ಅಗ್ಗದ ಹೈಬ್ರಿಡ್ ಕಾರುಗಳ ನಿರ್ಮಾಣಕ್ಕೆ ಸರ್ವಸಿದ್ಧ: ಪ್ರತಿಸ್ಪರ್ಧಿಗಳಿಗೆ ನಡುಕ ಹುಟ್ಟಿಸಿದೆ ಮಾರುತಿ ಸುಜುಕಿ!

ಮಾರುತಿ ಸುಜುಕಿ (Maruti Suzuki), ತೋಷಿಬಾ ಮತ್ತು ಡೆನ್ಸೊ ಜೊತೆಗಿನ ಪಾಲುದಾರಿಕೆಯಲ್ಲಿ ಗುಜರಾತ್‌ನ ಹಂಸಲ್‌ಪುರ ಸ್ಥಾವರದಲ್ಲಿ ಲಿಥಿಯಂ - ಐಯಾನ್ ಬ್ಯಾಟರಿ ಸೆಲ್‌ಗಳು ಮತ್ತು ಎಲೆಕ್ಟ್ರೋಡ್‌ಗಳನ್ನು ತಯಾರಿಸಲು ಪ್ರಾರಂಭಿಸಿದೆ. ಗ್ರ್ಯಾಂಡ್ ವಿಟಾರಾ ಮತ್ತು ಮುಂಬರುವ ಕೆಲವು ಮಾಡಲ್‌ಗಳು ಹೈಬ್ರಿಡ್ ಎಲೆಕ್ಟ್ರಿಕ್ ವಾಹನಗಳಾಗುವ ಸಾಧ್ಯತೆ ಇದೆ ಎಂದು ವರದಿಯಾಗಿದೆ. ಎಲೆಕ್ಟ್ರೋಡ್ - ಮಟ್ಟದ ಲಿಥಿಯಂ - ಐಯಾನ್ ಸೆಲ್ ಉತ್ಪಾದನೆಯನ್ನು ಸ್ಥಳೀಯವಾಗಿ ಮಾಡುವ ಮೊದಲ ಭಾರತೀಯ ಸೌಲಭ್ಯ ಇದಾಗಿದೆ. ಈ ಮೂಲಕ ಮುಂಬರುವ ವರ್ಷಗಳಲ್ಲಿ ಬಜೆಟ್ ಬೆಲೆಯಲ್ಲಿ ಭಾರತದಲ್ಲಿ ಹೈಬ್ರಿಡ್ ಕಾರುಗಳು ಸಿಗುವ ನಿರೀಕ್ಷೆಗಳು ಹೆಚ್ಚಾಗಿವೆ.

ಬಜೆಟ್ ಸ್ನೇಹಿ ಹೈಬ್ರಿಡ್ ಕಾರುಗಳ ಬಗ್ಗೆ ಹೇಳುವುದಾದರೆ, ಮಾರುತಿ ಸುಜುಕಿ 2025 ರ ಅಂತ್ಯದ ವೇಳೆಗೆ ಹೈಬ್ರಿಡ್ ಎಂಜಿನ್‌ನೊಂದಿಗೆ ಫ್ರಾಂಕ್ಸ್ ಫೇಸ್‌ಲಿಫ್ಟ್ ಅನ್ನು ಬಿಡುಗಡೆ ಮಾಡಲು ಸಿದ್ಧತೆ ನಡೆಸುತ್ತಿದೆ. ಇದು ಭಾರತದಲ್ಲಿ ಅಭಿವೃದ್ಧಿಪಡಿಸಲಾದ ತನ್ನದೇ ಆದ ಹೈಬ್ರಿಡ್ ತಂತ್ರಜ್ಞಾನವನ್ನು ಹೊಂದಿರುವ ಮಾರುತಿಯ ಮೊದಲ ವಾಹನವಾಗಿದೆ. ಫ್ರಾಂಕ್ಸ್ ಹೈಬ್ರಿಡ್ 30 ರಿಂದ 35 ಕಿ.ಮೀ ನಡುವೆ ಮೈಲೇಜ್ ನೀಡುವ ನಿರೀಕ್ಷೆಯಿದೆ.

ಇದು ಅದರ ಪೆಟ್ರೋಲ್ ಮತ್ತು ಸಿಎನ್‌ಜಿ ರೂಪಾಂತರಗಳಿಗಿಂತ ಗಮನಾರ್ಹ ಸುಧಾರಣೆಯಾಗಿದೆ. ಹೈಬ್ರಿಡ್ ಮಾದರಿಯ ಬೆಲೆ ಪೆಟ್ರೋಲ್ ಆವೃತ್ತಿಗಿಂತ ಸುಮಾರು 2 ರಿಂದ 2.5 ಲಕ್ಷ ರೂ. ಗಳಷ್ಟು ಹೆಚ್ಚಿರುತ್ತದೆ ಎಂದು ನಿರೀಕ್ಷಿಸಲಾಗಿದೆ. ಇನ್ನು ಪ್ರಸ್ತುತ ಪೆಟ್ರೋಲ್ ಮಾರುತಿ ಫ್ರಾಂಕ್ಸ್ ಬೆಲೆಯು ರೂ. 7.51 ಲಕ್ಷದಿಂದ ರೂ. 13.04 ಲಕ್ಷದವರೆಗೆ (ಎಕ್ಸ್ - ಶೋರೂಂ) ಇದೆ.

ಸ್ಥಳೀಯ ಉತ್ಪಾದನೆಯ ಲಾಭ

ಹೈಬ್ರಿಡ್ ಕಾರುಗಳನ್ನು ದುಬಾರಿಯಾಗಿಸಲು ದೊಡ್ಡ ಕಾರಣವೆಂದರೆ ಅವುಗಳ ಭಾಗಗಳು ಮತ್ತು ಬ್ಯಾಟರಿ ಪ್ಯಾಕ್‌ಗಳು, ಆದರೆ ಮಾರುತಿ ಸುಜುಕಿ ಸ್ಥಳೀಯ ಉತ್ಪಾದನೆಯ ಮೂಲಕ ಅದರ ವೆಚ್ಚವನ್ನು ಗಮನಾರ್ಹವಾಗಿ ಕಡಿಮೆ ಮಾಡಬಹುದು ಎಂದು ನಂಬಲಾಗಿದೆ. ಈ ಕಾರಣಕ್ಕಾಗಿಯೇ ಕಂಪನಿಯು ಭಾರತದಲ್ಲಿ ಲಿಥಿಯಂ - ಐಯಾನ್ ಸೆಲ್ ಮತ್ತು ಎಲೆಕ್ಟ್ರೋಡ್ ಉತ್ಪಾದನೆಯನ್ನು ಪ್ರಾರಂಭಿಸುವುದಾಗಿ ಘೋಷಿಸಿದೆ.

ಆರಂಭದಲ್ಲಿ, ಈ ಸೆಲ್‌ಗಳು ಮತ್ತು ಎಲೆಕ್ಟ್ರೋಡ್ ಗಳನ್ನು ಗ್ರ್ಯಾಂಡ್ ವಿಟಾರಾ ಹೈಬ್ರಿಡ್ ಗಾಗಿ ಬಳಸಲಾಗುವುದು, ನಂತರ ಅವುಗಳನ್ನು ಮುಂಬರುವ ಇತರ ಹೊಸ ಎಸ್‌ಯುವಿಗಳಿಗೂ ಬಳಸಲಾಗುತ್ತದೆ. ಇದು ಮಾರುತಿಗೆ ಕೈಗೆಟುಕುವ ಹೈಬ್ರಿಡ್ ಕಾರುಗಳನ್ನು ಪರಿಚಯಿಸುವ ಅವಕಾಶವನ್ನು ನೀಡುತ್ತದೆ. ಭವಿಷ್ಯದಲ್ಲಿ ಹೈಬ್ರಿಡ್ ತಂತ್ರಜ್ಞಾನವನ್ನು ದುಬಾರಿ ಕಾರುಗಳಿಗೆ ಮಾತ್ರ ಸೀಮಿತಗೊಳಿಸುವುದಿಲ್ಲ ಎಂದು ಮಾರುತಿ ಸುಜುಕಿ ಈಗಾಗಲೇ ಹೇಳಿದೆ.

ಸೆಪ್ಟೆಂಬರ್ 3, 2025 ರಂದು ಬಿಡುಗಡೆಯಾಗಲಿರುವ ಹೊಸ ಮಾರುತಿಯ ಮೊದಲ ಎಲೆಕ್ಟ್ರಿಕ್ ಎಸ್‌ಯುವಿ ಇದಕ್ಕೆ ಆರಂಭಿಕ ಉದಾಹರಣೆಯಾಗಿದೆ. ಇದಕ್ಕಾಗಿ ಮಾರುತಿ ಸುಜುಕಿ ಈಗಾಗಲೇ 2031 ರ ವೇಳೆಗೆ ಭಾರತದಲ್ಲಿ 70,000 ಕೋಟಿ ರೂ.ಗಳನ್ನು ಹೂಡಿಕೆ ಮಾಡುವುದಾಗಿ ಘೋಷಿಸಿದೆ. ಈ ಹೂಡಿಕೆಯನ್ನು ಬ್ಯಾಟರಿಗಳು, ಸೆಲ್‌ಗಳು, ಹೈಬ್ರಿಡ್ ತಂತ್ರಜ್ಞಾನ ಮತ್ತು ಎಲೆಕ್ಟ್ರಿಕ್ ವಾಹನಗಳ ಸ್ಥಳೀಕರಣದಲ್ಲಿ ಬಳಸಲಾಗುತ್ತದೆ.

ಮುಂಬರುವ ವರ್ಷಗಳಲ್ಲಿ ಪ್ರೀಮಿಯಂ ಮಾತ್ರವಲ್ಲದೆ ಬಜೆಟ್ ಸ್ನೇಹಿ ಹೈಬ್ರಿಡ್ ಕಾರುಗಳನ್ನು ಭಾರತೀಯ ರಸ್ತೆಗಳಲ್ಲಿ ಬಿಡುಗಡೆ ಮಾಡಲು ಕಂಪನಿಯು ತಯಾರಿ ನಡೆಸುತ್ತಿದೆ ಎಂಬುದರ ನೇರ ಸೂಚನೆಯಾಗಿದೆ. ಇಲ್ಲಿಯವರೆಗೆ ಗ್ರ್ಯಾಂಡ್ ವಿಟಾರಾ ಮತ್ತು ಇನ್ವಿಕ್ಟೋದಂತಹ ಪ್ರೀಮಿಯಂ ಹೈಬ್ರಿಡ್ ಕಾರುಗಳಿಗೆ ಸೀಮಿತವಾಗಿದ್ದ ಈ ತಂತ್ರಜ್ಞಾನವನ್ನು ಮುಂಬರುವ ಸಮಯದಲ್ಲಿ ಕಾಂಪ್ಯಾಕ್ಟ್ ಮತ್ತು ಬಜೆಟ್ ಸ್ನೇಹಿ ಎಸ್‌ಯುವಿಗಳಲ್ಲಿಯೂ ಕಾಣಬಹುದು.

ಸಂಕ್ಷಿಪ್ತವಾಗಿ ಹೇಳುವುದಾದರೆ, ಮಾರುತಿ ಸುಜುಕಿಯ ಹೊಸ ಲಿಥಿಯಂ - ಐಯಾನ್ ಬ್ಯಾಟರಿ ಉತ್ಪಾದನೆಯು ಬಜೆಟ್ ಸ್ನೇಹಿ ಫ್ರಾಂಕ್ಸ್ ಹೈಬ್ರಿಡ್ ಸೇರಿದಂತೆ ಅದರ ಸ್ಟ್ರಾಂಗ್ ಹೈಬ್ರಿಡ್ ವಾಹನಗಳಿಗೆ ಬೆಂಬಲ ನೀಡಲಿದ್ದು, ಭಾರತದಲ್ಲಿ ಕೈಗೆಟುಕುವ ಹೈಬ್ರಿಡ್ ಕಾರು ಲಭ್ಯತೆಯಲ್ಲಿ ಪ್ರಮುಖ ಹೆಜ್ಜೆಯಾಗಿದೆ. ಮಾರುತಿಯ ಈ ಹೊಸ ಯೋಜನೆಯ ಬಗ್ಗೆ ನಿಮ್ಮಾ ಅನಿಸಿಕೆಗಳನ್ನು ಕಮೆಂಟ್‌ನಲ್ಲಿ ತಿಳಿಸಿ.