ಟೊಯೋಟಾ ಕಾರುಗಳ ಬೆಲೆ ಇಳಿಕೆ... ಈ ಎಸ್‌ಯುವಿ ಮೇಲೆ ಬರೋಬ್ಬರಿ 3.49 ಲಕ್ಷ ರೂ. ಕಡಿತ

ಪ್ರಮುಖ ಕಾರು ತಯಾರಕರಾದ ಟೊಯೋಟಾ ಕಿರ್ಲೋಸ್ಕರ್ ಮೋಟಾರ್ (ಟಿಕೆಎಂ) ಇತ್ತೀಚಿನ ಜಿಎಸ್‌ಟಿ ದರ ಕಡಿತದ ಪ್ರಯೋಜನಗಳನ್ನು ತನ್ನ ಗ್ರಾಹಕರಿಗೆ ಸಂಪೂರ್ಣವಾಗಿ ವರ್ಗಾಯಿಸುವುದಾಗಿ ಘೋಷಿಸಿದೆ. ಪರಿಷ್ಕೃತ ಬೆಲೆಗಳು ಸೆಪ್ಟೆಂಬರ್ 22, 2025 ರಿಂದ ಜಾರಿಗೆ ಬರಲಿವೆ. ಈ ಕ್ರಮವು ಖರೀದಿದಾರರಿಗೆ ಕೈಗೆಟುಕುವಿಕೆ ಮತ್ತು ಹಬ್ಬದ ಋತುವಿನಲ್ಲಿ ಕಂಪನಿಗೆ ಬೇಡಿಕೆಯನ್ನು ಹೆಚ್ಚಿಸಲಿದೆ. ಈ ಬೆಳವಣಿಗೆಯು ಕಾರುಗಳ ಬೆಲೆಯಲ್ಲಿ ಪ್ರಮುಖ ಬದಲಾವಣೆ ಮತ್ತು ಭಾರತೀಯ ವಾಹನ ಮಾರುಕಟ್ಟೆಯಾದ್ಯಂತ ಹಬ್ಬದ ಋತುವಿನ ಮಾರಾಟವನ್ನು ಉತ್ತೇಜಿಸುವ ನಿರೀಕ್ಷೆಯಿದೆ ಎಂದು ಟೊಯೋಟಾ ವಿಶ್ವಾಸ ವ್ಯಕ್ತಪಡಿಸಿದೆ. ಯಾವ ಮಾಡಲ್‌ ಮೇಲೆ ಎಷ್ಟು ಇಳಿಕೆಯಾಗಿದೆ ಬನ್ನಿ ನೊಡೋಣ.

ಟೊಯೋಟಾ ಮಾರಾಟ-ಸೇವೆ-ಬಳಸಿದ ಕಾರು ವ್ಯವಹಾರದ ಉಪಾಧ್ಯಕ್ಷ ವರೀಂದರ್ ವಾಧ್ವಾ ಮಾತನಾಡಿ, "ಈ ಐತಿಹಾಸಿಕ ಸುಧಾರಣೆಗಾಗಿ ನಾವು ಭಾರತ ಸರ್ಕಾರಕ್ಕೆ ಪ್ರಾಮಾಣಿಕವಾಗಿ ಧನ್ಯವಾದ ಹೇಳುತ್ತೇವೆ. ಇದು ಗ್ರಾಹಕರಿಗೆ ಕೈಗೆಟುಕುವಿಕೆಯನ್ನು ಹೆಚ್ಚಿಸುವುದಲ್ಲದೆ, ಆಟೋ ವಲಯದಲ್ಲಿ ಒಟ್ಟಾರೆ ವಿಶ್ವಾಸವನ್ನು ಬಲಪಡಿಸಿದೆ. ಹಬ್ಬದ ಋತುವಿನ ಮೊದಲು ಈ ಹಂತವು ಬಲವಾದ ಆವೇಗವನ್ನು ನೀಡುವುದರ ಜೊತೆಗೆ, ಬೇಡಿಕೆ ಮತ್ತಷ್ಟು ಹೆಚ್ಚಾಗುವ ನಿರೀಕ್ಷೆಯಲ್ಲಿದ್ದೇವೆ.

ಪಾರದರ್ಶಕ ಮತ್ತು ಗ್ರಾಹಕ-ಕೇಂದ್ರಿತ ಕಂಪನಿಯಾಗಿ, ಈ ಪ್ರಯೋಜನಗಳನ್ನು ನಮ್ಮ ಗ್ರಾಹಕರಿಗೆ ವರ್ಗಾಯಿಸಲು ನಾವು ಸಂತೋಷಪಡುತ್ತೇವೆ. ನಮ್ಮ ವಿಶ್ವ ದರ್ಜೆಯ ಕಾರುಗಳನ್ನು ಹೆಚ್ಚು ಖರೀದಿಸುವಂತೆ ಮಾಡಲು ನಾವು ಬದ್ಧರಾಗಿದ್ದೇವೆ. ಎಲ್ಲರಿಗೂ ಸಾಮೂಹಿಕ ಸಂತೋಷವನ್ನು ಸೃಷ್ಟಿಸುವ ಮತ್ತು ಭಾರತದ ಸುಸ್ಥಿರ ಮತ್ತು ಸಮಗ್ರ ಬೆಳವಣಿಗೆಯ ಪ್ರಯಾಣಕ್ಕೆ ಕೊಡುಗೆ ನೀಡುವ ಸುಧಾರಣೆಗಳನ್ನು ಸ್ವಾಗತಿಸುತ್ತೇವೆ" ಎಂದರು.

ಟೊಯೋಟಾದ ಬೆಲೆ ಕಡಿತವು ಆಟೋ ವಲಯದಲ್ಲಿ ಇತರ ಕಂಪನಿಗಳಿಗೆ ಹೋಲಿಸಿದರೆ ಮುಂಚೂಣಿಯಲ್ಲಿದೆ, ಮಾದರಿಯನ್ನು ಅವಲಂಬಿಸಿ ಬೆಲೆ ಕಡಿತಗಳು ರೂ. 48,700 ನಿಂದ ರೂ. 3.49 ಲಕ್ಷದವರೆಗೆ ಇಳಿಕೆಯಾಗಿದೆ. ಒಟ್ಟು ಟೊಯೋಟಾ ತನ್ನ 11 ಮಾಡಲ್‌ಗಳ ಬೆಲೆ ಕಡಿತ ಪಟ್ಟಿಯನ್ನು ಹೊರತಂದಿದ್ದು, ಯಾವ ಮಾಡಲ್‌ಗೆ ಎಷ್ಟು ಬೆಲೆ ಇಳಿಕೆಯಾಗಿದೆ ಎಂಬುದನ್ನು ಈ ಕೆಳಗೆ ನೀಡಲಾಗಿದೆ.

ಮಾಡಲ್‌ ವಾರು ಬೆಲೆ ಕಡಿತ

ಗ್ಲಾಂಜಾ ರೂ. 85,300 ವರೆಗೆ
ಟೈಸರ್ ರೂ. 1,11,100 ವರೆಗೆ
ರುಮಿಯನ್ ರೂ. 48,700 ವರೆಗೆ
ಹೈರೈಡರ್ ರೂ. 65,400 ವರೆಗೆ
ಕ್ರಿಸ್ಟಾ ರೂ. 1,80,600 ವರೆಗೆ
ಹೈಕ್ರಾಸ್ ರೂ. 1,15,800 ವರೆಗೆ
ಫಾರ್ಚೂನರ್ ರೂ. 3,49,000 ವರೆಗೆ
ಲೆಜೆಂಡರ್ ರೂ. 3,34,000 ವರೆಗೆ
ಹಿಲಕ್ಸ್ ರೂ. 2,52,700 ವರೆಗೆ
ಕ್ಯಾಮ್ರಿ ರೂ. 1,01,800 ವರೆಗೆ
ವೆಲ್‌ಫೈರ್ ರೂ. 2,78,000 ವರೆಗೆ

ಪರಿಷ್ಕೃತ ಬೆಲೆಗಳು ಸೆಪ್ಟೆಂಬರ್ 22, 2025 ರಿಂದ ಭಾರತದ ಎಲ್ಲಾ ಟೊಯೋಟಾ ಡೀಲರ್‌ಶಿಪ್‌ಗಳಲ್ಲಿ ಹಬ್ಬದ ಋತು ಮತ್ತು ನವರಾತ್ರಿಯ ಆರಂಭದೊಂದಿಗೆ ಅನ್ವಯವಾಗುತ್ತವೆ. ಗಮನಿಸಿ - ಗ್ರಾಹಕರು ತಮ್ಮ ನೆಚ್ಚಿನ ಟೊಯೋಟಾ ವಾಹನದ ಬೆಲೆಯನ್ನು ಹತ್ತಿರದ ಅಧಿಕೃತ ಡೀಲರ್‌ಶಿಪ್‌ನಲ್ಲಿ ದೃಢೀಕರಿಸಲು ವಿನಂತಿಸಲಾಗಿದೆ. ಹಬ್ಬದ ಋತುವಿನಲ್ಲಿ ಸಕಾಲಿಕ ವಿತರಣೆಯನ್ನು ಖಚಿತಪಡಿಸಿಕೊಳ್ಳಲು ಗ್ರಾಹಕರು ತಮ್ಮ ಬುಕಿಂಗ್‌ಗಳನ್ನು ಮುಂಚಿತವಾಗಿ ಮಾಡುವಂತೆ ಟೊಯೋಟಾ ಒತ್ತಾಯಿದೆ.

ಜಿಎಸ್‌ಟಿ 2.0 ನಂತರ ಈ ಬೆಲೆ ಕಡಿತ ಮಾಡಲಾಗಿದೆ, ಇದು ಸಣ್ಣ ಕಾರುಗಳು ಮತ್ತು ದ್ವಿಚಕ್ರ ವಾಹನಗಳಿಗೆ (350 ಸಿಸಿಗಿಂತ ಕಡಿಮೆ) ಜಿಎಸ್‌ಟಿಯನ್ನು 18% ಕ್ಕೆ ಇಳಿಸಿದ್ದು, ಹೆಚ್ಚುವರಿ ಸೆಸ್ ಅನ್ನು ತೆಗೆದುಹಾಕಲಾಗಿದೆ. ಜೊತೆಗೆ ಎಲ್ಲಾ ಆಟೋ ಬಿಡಿಭಾಗಗಳಿಗೆ ತೆರಿಗೆ ವ್ಯವಸ್ಥೆಯನ್ನು ಸರಳೀಕರಿಸಲಾಗಿದೆ. ದೊಡ್ಡ ಕಾರುಗಳು ಮತ್ತು ಎಸ್‌ಯುವಿಗಳು ಈಗ ಏಕರೂಪದ 40% ಜಿಎಸ್‌ಟಿ ದರವನ್ನು ಹೊಂದಿವೆ.

ಮಾರುತಿ ಸುಜುಕಿ ಮತ್ತು ಟಾಟಾ ಮೋಟಾರ್ಸ್‌ನಂತಹ ಇತರ ವಾಹನ ತಯಾರಕರು ಸಹ ಜಿಎಸ್‌ಟಿ ಕೌನ್ಸಿಲ್‌ನ ತೆರಿಗೆ ತರ್ಕಬದ್ಧಗೊಳಿಸುವ ನೀತಿಗೆ ಪ್ರತಿಕ್ರಿಯೆಯಾಗಿ ಇದೇ ರೀತಿಯ ಬೆಲೆ ಕಡಿತವನ್ನು ಘೋಷಿಸಿವೆ. ಆದರೆ ಟೊಯೋಟಾದ ಕಡಿತಗಳು ಮಾರುಕಟ್ಟೆಯಲ್ಲಿ ಅತ್ಯಂತ ಹೆಚ್ಚಿನ ಕಡಿತಗಳಲ್ಲಿ ಸೇರಿವೆ ಎಂದು ಮೂಲಗಳು ತಿಳಿಸಿವೆ.