಳನ್ನು ಸಾಧಿಸುವುದು ಹೋಂಡಾ ಕಾರ್ಸ್ ಇಂಡಿಯಾಕ್ಕೆ ಅಪಾರ ಹೆಮ್ಮೆಯನ್ನು ತರುತ್ತದೆ. ಈ ಮೈಲಿಗಲ್ಲು ನಮ್ಮ ಭಾರತದಲ್ಲಿ ನಿರ್ಮಿತ ಕಾರುಗಳ ಜಾಗತಿಕ ಮನ್ನಣೆಯನ್ನು ಒತ್ತಿಹೇಳುತ್ತದೆ.

ಇದು ನಮ್ಮ ಕೌಶಲ್ಯಪೂರ್ಣ ತಂಡಗಳ ಸಮರ್ಪಣೆ ಮತ್ತು ಬಲವಾದ ಉತ್ಪಾದನಾ ಸಾಮರ್ಥ್ಯಗಳನ್ನು ಸಹ ಪ್ರತಿಬಿಂಬಿಸುತ್ತದೆ. ರಫ್ತುಗಳು ಹೋಂಡಾದ ವ್ಯವಹಾರ ಮತ್ತು ಆದಾಯ ತಂತ್ರದ ಅವಿಭಾಜ್ಯ ಅಂಗವಾಗಿದೆ. ಮುಂದೆ ಈ ಪ್ರದೇಶವನ್ನು ಬಲಪಡಿಸಲು ನಾವು ಬದ್ಧರಾಗಿದ್ದೇವೆ. ನಮ್ಮ ದೇಶೀಯ ಮಾರುಕಟ್ಟೆ ಮತ್ತು ಜಾಗತಿಕ ಗ್ರಾಹಕರಿಗೆ ಸೇವೆ ಸಲ್ಲಿಸುವ 'ಮೇಕ್ ಇನ್ ಇಂಡಿಯಾ' ಉಪಕ್ರಮಕ್ಕೆ ನಾವು ಸಮರ್ಪಿತರಾಗಿದ್ದೇವೆ" ಎಂದು ಹೇಳಿದರು.

ಪ್ರಮುಖ ರಫ್ತು ಮಾಡಲ್‌ಗಳು, ವಿಶೇಷವಾಗಿ ಹೆಚ್ಚು ಜನಪ್ರಿಯವಾಗಿರುವ ಹೋಂಡಾ ಸಿಟಿ ಮತ್ತು ಬಹುಮುಖ ಹೋಂಡಾ ಎಲಿವೇಟ್, ಈ ಬೆಳವಣಿಗೆಗೆ ಪ್ರಾಥಮಿಕ ಕೊಡುಗೆ ನೀಡಿವೆ. ಇದು ಒಟ್ಟು ರಫ್ತು ಪ್ರಮಾಣದಲ್ಲಿ ಈ ಎರಡೂ ಮಾಡಲ್‌ಗಳದ್ದೇ 78% ರಷ್ಟಿದೆ. ಉಳಿದ 22% ಬ್ರಿಯೊ, ಅಮೇಜ್, ಜಾಝ್, BR-V, ಮೊಬಿಲಿಯೊ, ಸಿಟಿ e:HEV, ಅಕಾರ್ಡ್ ಮತ್ತು CR-V ಸೇರಿದಂತೆ ವೈವಿಧ್ಯಮಯ ಮಾಡಲ್‌ಗಳನ್ನು ಒಳಗೊಂಡಿದೆ.

ಹೋಂಡಾ ಇಷ್ಟು ವರ್ಷಗಳಲ್ಲಿ ವಿವಿಧ ಪ್ರದೇಶಗಳಲ್ಲಿ 33 ದೇಶಗಳಿಗೆ ವಾಹನಗಳನ್ನು ರಫ್ತು ಮಾಡಿದೆ. ಜಪಾನ್ ಅತಿ ದೊಡ್ಡ ಪಾಲು 30% ರಷ್ಟು, ದಕ್ಷಿಣ ಆಫ್ರಿಕಾ ಮತ್ತು SADC ದೇಶಗಳು 26% ರಷ್ಟು, ಮೆಕ್ಸಿಕೊ 19% ರಷ್ಟು ಮತ್ತು ಟರ್ಕಿ 16% ರಷ್ಟಿದೆ. ಉಳಿದ 9% ಪಾಲು ಮಧ್ಯಪ್ರಾಚ್ಯ, ಸಾರ್ಕ್ ಪ್ರದೇಶ, ಕೆರಿಬಿಯನ್ ಮತ್ತು ದಕ್ಷಿಣ ಅಮೆರಿಕಾದ ದೇಶಗಳನ್ನು ಒಳಗೊಂಡಿದೆ.

ಡ್ರೈವ್‌ಸ್ಪಾರ್ಕ್ ಕನ್ನಡ ವೆಬ್‌ಸೈಟ್ ತ್ವರಿತವಾಗಿ ಆಟೋಮೊಬೈಲ್ ಸಂಬಂಧಿಸಿದ ಸುದ್ದಿಗಳನ್ನು ನೀಡುತ್ತದೆ. ಜೊತೆಗೆ ಸೋಷಿಯಲ್ ಮೀಡಿಯಾಗಳ ಮೂಲಕ ತಕ್ಷಣವೇ ಓದುಗರೊಂದಿಗೆ ಸುದ್ದಿಗಳನ್ನು ಶೇರ್ ಮಾಡುತ್ತೇವೆ. ಇತ್ತೀಚಿನ ಕಾರು, ಬೈಕ್ ಸುದ್ದಿ, ಟೆಸ್ಟ್ ಡ್ರೈವ್ ವರದಿಗಳು ಮತ್ತು ವೀಡಿಯೊ ಗಳನ್ನು ಪಡೆಯಲು ನಮ್ಮ ಫೇಸ್‌ ಬುಕ್, ಇನ್‌ಸ್ಟಾಗ್ರಾಮ್, ಯೂಟ್ಯೂಬ್ ಪೇಜ್‌ಗಳೊಂದಿಗೆ ಫಾಲೋ ಮಾಡಿ. ನಿಮಗೆ ನಮ್ಮ ಯಾವುದೇ ಸುದ್ದಿ ಇಷ್ಟವಾದರೆ ಲೈಕ್, ಕಾಮೆಂಟ್ ಮಾಡುವುದನ್ನು ಮರೆಯದಿರಿ.