Tata: ಇಡೀ ವಿಶ್ವವೆ ತಿರುಗಿ ನೋಡುವಂತಾಗಿದೆ: ಬೃಹತ್ ಇಟಾಲಿಯನ್ ಕಂಪನಿ ಟಾಟಾ ತೆಕ್ಕೆಗೆ

ಇಟಲಿಯ ಪ್ರಮುಖ ಕಮರ್ಷಿಯಲ್ ವಾಹನ ತಯಾರಕ ಕಂಪನಿಯಾಗಿರುವ ಐವೆಕೊ (Iveco) ಗ್ರೂಪ್‌ ಅನ್ನು €3.8 ಬಿಲಿಯನ್ (ಅಂದಾಜು ರೂ.38,098 ಕೋಟಿ) ಮೊತ್ತಕ್ಕೆ ಸ್ವಾಧೀನಪಡಿಸಿಕೊಳ್ಳುವುದಾಗಿ ಟಾಟಾ ಮೋಟಾರ್ಸ್ (Tata Motors) ಘೋಷಿಸಿದೆ. ಇದು ಸಂಪೂರ್ಣ ನಗದು ಒಪ್ಪಂದವಾಗಿದ್ದು, ಟಾಟಾ ಮೋಟಾರ್ಸ್ ಐವೆಕೊದ ವಾಣಿಜ್ಯ ವಾಹನ ಕಾರ್ಯಾಚರಣೆಗಳನ್ನು ನಿಯಂತ್ರಣಕ್ಕೆ ತೆಗೆದುಕೊಳ್ಳಲಿದೆ. ಇದರಲ್ಲಿ ಟ್ರಕ್‌ಗಳು, ಬಸ್‌ಗಳು, ಪವರ್‌ಟ್ರೇನ್‌ಗಳು ಮತ್ತು ಸಂಬಂಧಿತ ವ್ಯವಹಾರಗಳು ಸೇರಿವೆ. ಆದರೆ ಐವೆಕೊದ ರಕ್ಷಣಾ ವಿಭಾಗ (defence division)ವನ್ನು ಸ್ಪಷ್ಟವಾಗಿ ಹೊರಗಿಡಲಾಗಿದೆ. ಇದನ್ನು ಆಫರ್ ಪೂರ್ಣಗೊಳ್ಳುವ ಮೊದಲು ಬೇರ್ಪಡಿಸಿ ಸ್ವತಂತ್ರವಾಗಿ ಮಾರಾಟ ಮಾಡಲಾಗುತ್ತದೆ ಎಂದು ವರದಿಯಾಗಿದೆ.

2008 ರಲ್ಲಿ ಜಾಗ್ವಾರ್ ಲ್ಯಾಂಡ್ ರೋವರ್ ಅನ್ನು ಖರೀದಿಸಿದ ನಂತರ ಇದು ಟಾಟಾ ಮೋಟಾರ್ಸ್‌ನ ಅತಿದೊಡ್ಡ ಆಟೋಮೋಟಿವ್ ಸ್ವಾಧೀನವಾಗಿದೆ. ಕೋರಸ್ ಒಪ್ಪಂದದ ನಂತರ ಟಾಟಾ ಗ್ರೂಪ್‌ನ ಎರಡನೇ ಅತಿದೊಡ್ಡ ಕ್ರಾಸ್-ಬಾರ್ಡರ್ ಸ್ವಾಧೀನವನ್ನು ಪ್ರತಿನಿಧಿಸುತ್ತದೆ. ಈ ಸ್ವಾಧೀನವನ್ನು ಡಚ್-ನೋಂದಾಯಿತ, ಟಾಟಾ ಮೋಟಾರ್ಸ್‌ನ ಸಂಪೂರ್ಣ ಸ್ವಾಮ್ಯದ ಅಂಗಸಂಸ್ಥೆಯಾದ TML CV ಹೋಲ್ಡಿಂಗ್ಸ್ ಪ್ರೈವೇಟ್ ಲಿಮಿಟೆಡ್ ಮೂಲಕ ಕಾರ್ಯಗತಗೊಳಿಸಲಾಗುತ್ತದೆ.

ಈ ಸ್ವಾಧೀನವು €22 ಬಿಲಿಯನ್ (₹2.2 ಲಕ್ಷ ಕೋಟಿ) ಆದಾಯದೊಂದಿಗೆ ಸಂಯೋಜಿತ ಘಟಕವನ್ನು ರಚಿಸುವ ನಿರೀಕ್ಷೆಯಿದೆ. ಇದು ಟಾಟಾ ಮೋಟಾರ್ಸ್‌ಗೆ ವಿಶೇಷವಾಗಿ ಯುರೋಪ್ ಮತ್ತು ಅಮೆರಿಕಾಗಳಲ್ಲಿ ಹೆಚ್ಚಿನ ಜಾಗತಿಕ ಜನಪ್ರಿಯತೆಯನ್ನು ನೀಡಲಿದೆ. ಈ ಸಂಯೋಜಿತ ಗ್ರೂಪ್ ಯುರೋಪ್‌ನಿಂದ 50%, ಭಾರತದಿಂದ 35% ಮತ್ತು ಅಮೆರಿಕದಿಂದ 15% ಆದಾಯ ವಿಭಜನೆಯನ್ನು ಹೊಂದಿರುತ್ತದೆ ಎಂದು ನಿರೀಕ್ಷಿಸಲಾಗಿದೆ.

ಐವೆಕೊದ ರಕ್ಷಣಾ ವ್ಯವಹಾರದ ಪ್ರತ್ಯೇಕತೆ ಮತ್ತು ಮಾರಾಟದ ಮೇಲೆ ಟಾಟಾ ಷರತ್ತುಬದ್ಧವಾಗಿದೆ. ಐವೆಕೊ ತನ್ನ ರಕ್ಷಣಾ ವಿಭಾಗವನ್ನು ಮಾರ್ಚ್ 31, 2026 ರೊಳಗೆ ಇಟಲಿಯ ಏರೋಸ್ಪೇಸ್ ಕಂಪನಿ ಲಿಯೊನಾರ್ಡೊ ಎಸ್‌ಪಿಎಗೆ 1.7 ಬಿಲಿಯನ್ ಯುರೋಗಳಿಗೆ ಮಾರಾಟ ಮಾಡಲಿದೆ. ಯುರೋಪ್ ವಿಲೀನ ಕಾನೂನುಗಳು, ವಿದೇಶಿ ಹೂಡಿಕೆ ನಿಯಮಗಳು ಮತ್ತು ಇಟಲಿಯ ಗೋಲ್ಡನ್ ಪವರ್ ನೀತಿಯ ಅಡಿಯಲ್ಲಿ ನಿಯಂತ್ರಕ ಅನುಮೋದನೆಗಳಿಂದಾಗಿ ರಕ್ಷಣಾ ವ್ಯವಹಾರವನ್ನು ಬದಿಗಿಡಲಾಗಿದೆ.

ಈ ಗೋಲ್ಡನ್ ಪವರ್ ನೀತಿಯು ರಕ್ಷಣಾ ವಿಭಾಗ, ಇಂಧನ, ಸಾರಿಗೆ ಮತ್ತು ಹೆಚ್ಚಿನವುಗಳಂತಹ ರಾಷ್ಟ್ರೀಯ ಹಿತಾಸಕ್ತಿಗಳಿಗೆ ಸಂಬಂಧಿಸಿದ ಕ್ಷೇತ್ರಗಳಲ್ಲಿ ವಿದೇಶಿ ಕಂಪನಿಗಳಿಂದ ನೇರ ಹೂಡಿಕೆಗಳ ಮೇಲ್ವಿಚಾರಣೆ ಮಾಡಲು ಮತ್ತು ನಿರ್ಬಂಧಿಸಲು ಅಥವಾ ಷರತ್ತುಗಳನ್ನು ವಿಧಿಸಲು ಇಟಲಿ ಸರ್ಕಾರಕ್ಕೆ ಅಧಿಕಾರವಿದೆ. ಹಾಗಾಗಿ ಈ ಒಪ್ಪಂದದಲ್ಲಿ ಐವೆಕೊದ ರಕ್ಷಣಾ ವಿಭಾಗವನ್ನು ಸ್ಪಷ್ಟವಾಗಿ ಹೊರಗಿಡಲಾಗಿದೆ.

ಸ್ವಾಧೀನ ಪೂರ್ಣಗೊಂಡ ನಂತರ, ಐವೆಕೊವನ್ನು ಇಟಾಲಿಯನ್ ಸ್ಟಾಕ್ ಎಕ್ಸ್ಚೇಂಜ್ ಯುರೋನೆಕ್ಸ್ಟ್ ಮಿಲ್‌ನ ಪಟ್ಟಿಯಿಂದ ತೆಗೆದುಹಾಕಲಾಗುವುದು. ನಂತರ ಟಾಟಾ ಮೋಟಾರ್ಸ್‌ನ ಸಂಪೂರ್ಣ ಸ್ವಾಮ್ಯದ ಅಂಗಸಂಸ್ಥೆಯಾಗಲಿದೆ. ಸಂಯೋಜಿತ ಟಾಟಾ-ಐವೆಕೊ ಗ್ರೂಪ್ ವಾರ್ಷಿಕ 22 ಬಿಲಿಯನ್ ಯುರೋ (ಸುಮಾರು 2.2 ಲಕ್ಷ ಕೋಟಿ ರೂ.) ಆದಾಯ ಮತ್ತು 5,40,000 ವಾಹನಗಳ ಮಾರಾಟವನ್ನು ಹೊಂದಿರುತ್ತದೆ.

ಈ ವಾಣಿಜ್ಯ ವಾಹನ ತಯಾರಕ ಕಂಪನಿಯು ತನ್ನ ಬ್ರಾಂಡ್‌ಗಳು ಮತ್ತು ಯುರೋಪಿನಾದ್ಯಂತ ಉತ್ಪಾದನಾ ಕಾರ್ಯಾಚರಣೆಗಳೊಂದಿಗೆ ಟುರಿನ್ ನಲ್ಲಿ ತನ್ನ ಪ್ರಧಾನ ಕಚೇರಿಯನ್ನು ಉಳಿಸಿಕೊಳ್ಳಲಿದೆ. ಈ ಸಂಯೋಜಿತ ಗ್ರೂಪ್' ಪೂರಕ ಸಾಮರ್ಥ್ಯಗಳನ್ನು ಬಳಸಿಕೊಳ್ಳುವುದು, ಅದರ ಬಂಡವಾಳವನ್ನು ವಿಸ್ತರಿಸುವುದು ಮತ್ತು ಐವೆಕೊದ ಮುಂದುವರಿದ ಎಲೆಕ್ಟ್ರಿಕ್ ಮತ್ತು ಹೈಡ್ರೋಜನ್ ಪವರ್‌ಟ್ರೇನ್ ತಂತ್ರಜ್ಞಾನಗಳ ಬಳಕೆ ಒಳಗೊಂಡಂತೆ ಕ್ಲೀನ್ ಮೊಬಿಲಿಟಿಯಲ್ಲಿ ಅಭಿವೃದ್ಧಿಯನ್ನು ವೇಗಗೊಳಿಸುವ ಗುರಿಯನ್ನು ಹೊಂದಿದೆ.

ಡ್ರೈವ್‌ಸ್ಪಾರ್ಕ್ ಅಭಿಪ್ರಾಯ: ಈ ಒಪ್ಪಂದವು ಯುರೋಪ್‌ನಲ್ಲಿ ಟಾಟಾದ ಉಪಸ್ಥಿತಿಯನ್ನು ಗಮನಾರ್ಹವಾಗಿ ಹೆಚ್ಚಿಸುತ್ತದೆ. ಇದು ಟಾಟಾವನ್ನು ಗಂಭೀರ ಬಹುರಾಷ್ಟ್ರೀಯ ಕಂಪನಿಯಾಗಿ ಇರಿಸುತ್ತದೆ, ಪ್ರಮುಖ, ಮುಂದುವರಿದ ವಲಯಗಳಲ್ಲಿ ವಿಶ್ವಾದ್ಯಂತ ಸ್ಪರ್ಧಿಸಲು ಮತ್ತು ಪಾಲುದಾರನಾಗಲು ಸಾಧ್ಯವಾಗುತ್ತದೆ. ಟಾಟಾ ಮೋಟಾರ್ಸ್‌ನ ಈ ಮುನ್ನಡೆ ಬಗ್ಗೆ ನಿಮ್ಮಾ ನಿಸಿಕೆಗಳನ್ನು ಕಮೆಂಟ್‌ನಲ್ಲಿ ತಿಳಿಸಿ.