Maruti: 26 ಕಿ.ಮೀ ಮೈಲೇಜ್: ಭಾರತದ ಬೆಸ್ಟ್ 7-ಸೀಟರ್: ಜನ ಮುಗಿಬಿದ್ದು ಖರೀದಿ

ಮಾರುತಿ ಸುಜುಕಿಯ ಎರ್ಟಿಗಾ (Maruti suzuki Ertiga) ಭಾರತೀಯ ಆಟೋಮೊಬೈಲ್ ಮಾರುಕಟ್ಟೆಯಲ್ಲಿ ತನ್ನ ಭದ್ರಕೋಟೆಯನ್ನು ಮುಂದುವರೆಸಿದೆ. ಆಗಸ್ಟ್ 2025 ರಲ್ಲಿ ಬರೋಬ್ಬರಿ 18,445 ಯುನಿಟ್‌ ಕಾರುಗಳ ಮಾರಾಟದೊಂದಿಗೆ ದೇಶದ ಅತ್ಯುತ್ತಮ ಮಾರಾಟವಾದ ಕಾರಾಗಿ ಹೊರಹೊಮ್ಮಿದೆ. ಈ ಅಂಕಿ ಅಂಶವು ಬಹು - ಉಪಯುಕ್ತ ವಾಹನದ (MUV) ನಿರಂತರ ಜನಪ್ರಿಯತೆಯನ್ನು ಪ್ರದರ್ಶಿಸುವುದಲ್ಲದೆ, ಏಳು ಆಸನಗಳ ಆಯ್ಕೆಗಳ ಕಡೆಗೆ ವಿಶಾಲವಾದ ಗ್ರಾಹಕ ಬದಲಾವಣೆಯನ್ನು ಪ್ರತಿಬಿಂಬಿಸುತ್ತದೆ. ವಿಶೇಷವಾಗಿ ದೊಡ್ಡ ಕುಟುಂಬಗಳು ಮತ್ತು ಟ್ಯಾಕ್ಸಿ ವಿಭಾಗವು ವಿಶ್ವಾಸಾರ್ಹ, ಇಂಧನ - ಸಮರ್ಥ ಕಾರುಗಳನ್ನು ಹುಡುಕುತ್ತಿದ್ದು, ಎರ್ಟಿಗಾ ಬೆಸ್ಟ್ ಆಯ್ಕೆಯಾಗಿ ನಿಲ್ಲುತ್ತಿದೆ.

ಕಳೆದ ವರ್ಷದ ಇದೇ ತಿಂಗಳಿಗೆ ಹೋಲಿಸಿದರೆ, ಎರ್ಟಿಗಾದ ಆಗಸ್ಟ್ ಮಾರಾಟವು ಶೇ1 ಇಳಿಕೆಯಾಗಿದೆ. ಅಂದರೆ ಆಗಸ್ಟ್ 2024 ರಲ್ಲಿ 18,580 ಯುನಿಟ್‌ ಕಾರುಗಳು ಮಾರಾಟವಾಗಿದ್ದು, ಆಗಸ್ಟ್ 2025 ರಲ್ಲಿ 18,445 ಯುನಿಟ್‌ಗಳಿಗೆ ಕುಸಿದಿದೆ. ಆದರೂ ತಿಂಗಳಿನಿಂದ ತಿಂಗಳಿಗೆ ಹೋಲಿಸಿದರೆ, ಎರ್ಟಿಗಾ ಜುಲೈ 2025 ಕ್ಕಿಂತ ಶೇ11 ರಷ್ಟು ಹೆಚ್ಚಳವನ್ನು ಕಂಡಿದೆ. ಜುಲೈನಲ್ಲಿ 16,604 ಯುನಿಟ್‌ ಕಾರುಗಳು ಮಾರಾಟವಾಗಿದ್ದವು.

ಇದು ಹಬ್ಬದ ಋತುವಿನ ಮೊದಲು ಬೇಡಿಕೆಯಲ್ಲಿ ಬಲವಾದ ಚೇತರಿಕೆಯನ್ನು ಸೂಚಿಸುತ್ತದೆ. ಸರಕು ಮತ್ತು ಸೇವಾ ತೆರಿಗೆ (ಜಿಎಸ್‌ಟಿ) ದರ ಕಡಿತದ ಬಗ್ಗೆ ಇತ್ತೀಚಿನ ವರದಿಗಳು ಕೆಲವು ಖರೀದಿದಾರರನ್ನು ಕಾಯುವಂತೆ ಮಾಡಿದ್ದರೂ, ಎರ್ಟಿಗಾದ ಪ್ರಾಯೋಗಿಕತೆ, ಸೌಕರ್ಯ, ಸಿಎನ್‌ಜಿ ಮತ್ತು ಪೆಟ್ರೋಲ್ ವೇರಿಯೆಂಟ್‌ಗಳ ವ್ಯಾಪಕ ಲಭ್ಯತೆಯು ಸ್ಥಿರವಾದ ಆಸಕ್ತಿಯನ್ನು ಸೆಳೆಯುತ್ತಲೇ ಇದೆ ಎಂಬುಕ್ಕೆ ಈ ಮಾರಟವು ಉತ್ತಮ ಉದಾಹರಣೆಯಾಗಿದೆ.

ಗಮನಾರ್ಹವಾಗಿ, ಎರ್ಟಿಗಾ ಈ ಆಗಸ್ಟ್‌ನಲ್ಲಿ ಮಾರುತಿ ಸುಜುಕಿಯ ದೀರ್ಘಕಾಲಿಕ ಬೆಸ್ಟ್ ಸೆಲ್ಲರ್ ಡಿಜೈರ್ ಅನ್ನು ಕೆಳಗಿಳಿಸಿದೆ. ಕಳೆದ ತಿಂಗಳು ಟಾಪ್‌ನಲ್ಲಿದ್ದ ಡಿಜೈರ್ ಈ ಆಗಸ್ಟ್‌ನಲ್ಲಿ ಎರಡನೇ ಸ್ಥಾನಕ್ಕೆ ಇಳಿದಿದೆ. ಹುಂಡೈ ಕ್ರೆಟಾ ಮತ್ತು ವ್ಯಾಗನ್ ಆರ್ ಒಟ್ಟಾರೆ ಪ್ರಯಾಣಿಕ ವಾಹನ ಶ್ರೇಯಾಂಕದಲ್ಲಿ 3 ಮತ್ತು 4ನೇ ಸ್ಥಾನದಲ್ಲಿವೆ. ಎರ್ಟಿಗಾದ ಈ ಮಾರಾಟದ ಏರಿಕೆಯು ಕುಟುಂಬಗಳಲ್ಲಿ ಮಾತ್ರವಲ್ಲದೆ ಫ್ಲೀಟ್ ಮತ್ತು ಟ್ಯಾಕ್ಸಿ ವಲಯಗಳಲ್ಲಿಯೂ ಎರ್ಟಿಗಾದ ಜನಪ್ರಿಯತೆಯನ್ನು ಒತ್ತಿಹೇಳುತ್ತದೆ.

ಏಕೆಂದರೆ ಎರ್ಟಿಗಾ ಸಿಎನ್‌ಜಿ ಮಾಡಲ್ ನಗರ ವಾಣಿಜ್ಯ ನಿರ್ವಾಹಕರಿಗೆ ಪ್ರಮುಖ ಆಯ್ಕೆಯಾಗಿ ಉಳಿದಿದೆ. ಮಾರುತಿ ಸುಜುಕಿ, ಒಟ್ಟಾರೆ ಮಾರುಕಟ್ಟೆಯು ಹೆಚ್ಚಾಗಿ ಸಮತಟ್ಟಾಗಿದ್ದರೂ, ಸ್ಪರ್ಧಾತ್ಮಕವಾಗಿ ಎರ್ಟಿಗಾದ ಬಹುಮುಖತೆಯನ್ನು ಪ್ರದರ್ಶಿಸಿದೆ. 2.25 ಲಕ್ಷ ಯುನಿಟ್‌ ಕಾರುಗಳನ್ನು ದಾಟಿದ ಸಂಚಿತ ವಾರ್ಷಿಕ ಮೈಲಿಗಲ್ಲಿಯೊಂದಿಗೆ, ಎರ್ಟಿಗಾ ಭಾರತದ MUV ವಿಭಾಗದಲ್ಲಿ ತನ್ನ ನಾಯಕತ್ವವನ್ನು ಬಲಪಡಿಸಿಕೊಂಡಿದೆ.

ಎರ್ಟಿಗಾ ವಿಶೇಷತೆಗಳು: ಮಾರುತಿ ಎರ್ಟಿಗಾ ಬೆಲೆಯು ರೂ. 9.11 ಲಕ್ಷದಿಂದ ಆರಂಭವಾಗಿ ಗರಿಷ್ಠ ರೂ.13.40 ಲಕ್ಷ (ಎಕ್ಸ್ - ಶೋರೂಂ) ದರವನ್ನು ಪಡೆದಿದೆ. ಎಲ್ಎಕ್ಸ್ಐ, ವಿಎಕ್ಸ್ಐ, ಝಡ್ಎಕ್ಸ್ಐ ಮತ್ತು ಝಡ್ಎಕ್ಸ್ಐ (ಒ) ಸೇರಿದಂತೆ ವಿವಿಧ ವೇರಿಯೆಂಟ್ ಆಯ್ಕೆಯಲ್ಲಿ ಸಿಗುತ್ತದೆ. ಈ ಕಾರು 7 ಆಸನಗಳನ್ನು ಹೊಂದಿದ್ದು, ಪ್ರಯಾಣಿಕರಿಗೆ ಆರಾಮದಾಯಕ ಪ್ರಯಾಣ ಅನುಭವ ನೀಡುತ್ತದೆ. ಹೆಚ್ಚಿನ ಲಗೇಜ್ ಸಾಗಿಸಲು 209 ಲೀ. ಬೂಟ್ ಸ್ಪೇಸ್‌ ಹೊಂದಿದೆ.

ಇದು 1.5-ಲೀ. ಪೆಟ್ರೋಲ್ ಹಾಗೂ ಸಿಎನ್‌ಜಿ ಆಯ್ಕೆಯಲ್ಲಿ ಖರೀದಿಗೆ ಲಭ್ಯವಿದೆ. ವೇರಿಯೆಂಟ್‌ಗಳಿಗೆ ಅನುಗುಣವಾಗಿ 5-ಸ್ಪೀಡ್ ಮ್ಯಾನುವಲ್ ಹಾಗೂ 6-ಸ್ಪೀಡ್ ಆಟೋಮೆಟಿಕ್ ಗೇರ್‌ಬಾಕ್ಸ್‌ ಹೊಂದಿದೆ. ಸಿಎನ್‌ಜಿಯಲ್ಲಿ 26 ಕಿ.ಮೀವರೆಗೆ ಮೈಲೇಜ್ ನೀಡುತ್ತದೆ. 45 ಲೀಟರ್‌ ಸಾಮರ್ಥ್ಯವಿರುವ ಫ್ಯುಯೆಲ್ ಟ್ಯಾಂಕ್‌ ಹೊಂದಿದೆ.

ಹೊಸ ಎರ್ಟಿಗಾ 7-ಇಂಚಿನ ಟಚ್‌ಸ್ಕ್ರೀನ್ ಇನ್ಫೋಟೈನ್‌ಮೆಂಟ್ ಸಿಸ್ಟಮ್, ಆಂಡ್ರಾಯ್ಡ್ ಆಟೋ, ಆಪಲ್ ಕಾರ್‌ಪ್ಲೇ, ಪ್ಯಾಡಲ್ ಶಿಫ್ಟರ್ಸ್, ಕೀಲೆಸ್ - ಎಂಟ್ರಿ, ಎಂಜಿನ್ ಸ್ಟಾರ್ಟ್/ ಸ್ಟಾಪ್ ಬಟನ್, ಆಟೋಮೆಟಿಕ್ ಕ್ಲೇಮೇಟ್ ಕಂಟ್ರೋಲ್ ಮತ್ತು ಆಟೋ ಎಸಿ ಸೇರಿದಂತೆ ಹಲವು ವೈಶಿಷ್ಟ್ಯಗಳನ್ನು ಹೊಂದಿದೆ. ರಕ್ಷಣೆಗಾಗಿ 6-ಏರ್‌ಬ್ಯಾಗ್‌ಗಳು, ಎಬಿಎಸ್, ಇಬಿಡಿ, ಇಎಸ್‌ಪಿ, ರೇರ್ ಪಾರ್ಕಿಂಗ್ ಸೇನಾರ್ಸ್ & ಹಿಲ್ - ಹೋಲ್ಡ್ ಅಸಿಸ್ಟ್‌ನ್ನು ಹೊಂದಿದೆ.