Mahindra: ನಿನ್ನೆಯಷ್ಟೆ ಹೊಸ 7-ಸೀಟರ್ ಕಾರು ಬಿಡುಗಡೆ: ಕೇವಲ 8.49 ಲಕ್ಷ ಬೆಲೆ... ರಗಡ್ ಲುಕ್!

ಪ್ರಮುಖ ಎಸ್‌ಯುವಿ ತಯಾರಕರಾದ ಮಹೀಂದ್ರಾ (Mahindra), 2025ರ ಬೊಲೆರೊ ನಿಯೋ ಫೇಸ್‌ಲಿಫ್ಟ್ ಕಾರನ್ನು ನಿನ್ನೆಯಷ್ಟೆ ಬಿಡುಗಡೆ ಮಾಡಿದೆ. ಹೊಸ ಬೊಲೆರೊ ನಿಯೋ, ಭಾರತದ ಕಾಂಪ್ಯಾಕ್ಟ್ SUV ಮಾರುಕಟ್ಟೆಯಲ್ಲಿ ತನ್ನ ವಿಶಿಷ್ಟ ಆಕರ್ಷಣೆಯನ್ನು ಕಾಪಾಡಿಕೊಳ್ಳುವ ಗುರಿಯನ್ನು ಹೊಂದಿದ್ದು, ಮರುವಿನ್ಯಾಸಗೊಳಿಸಲಾದ ಬಾಹ್ಯ, ಹೊಸ ವರ್ಧಿತ ಒಳಾಂಗಣ ಮತ್ತು ಹೆಚ್ಚಿನ ವೇರಿಯೆಂಟ್‌ಗಳೊಂದಿಗೆ ಆಗಮಿಸಿದೆ. ಕಂಪನಿಯ ದೃಢವಾದ ಮತ್ತು ಜನಪ್ರಿಯ ಸಬ್ - 4 ಮೀಟರ್ ಎಸ್‌ಯುವಿಗಳಲ್ಲಿ ಇದು ಅತ್ಯಂತ ಗಮನಾರ್ಹ ನವೀಕರಣ ಪಡೆದುಕೊಂಡಿದೆ. ಈ ಕಾರನ್ನು ಈಗ ರೂ. 8.49 ಲಕ್ಷ (ಎಕ್ಸ್ - ಶೋರೂಂ) ಆರಂಭಿಕ ಬೆಲೆಯಲ್ಲಿ ಪರಿಚಯಿಸಲಾಗಿದೆ.

2025 ಬೊಲೆರೊ ನಿಯೋದ ಪ್ರಮುಖ ಅಂಶಗಳಲ್ಲಿ ಒಂದು ಅದರ ಹೊಸ ವಿನ್ಯಾಸವಾಗಿದೆ. ಸಿಲ್ವರ್ ಫ್ಲಾಟ್ ಅಕ್ಸೆಂಟ್ ‌ಗಳೊಂದಿಗೆ ಹೊಸ ಮುಂಭಾಗದ ಗ್ರಿಲ್, 16 - ಇಂಚಿನ ಅಲಾಯ್ ವ್ಹೀಲ್ ಗಳ ಹೊಸ ಸೆಟ್ ಅನ್ನು ಸಹ ಪಡೆದಿದೆ. ಈ ಸಬ್ - 4 - ಮೀಟರ್ ಎಸ್‌ಯುವಿಯ ಬಾಕ್ಸಿ, ಕಠಿಣ ಸಿಲೂಯೆಟ್, ಟೈಲ್ ಗೇಟ್-ಮೌಂಟೆಡ್ ಸ್ಪೇರ್ ವೀಲ್ ಜೊತೆಗೆ ಅದರ ಒರಟಾದ ಬೊಲೆರೊ ಲುಕ್ ಅನ್ನು ಉಳಿಸಿಕೊಂಡಿದೆ.

ನಗರ ಮತ್ತು ಗ್ರಾಮೀಣ ಖರೀದಿದಾರರನ್ನು ಸಮಾನವಾಗಿ ಆಕರ್ಷಿಸಲು ಆಧುನಿಕ ಶೈಲಿಯ ಸ್ಪರ್ಶದೊಂದಿಗೆ ಡೈಮಂಡ್ ವೈಟ್ ಮತ್ತು ಸ್ಟೆಲ್ತ್ ಬ್ಲ್ಯಾಕ್‌ನಂತಹ ಕ್ಲಾಸಿಕ್ ಬಣ್ಣಗಳ ಜೊತೆಗೆ ಜೀನ್ಸ್ ಬ್ಲೂ ಮತ್ತು ಕಾಂಕ್ರೀಟ್ ಗ್ರೇನಂತಹ ಟ್ರೆಂಡಿಂಗ್ ಕಲರ್ ಆಯ್ಕೆಗಳನ್ನು ಹೊಂದಿದೆ. ಡ್ಯುಯಲ್-ಟೋನ್ ರೂಫ್ ಆಯ್ಕೆಗಳು ಹೊರಭಾಗಕ್ಕೆ ಪ್ರೀಮಿಯಂ ವೈಬ್ ಅನ್ನು ತರುತ್ತವೆ.

ಒಳಗೆ, ಬೊಲೆರೊ ನಿಯೋ ಸೌಕರ್ಯ ಮತ್ತು ತಾಂತ್ರಿಕ ವೈಶಿಷ್ಟ್ಯಗಳ ವಿಷಯದಲ್ಲಿ ಒಂದು ಹೆಜ್ಜೆ ಮುಂದೆ ಹೋಗಿದೆ. ಕ್ಯಾಬಿನ್ ಈಗ ಮೋಚಾ ಬ್ರೌನ್ ಮತ್ತು ಲೂನಾರ್ ಗ್ರೇ ಎಂಬ ಎರಡು ಪ್ರೀಮಿಯಂ ಥೀಮ್‌ಗಳಲ್ಲಿ ಲಭ್ಯವಿದೆ. ಆಯ್ಕೆಮಾಡಿದ ವೇರಿಯೆಂಟ್ ಅವಲಂಬಿಸಿ ಲೆದರೆಟ್ ಸೀಟುಗಳು, 9 - ಇಂಚಿನ ಟಚ್‌ಸ್ಕ್ರೀನ್ ಇನ್ಫೋಟೈನ್ಮೆಂಟ್ ಸಿಸ್ಟಮ್, ಯುಎಸ್‌ಬಿ ಟೈಪ್ - ಸಿ ಪೋರ್ಟ್‌ಗಳು ಮತ್ತು ಹಿಂಬದಿಯ ಪಾರ್ಕಿಂಗ್ ಕ್ಯಾಮೆರಾ ವರ್ಧಿತ ಅನುಕೂಲತೆಯನ್ನು ನೀಡುತ್ತವೆ.

ಡಿಜಿಟಲ್ ಡ್ಯಾಶ್‌ಬೋರ್ಡ್, ಸ್ಟೀರಿಂಗ್ - ಮೌಂಟೆಡ್ ಕಂಟ್ರೋಲ್‌ಗಳು, ಕ್ರೂಸ್ ಕಂಟ್ರೋಲ್, ರಿಯರ್‌ವ್ಯೂ ಕ್ಯಾಮೆರಾ, ಮಡಚಬಹುದಾದ ಎರಡನೇ ಸಾಲಿನ ಆಸನಗಳು ಮತ್ತು ISOFIX ಚೈಲ್ಡ್ ಸೀಟ್ ಮೌಂಟ್‌ಗಳು ಸುರಕ್ಷತೆ ಮತ್ತು ಪ್ರಾಯೋಗಿಕತೆಯನ್ನು ಹೆಚ್ಚಿಸುತ್ತವೆ, ಒಟ್ಟಾರೆ ಇದನ್ನು ಕುಟುಂಬದ ಅಗತ್ಯಗಳನ್ನು ಪೂರೈಸುವಂತೆ ವಿನ್ಯಾಸಗೊಳಿಸಲಾಗಿದ್ದು, ಹೊಸ ಮಹೀಂದ್ರಾ ಬೊಲೆರೊ ನಿಯೋ ಕಾಂಪ್ಯಾಕ್ಟ್ SUV ವಿಭಾಗದಲ್ಲಿ ಪ್ರಬಲ ಸ್ಪರ್ಧಿಯಾಗಲು ಸಜ್ಜಾಗಿದೆ.

ಆಧುನಿಕ ವೈಶಿಷ್ಟ್ಯಗಳು, ದೃಢವಾದ ನಿರ್ಮಾಣ ಮತ್ತು ನವೀಕರಿಸಿದ ವಿನ್ಯಾಸದ ಮಿಶ್ರಣದೊಂದಿಗೆ ಬಲವಾದ ಎಂಜಿನ್ ಕೂಡ ಬೊಲೆರೊ ನಿಯೋಗೆ ಸಾಥ್ ನೀಡುತ್ತದೆ. ಯಾಂತ್ರಿಕವಾಗಿ, ಬೊಲೆರೊ ನಿಯೋ ತನ್ನ 1.5-ಲೀಟರ್ mHawk100 ಡೀಸೆಲ್ ಎಂಜಿನ್ ಅನ್ನು ಉಳಿಸಿಕೊಂಡಿದೆ. ಇದು 100 bh ಪವರ್ ಮತ್ತು 260 Nm ಟಾರ್ಕ್ ಅನ್ನು ನೀಡುತ್ತದೆ. ಇದು 5 - ಸ್ಪೀಡ್ ಮ್ಯಾನುವಲ್ ಟ್ರಾನ್ಸ್ ‌ಮಿಷನ್‌ನೊಂದಿಗೆ ಜೋಡಿಯಾಗಿದೆ.

ಇದರ ರಿಯರ್ ವೀಲ್ - ಡ್ರೈವ್ ಸೆಟಪ್, ಬಾಡಿ - ಆನ್ - ಫ್ರೇಮ್ ನಿರ್ಮಾಣ ಮತ್ತು ಮಲ್ಟಿ ಟೆರೈನ್ ತಂತ್ರಜ್ಞಾನದ (MTT) ಪರಿಚಯವು ಈ SUV ಒರಟು ರಸ್ತೆಗಳು ಮತ್ತು ವೈವಿಧ್ಯಮಯ ಭೂಪ್ರದೇಶವನ್ನು ನಿರ್ವಹಿಸುವ ಸಾಮರ್ಥ್ಯವನ್ನು ಹೊಂದಿದೆ ಎಂಬುದನ್ನು ಕಚಿತಪಡಿಸುತ್ತದೆ. ಇದೇ ಕಾರಣಕ್ಕೆ ಬೊಲೆರೋ ನಿಯೋ ಅರೆ - ನಗರ ಮತ್ತು ಗ್ರಾಮೀಣ ಪ್ರದೇಶಗಳಲ್ಲಿ ಖರೀದಿದಾರರಿಗೆ ಬಲವಾದ ಆಕರ್ಷಣೆಯಾಗಿದೆ.

ಮಹೀಂದ್ರ ಕಂಪನಿಯು ಬೊಲೆರೊ ನಿಯೋ ಫೇಸ್‌ಲಿಫ್ಟ್ ಅನ್ನು N4, N8, N10 ಮತ್ತು ಹೊಸ N11 ಎಂಬ ನಾಲ್ಕು ವೇರಿಯೆಂಟ್‌ಗಳಲ್ಲಿ ನೀಡುತ್ತಿದೆ. ಹೆಚ್ಚುವರಿ ವೈಶಿಷ್ಟ್ಯಗಳ ಆಧಾರದ ಮೇಲೆ ಟಾಪ್ ವೇರಿಯೆಂಟ್‌ಗಳ ಬೆಲೆ ಬದಲಾಗುತ್ತದೆ. ಮಹೀಂದ್ರಾ ಬೊಲೆರೊ ನಿಯೋ ಫೇಸ್‌ಲಿಫ್ಟ್ ಈಗ ಭಾರತದಾದ್ಯಂತ ಮಹೀಂದ್ರ ಡೀಲರ್‌ಶಿಪ್‌ಗಳಲ್ಲಿ ಖರೀದಿಗೆ ಲಭ್ಯವಿದೆ. ವಿತರಣೆಗಳು ಶೀಘ್ರದಲ್ಲೇ ಪ್ರಾರಂಭವಾಗುವ ನಿರೀಕ್ಷೆಯಿದೆ.