Maruti: ಮಾರುತಿಯ ಮೊದಲ ಎಲೆಕ್ಟ್ರಿಕ್ ಕಾರು ಬಿಡುಗಡೆಗೆ ಸಜ್ಜು: ಯಾರಿಗೂ ತಿಳಿಯದ 5 ಸಂಗತಿಗಳು!

ಮಾರುತಿ ಸುಜುಕಿ ಕೊನೆಗೂ ತನ್ನ ಬಹುನಿರೀಕ್ಷಿತ ಇ ವಿಟಾರಾ ಎಲೆಕ್ಟ್ರಿಕ್ ಕಾರನ್ನು ಬಿಡುಗಡೆ ಮಾಡಲು ಸಜ್ಜಾಗಿದೆ. ಈ ಎಲೆಕ್ಟ್ರಿಕ್ ಕಾರನ್ನು ಈ ಮೊದಲು ಭಾರತ್ ಮೊಬಿಲಿಟಿ ಗ್ಲೋಬಲ್ ಎಕ್ಸ್ ಪೋ 2025 ರಲ್ಲಿ ಪ್ರದರ್ಶಿಸಲಾಯಿತು. ಸದ್ಯದ ಎಲೆಕ್ಟ್ರಿಕ್ ಕಾರು ಮಾರುಕಟ್ಟೆಯಲ್ಲಿನ ಪೈಪೋಟಿಯನ್ನು ಗಮನದಲ್ಲಿಟ್ಟುಕೊಂಡು ಮಾರುತಿ ಈ ಕಾರನ್ನು ಸ್ಪರ್ಧಾತ್ಮಕ ಬೆಲೆಗೆ ಬಿಡುಗಡೆ ಮಾಡುವ ಸಾಧ್ಯತೆಗಳು ಹೆಚ್ಚಾಗಿವೆ. ಭಾರತದಲ್ಲಿ ಅಧಿಕೃತವಾಗಿ ಬಿಡುಗಡೆಯಾಗುವ ಮೊದಲು ಇ-ವಿಟಾರಾ ಬಗ್ಗೆ ನೀವು ತಿಳಿದುಕೊಳ್ಳಬೇಕಾದ ಐದು ವಿಷಯಗಳು ಇಲ್ಲಿವೆ.

ವೈಶಿಷ್ಟ್ಯಗಳು: ಇ-ವಿಟಾರಾದಲ್ಲಿ ವೆಂಟಿಲೇಟೆಡ್ ಫ್ರಂಟ್ ಲೈನ್ ಸೀಟುಗಳು, 10-ವೇ ಪವರ್ ಅಡ್ಜಸ್ಟ್ ಮಾಡಬಹುದಾದ ಡ್ರೈವರ್ ಸೀಟ್, ಟ್ವಿನ್ ಡಿಜಿಟಲ್ ಸ್ಕ್ರೀನ್ ಗಳಾದ 10.1-ಇಂಚಿನ ಇನ್ಫೋಟೈನ್ ಮೆಂಟ್ ಸಿಸ್ಟಮ್ ಮತ್ತು 10.25-ಇಂಚಿನ ಇನ್ಸ್ ಟ್ರೂಮೆಂಟ್ ಕನ್ಸೋಲ್, ಸ್ಲೈಡಿಂಗ್ ಮತ್ತು ರೆಕ್ಲೈನಿಂಗ್ ಸೀಟುಗಳು, ಮುಂಭಾಗ ಮತ್ತು ಹಿಂಭಾಗದಲ್ಲಿ ಯುಎಸ್‌ಬಿ ಮತ್ತು ಟೈಪ್-ಸಿ ಚಾರ್ಜಿಂಗ್ ಪೋರ್ಟ್ ನಂತಹ ವೈಶಿಷ್ಟ್ಯಗಳನ್ನು ಹೊಂದಿದೆ.

10 ವರ್ಷಗಳ ವಾರಂಟಿ: ಮೂಲಗಳ ಪ್ರಕಾರ ಸುಜುಕಿ ಇತ್ತೀಚೆಗೆ ಯುಕೆ ಮತ್ತು ಐರ್ಲೆಂಡ್ ಮಾರುಕಟ್ಟೆಗಳಿಗೆ 10 ವರ್ಷಗಳ ಅಥವಾ 1,60,000 ಕಿ.ಮೀ ಬ್ಯಾಟರಿ ವಾರಂಟಿಯನ್ನು ಘೋಷಿಸಿದೆ. ಇದು ಭಾರತದಲ್ಲಿ ಬಿಡುಗಡೆಯಾದಾಗ ಇ-ವಿಟಾರಾಗೆ ಅನ್ವಯಿಸುವ ಸಾಧ್ಯತೆಯಿದೆ. ಇದು ಗ್ರಾಹಕರಲ್ಲಿ ವಿಶ್ವಾಸ ಹೆಚ್ಚಿಸಲು ಹಾಗೂ ಕಾರಿನ ಮಾರಾಟಕ್ಕೆ ಸಹಕಾರಿಯಾಗಲಿದೆ.

ಸುರಕ್ಷತೆ: ಇ-ವಿಟಾರಾ ಲೆವೆಲ್ 2 ಎಡಿಎಎಸ್ ಸುರಕ್ಷತಾ ಕಾರ್ಯವನ್ನು ನೀಡುವ ಮೊದಲ ಮಾರುತಿ ಸುಜುಕಿ ವಾಹನವಾಗಿದೆ. ಇದರಲ್ಲಿ ಬ್ಲೈಂಡ್ ಸ್ಪಾಟ್ ಮಾನಿಟರಿಂಗ್, ಆಕ್ಟಿವ್ ಕಾರ್ನರಿಂಗ್ ಕಂಟ್ರೋಲ್ ಮತ್ತು ಅಡಾಪ್ಟಿವ್ ಕ್ರೂಸ್ ಕಂಟ್ರೋಲ್, ಲೇನ್ ಕೀಪ್ ಅಸಿಸ್ಟ್, ಅಡಾಪ್ಟಿವ್ ಹೈ ಬೀಮ್ ಸಿಸ್ಟಮ್, ಮಲ್ಟಿ ಕೊಲಿಷನ್ ಬ್ರೇಕಿಂಗ್ ಅನ್ನು ಒಳಗೊಂಡಿದೆ.

ಈ ಕಾರಿನಲ್ಲಿ ಹೆಚ್ಚುವರಿ ಡ್ರೈವರ್ ಮೊಣಕಾಲು ಏರ್ ಬ್ಯಾಗ್, ಆಲ್ ವೀಲ್ ಡಿಸ್ಕ್ ಬ್ರೇಕ್ ಗಳು, 360 ಕ್ಯಾಮೆರಾ ಮತ್ತು ಎಸ್ ಒಎಸ್ ಬಟನ್ ನೊಂದಿಗೆ ತುರ್ತು ಕರೆ ಸೇರಿದಂತೆ 7 ಏರ್ ಬ್ಯಾಗ್ ಗಳು, ಬ್ರೇಕ್ ಹೋಲ್ಡ್ ಫಂಕ್ಷನ್ ನೊಂದಿಗೆ ಎಲೆಕ್ಟ್ರಾನಿಕ್ ಪಾರ್ಕಿಂಗ್ ಬ್ರೇಕ್, ಟೈರ್ ಪ್ರೆಶರ್ ಮಾನಿಟರಿಂಗ್ ಸಿಸ್ಟಮ್ (ಟಿಪಿಎಂಎಸ್) ಹೊಂದಿದೆ. ಹಾಗೆಯೇ ಅಕೌಸ್ಟಿಕ್ ವೆಹಿಕಲ್ ಅಲಾರಂ ಸಿಸ್ಟಮ್ (ಎವಿಎಎಸ್) ಕಡಿಮೆ ವೇಗದಲ್ಲಿ ಕಾರ್ಯನಿರ್ವಹಿಸುತ್ತದೆ.

ಬ್ಯಾಟರಿ, ಶ್ರೇಣಿ: ಇ-ವಿಟಾರಾ 49 ಕಿಲೋವ್ಯಾಟ್ ಮತ್ತು 61 ಕಿಲೋವ್ಯಾಟ್ ಎಂಬ ಎರಡು ಬ್ಯಾಟರಿ ಆಯ್ಕೆಗಳಲ್ಲಿ ಲಭ್ಯವಿದೆ. 61 ಕಿಲೋವ್ಯಾಟ್ ಬ್ಯಾಟರಿ ಹೊಂದಿರುವ ಕಾರು 172 ಬಿಹೆಚ್ ಪವರ್ ಮತ್ತು 189 ಎನ್‌ಎಂ ಟಾರ್ಕ್ ಅನ್ನು ಉತ್ಪಾದಿಸುತ್ತದೆ. 49 ಕಿಲೋವ್ಯಾಟ್ ಹೊಂದಿರುವ ಕಾರಿನ ಮೋಟಾರ್ 142 ಬಿಹೆಚ್ ಪವರ್ ಮತ್ತು 189 ಎನ್‌ಎಂ ಟಾರ್ಕ್ ಉತ್ಪಾದಿಸುತ್ತದೆ.

150 ಕಿಲೋವ್ಯಾಟ್ ಚಾರ್ಜರ್‌ನೊಂದಿಗೆ, 61 ಕಿಲೋವ್ಯಾಟ್ ಬ್ಯಾಟರಿ 45 ನಿಮಿಷಗಳಲ್ಲಿ ಶೇ10% ರಿಂದ 80% ವರೆಗೆ ಚಾರ್ಜ್ ಆಗಬಲ್ಲದು. ಇದರಲ್ಲಿ ಇಕೋ, ನಾರ್ಮಲ್ ಮತ್ತು ಸ್ಪೋರ್ಟ್ ಎಂಬ ಅನೇಕ ಡ್ರೈವ್ ಮೋಡ್ ಗಳನ್ನು ನೀಡಲಾಗಿದೆ. ಎಡಬ್ಲ್ಯುಡಿ ಆವೃತ್ತಿಯು ಉತ್ತಮ ಎಳೆತಕ್ಕಾಗಿ (ಟ್ರಾಕ್ಷನ್) ಸ್ನೋ ಮೋಡ್ ನೊಂದಿಗೆ ಬರುತ್ತದೆ.

ಒಮ್ಮೆ ಸಂಪೂರ್ಣ ಚಾರ್ಜ್ ಮಾಡಿದರೆ ಬೇಸ್ ಟ್ರಿಮ್ ಸುಮಾರು 345 ಕಿ.ಮೀ ರೇಂಜ್ ನೀಡುತ್ತದೆ. 61 ಕಿಲೋವ್ಯಾಟ್ ಎಡಬ್ಲ್ಯುಡಿ ಮಾದರಿಯು ಒಮ್ಮೆ ಸಂಪೂರ್ಣ ಚಾರ್ಜ್ ಮಾಡಿದರೆ 426 ಕಿ.ಮೀ ರೇಂಜ್ ನೀಡುವುದಾಗಿ ಕಂಪನಿ ತಿಳಿಸಿದೆ. ಮಾರುತಿ ಸುಜುಕಿ ಇ ವಿಟಾರಾ ಎಲೆಕ್ಟ್ರಿಕ್ ಕಾರು ಬಿಡುಗಡೆ ನಂತರ ಹ್ಯುಂಡೈ ಕ್ರೆಟಾ ಎಲೆಕ್ಟ್ರಿಕ್, ಮಹೀಂದ್ರಾ ಬಿಇ 6, ಟಾಟಾ ಕರ್ವ್ ಇವಿ ಮತ್ತು ಎಂಜಿ ಝಡ್ಎಸ್ ಇವಿ ಕಾರುಗಳಿಗೆ ಪೈಪೋಟಿ ನೀಡಲಿದೆ.